នាយរងប៉ុស្តិ៍វរព្រំដែន៨១៧ស្លាប់ក្រោយពេលរួមរ័កជាមួយស្រីស្នេហ៍
បាត់ដំបង ៖ មន្ត្រីនគរបាលកន្លែងអង្គភាពវរសេនាតូចលេខ៨១៧ ដែលមានឋានៈជាអនុសេនីយ៍ត្រីនិងជានាយរងប៉ុស្តិ៍ជួរមុខម្នាក់ត្រូវបានគេប្រទះឃើញដេកស្លាប់កាលពីវេលាម៉ោង៧យបថ្ងៃទី១០ ខែមករា ឆ្នាំ២០១៥ ក្នុងបន្ទប់ផ្ទះសំណាក់មួយកន្លែងយីហោ តាយហេង១ស្ថិតក្នុងភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង បន្ទាប់ពីមន្ត្រីនគរបាលរូបនេះបាននាំស្រីស្នេហ៍ចូលទៅក្រេបទឹកឃ្មុំ និងឡើងឋានសួគ៌អស់រយៈពេលពេញមួយយប់រួចមក។
តាមការអះអាងពីមេការប្រចាំក្នុងផ្ទះសំណាក់នេះបានរៀបរាប់ថា កាលពីព្រលប់ថ្ងៃទី៩មករា គេបានឃើញជនរងគ្រោះបាននាំនារីម្នាក់ដែលមើលទៅទំនងជាសង្សារនឹងគ្នាផងចូលទៅ
សំរាកក្នុងបន្ទប់លេខ៧នៃផ្ទះសំណាក់យីហោ តាយសេង១ នេះដោយមិនបានចេញទៅណាទេ
នៅក្នុងយប់នោះ ប៉ុន្តែនារីនោះទំនងជាមានការអៀនខ្មាសបានជានាងព្យាយាមសិតសក់ទម្លាក់
គ្របមុខជិត ដោយមិនអាចមើលឃើញផ្ទៃមុខពេញឡើយ។
មេការរូបនោះបានបន្តទៀតថា លុះនៅពេលព្រឹកឡើងគឺនៅថ្ងៃទី១០ប្រហែលជាម៉ោង៧ក៏ស្រាប់តែឃើញនារីម្នាក់នោះបានដើរចេញពីផ្ទះសំណាក់តែម្នាក់ឯងទៅក្រៅបាត់ទៅ ដោយនាងមិនចោលអាកប្បកិរិយាចាស់នោះទេគឺនាងនៅតែទម្លាក់សក់គ្របមុខដដែលហើយដោយសារ
តែមិនទាន់ផុតម៉ោងដូច្នេះមិនមានអ្នកណាម្នាក់ហ៊ានទៅរំខានភ្ញៀវដែលកំពុងសំរាកឡើយ។
ប៉ុន្តែចម្ងល់ចេះតែកើតមានឡើងដោយសារតែមន្ត្រីនគរបាលរូបនោះពុំមានចេញទៅណាទាល់តែសោះរហូតដល់ម៉ោង៧ល្ងាចថ្ងៃទី១០ដដែលទើបមេការដើរទៅគោះទ្វារហៅក្នុងគោលបំណងសាកសួរភ្ញៀវថាតើគាត់ត្រូវសំរាកមួយយប់ទៀតឬយ៉ាងណា ប៉ុន្តែក្រោយពីគោះទ្វារហៅគ្មានចំលើយហើយម្យ៉ាងទៀតដោយទ្វារមិនបានដាក់គន្លឹះក្នុងផងទើបមេការសំរេចចិត្តបើកទ្វារក៏ស្រាប់តែឃើញជនរងគ្រោះដេកស្លាប់ក្នុងស្ថានភាពអាក្រាតកាយទាំងអស់ព្រមទាំងមានសភាពសាច់ឡើងស្វាយផងដែរទើបមេការបានរាយការទៅម្ចាស់ផ្ទះសំណាក់ ព្រមទាំងសមត្ថកិច្ចផងដើម្បីចុះទៅត្រួតពិនិត្យ។
ក្នុងការធ្វើកោសល្យវិច័យរបស់សមត្ថកិច្ចគឺសង្កេតឃើញថាជនរងគ្រោះមានឈ្មោះ
ខេង ស្រ៊ុន ភេទប្រុស កើតនៅឆ្នាំ១៩៦៨ មានអត្តលេខ១៧០៩៤ ឋានៈជាអនុសេនីយ៍ត្រី និងជានាយរងប៉ុស្តិ៍ក្នុងវរសេនាតូចលេខ៨១៧។ ក្រោយពីការពិនិត្យទៅលើរាងកាយសពគឺសពមានសភាពស្លេកស្លាំង និងឡើងពណ៌ស្វាយ ព្រមទាំងមានបែកពពុះមាត់ និងមានឈាមហូរតាមច្រមុះផង ចំណុចដែលសំខាន់គឺលិង្គរបស់សពគ្មានទឹកកាមបន្តិចទាល់តែសោះ ដែលជាបញ្ហាមួយតំរូវអោយសមត្ថកិច្ចជំនាញធ្វើការស៊ើបអង្កេតអោយបានច្បាស់ក្នុងរឿងនេះ ដោយមតិខ្លះបាននិយាយថា ជនរងគ្រោះអាចគាំងបេះដូងនៅពេលដែលមានការរំភើបខ្លាំងជាមួយស្រីស្នេហ៍ រីឯមតិខ្លះទៀតបាននិយាយថា អាចពាក់ព័ន្ធទៅនឹងនារីនោះដែរ ប៉ុន្តែចំពោះលុយកាក់និងសំភារៈក្នុងនោះក៏មានទូរស័ព្ទចំនួនពីរគ្រឿងគឺពុំមានការបាត់បង់ទៅណាទេបើទោះបីជានារីនោះបានចាកចេញទៅមុនក៏ដោយ។
បញ្ហានេះយើងមិនទាន់ដឹងថា សមត្ថកិច្ចត្រូវតាមស្រាវជ្រាវរកនារីនោះមកបំភ្លឺចំពោះមុខច្បាប់
ឬក៏យ៉ាងណានោះឡើយ ព្រោះការស្លាប់របស់មន្ត្រីនគរបាលរូបនេះវាហាក់ដូចជាស្ថិតក្នុងអាថ៌កំបាំងនៅឡើយ ម្យ៉ាងវិញទៀតគឺនារីនោះពុំបានបង្ហាញមុខអោយបានច្បាស់នោះទេ ដោយនាងបានទម្លាក់សក់គ្របមុខទាំងការដើរចូល និងពេលចេញទៅវិញផងដែរ ដោយក្រោយពេលធ្វើកោសល្យវិច័យរួចសពក៏បានប្រគល់ទៅអោយក្រុមគ្រួសារយកទៅធ្វើបុណ្យផងដែរ៕
និយមរ័ត្ន
0 Comments