រតនគិរី ៖ ជំនួញឈើប្រណិតអនាធិបតេយ្យដ៏កាក់កបតាមរថយន្តឡង់គ្រីស័ររបស់លោកឡាំ វិឆៃ សង្ស័យអាងខ្នងជាកូនប្រុសរបស់អ្នកមានឥទ្ធិពលនៅក្នុងខេត្តរតនគិរី សមត្ថកិច្ចចម្រុះមិនហ៊ានបង្ក្រាប។ ជាក់ស្តែងរថយន្តរបស់លោកបានដឹកជញ្ជូនឈើប្រណិតចេញពីស្រុកវើនសៃ ឆ្ពោះមកក្រុងបានលុង កាលពីល្ងាចថ្ងៃទី១៩ ខែមករា ឆ្នាំ២០១៥។
ប្រភពព័ត៌មានពីកំពង់ចម្លងនៅទីប្រជុំជនផ្សារស្រុកវើសនៃ ឃុំប៉ុង បានឲ្យដឹងនៅថ្ងៃកើតហេតុខាងលើថា គេសង្កេតឃើញរថយន្តម៉ាកឡង់គ្រីស័រពណ៌ស្លែ ពាក់ស្លាកលេខភ្នំពេញ2G-2928 ផ្ទុកឈើប្រណិតអនាធិបតេយ្យពេញ ហើយរថយន្តបើកចេញពីឃុំបាក់កាឡាន់ ឆ្លងកំពង់ចម្លងពីត្រើយម្ខាងមកត្រើយម្ខាងទៀត ខណៈនោះគេសង្កេតឃើញនៅលើកំពង់ចម្លងមានអ្នកដំណើរឆ្លងកាត់ជាច្រើននាក់បានផ្ដោតអារម្មណ៍ទៅលើរថយន្តដែលផ្ទុកឈើប្រណិតខុសច្បាប់ហាក់ដូចជាសំញ៉ែងអ្នកដំណើរឆ្លងដនោះដែរ។ លុះអ្នកបើករថយន្តម៉ាកឡង់គ្រីស័រខាងលើបានបញ្ជារថយន្តចេញពីកំពង់ចម្លងបានជិតពាក់កណ្តាលផ្លូវក៏បើកទ្វាររថយន្តប្រាប់សមត្ថកិច្ចថា ជាឈើប្រណិតរបស់លោក ឡាំ វិឆៃ ជាកូនប្រុសរបស់បុគ្គលមានឥទ្ធិពលនៅក្នុងខេត្តមួយរូប។ ជំនួញឈើប្រណិតអនាធិបតេយ្យរបស់កូនប្រុសដែលមានឥទ្ធិពលនៅក្នុងខេត្តនោះ ភាគច្រើនដឹកឈើប្រណិតប្រភេទធ្នុង ដែលមានកម្រាស់១០សង់ទីម៉ែត្រ ប្រវែង១២០សង់ទីម៉ែត្រ ដឹកជញ្ជូនចេញពីស្រុកវើនសៃតាមបណ្តោយផ្លូវ៧៨Aឆ្ពោះមកក្រុងបានលុង។ នៅលើដងផ្លូវគេសង្កេតឃើញសមត្ថកិច្ចជំនាញរដ្ឋបាលព្រៃឈើនិងកងកម្លាំងប្រដាប់អាវុធគ្រប់លំដាប់ថ្នាក់រង់ចាំទទួលផលប្រយោជន៍ពីលោក ឡាំ វិឆៃ ជារៀងរាល់ថ្ងៃ។ ជុំវិញការចោទប្រកាន់លោក ឡាំ វិឆៃ កូនប្រុសរបស់អ្នកមានឥទ្ធិពលនៅក្នុងខេត្តនិងគួរកនរកស៊ីឈើប្រណិតខុសច្បាប់ពីស្រុកវើនសៃមកក្រុងបានលុងតាមផ្លូវជាតិលេខ៧៨A ដោយឆ្លងកាត់កម្លាំងចម្រុះគ្រប់ស្ថាប័ននោះ នៅព្រឹកថ្ងៃទី២១ ខែមករា លោក ឡាំ វិឆៃ មិនអាចសុំការបំភ្លឺបានទេ៕
តាជួង
0 Comments