ឥណ្ឌូនេស៊ី ៖ មានភាពស្រឡះឡើងវិញ បន្ទាប់ពីអាកាសធាតុអ័ព្ទអួរ កាលពីថ្ងៃព្រហស្បត្តិ៍ កន្លងមកនេះ នាំឲ្យមានក្ដីសង្ឃឹមថា អាចបើកការស៊ើបអង្កេតនូវអ្វីដែលត្រូវបានគេជឿជាក់ថា ជាបំណែកបែកបាក់ខ្ទេចខ្ទី លិចនៅក្នុងបាតសមុទ្រ នៃយន្តហោះរបស់អាកាសចរណ៍Air Asia ដែលធ្លាក់នៅតំបន់ Borneo ព្រមទាំងការប្រមូលយកប្រអប់ខ្មៅ (Black Box) របស់យន្តហោះតែម្ដង ដែលអាចធ្វើការបកស្រាយបាននូវមូលហេតុ នៃការធ្លាក់យន្តហោះនោះ។
យន្តហោះធុន AirBus A320-200 ដែលផ្ទុក អ្នកធ្វើដំណើរ១៦២នាក់ បានធ្លាក់ពីលើអាកាស ពេលព្យាយាមបន្ថែមកំពស់នៃការហោះហើរ ដើម្បីបញ្ចៀសពីអាកាសធាតុ ដែលមានព្យុះ កាលពីថ្ងៃអាទិត្យកន្លងមកនេះ នៅពេលធ្វើការហោះហើរចេញពីប្រទេសឥណ្ឌូនេស៊ី ទីក្រុង Surabaya ទៅកាន់ប្រទេសសិង្ហបុរីនោះ។
នៅឯនាយសមុទ្រឯណោះ យ៉ាងហោចក៏មានសាកសព ៨នាក់ទៀត ត្រូវបានរកឃើញ ពីក្នុងសមុទ្រ ក្បែរកន្លែងដែលឧបករណ៍សូណារ បានកំណត់ ពីប្រភព វត្ថុមួយយ៉ាងធំ ពណ៌ខ្មៅ នៅឯបាតសមុទ្រនោះ ដោយស្ថិតនៅក្នុងជម្រៅទឹក ពី៣០-៥០ម៉ែត្រ (100-165ហ្វីត)។
នៅថ្ងៃព្រហស្បត្តិ៍នោះ ផ្ទៃមេឃ នៅពីលើ មូលដ្ឋានទ័ព អាកាស Pangkalan Bun air base ប្រែក្លាយទៅជាស្រឡះ តាំងពីព្រឹក ដោយសមុទ្រក៏ស្ងប់ ដែលនោះជាការកើនឡើងនូវក្ដីសង្ឃឹម ធ្វើឲ្យការខិតខំប្រឹងប្រែងស្វែងរកអាចនឹងចាប់ផ្ដើមដំណើរការជាបន្តទៀត។
ប្រអប់ខ្មៅ ដែលកត់ត្រាសកម្មភាពហោះហើរ និងឧបករណ៍ថតសម្លេងនៅបន្ទប់បើកបរយន្តហោះ ពិតជាអាចជួយដោះស្រាយដោយប្រាប់ពីអាថ៌កំបាំង នៃការធ្លាក់យន្តហោះនោះបាន។ ក្រុមអ្នកសង្កេតស្រាវជ្រាវកំពុងតែបំពេញកិច្ចការទៅតាមទ្រឹស្ដី ទៅតាមអ្វីដែលថា អ្នកបើកបរយន្តហោះ បានបង្កើនកំពស់ហោះហើរដើម្បីគេចចេញពីព្យុះនោះ។ សាកសពដែលរកឃើញ ពីតំបន់សមុទ្រ Java (ជ្វា) កំពុងតែត្រូវបានរៀបចំដាក់មឈូស យកទៅកាន់ក្រុង Surabaya ដែលនៅទីនោះ ក្រុមគ្រួសាររបស់អ្នករងគ្រោះ បានមកជួបជុំគ្នារួចជាស្រេច។ អាជ្ញាធរក៏កំពុងតែធ្វើការប្រមូលយក DNA ពីសាច់ញាតិដើម្បីជួយស្វែងរកអត្តសញ្ញាណសាកសព។
សាកសពខ្លះដែលត្រូវបានប្រទះឃើញ មានទាំងបាត់បង់សម្លៀកបំពាក់ និងសាកសពខ្លួនស្លៀកពាក់ពេញលក្ខណៈ រួមទាំងស្រ្តីអូតេស ហោះហើរ ដែលនៅតែមានជាប់ឯកសណ្ឋាន Air Asia របស់ខ្លួនផងដែរ៕
ស.ប.ឆ
0 Comments