បន្ទាយមានជ័យ ៖ ក្រុមសហភាពសហព័ន្ធយុវជនកម្ពុជាខេត្តបន្ទាយមានជ័យ១ក្រុមបានបរិច្ចាគឈាមជួយសង្គ្រោះជីវិតបុរសម្នាក់ជួបគ្រោះថ្នាក់ចរាចរណ៍នៅស្រុកព្រះនេត្រព្រះ កាលពីថ្ងៃទី២០ខែមករា ឆ្នាំ២០១៤ នៅមន្ទីរពេទ្យមិត្តភាពកម្ពុជា-ជប៉ុនស្រុកមង្គលបូរី។ ការបរិច្ចាគឈាមពីសំណាក់សហភាពសហព័ន្ធយុវជនកម្ពុជាខេត្តបន្ទាយមានជ័យគ្រាដែលមន្ទីរពេទ្យខ្វះឈាមត្រូវការឈាមចាំបាច់ដើម្បីជួយសង្គ្រោះជីវិតជនរងគ្រោះម្នាក់មានឈ្មោះ សឹម សុផុន អាយុ៤៩ឆ្នាំ បច្ចុប្បន្នរស់នៅភូមិភ្នំជញ្ជាំង ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។ បុរសរងគ្រោះទទួលរងរបួសគ្រោះថ្នាក់ចរាចរណ៍នៅស្រុកព្រះនេត្រព្រះកាលពីកន្លងទៅថ្មីៗនេះ មានសភាពធ្ងន់ធ្ងរបែកក្បាលបាក់ឆ្អឹងជើង ឆ្អឹងដៃ និងបាក់ឆ្អឹងដងកាំបិតផងដែរ។ ការបរិច្ចាគឈាមរបស់សហភាពសហព័ន្ធយុវជនកម្ពុជាខេត្តបន្ទាយមានជ័យធ្វើឡើងកាលពីរសៀលថ្ងៃទី២០ ខែមករា ឆ្នាំ២០១៥ ក្នុងនោះបានបរិច្ចាគឈាមចំនួន៤សាក់ ហើយត្រូវបានគ្រូពេទ្យយកឈាមនោះទៅជួយសង្គ្រោះជីវិតដល់ជនរងគ្រោះភ្លាមៗតែម្តង។ ជុំវិញនៃការខ្វះឈាមសម្រាប់ជួយសង្គ្រោះអ្នកជំងឺនៅមន្ទីរពេទ្យមិត្តភាពកម្ពុជា-ជប៉ុន ស្រុកមង្គលបូរី លោកប្រធានមន្ទីរពេទ្យបានប្រាប់ឱ្យដឹងថា នៅក្នុងមន្ទីរពេទ្យរបស់លោកសព្វថ្ងៃឈាមសម្រាប់ជួយសង្គ្រោះអ្នកជំងឺទូទៅមានការខ្វះខាត។ ជួនកាលនៅពេលចាំបាច់ជួយសង្គ្រោះជីវិតអ្នកជំងឺបន្ទាន់ បើកាលណាខ្វះឈាមគឺមានបងប្អូនអ្នកជំងឺជួយបរិច្ចាគឈាមដើម្បី សង្គ្រោះ។ លោកបញ្ជាក់ឱ្យដឹងទៀតថា ឈាមស្តុកសម្រាប់ព្យាបាលអ្នកជម្ងឺក្នុងមន្ទីរពេទ្យនៅពេលអ្នកជំងឺសម្រុកមកច្រើន គឺខែខ្លះខ្វះឈាម ចំណែកខែខ្លះទៀតនៅសល់ឈាមពី១០កំប្លោកទៅ២៥កំប្លោក។ មន្ទីរពេទ្យទទួលបានឈាមសម្រាប់ព្យាបាលអ្នកជំងឺដេកសម្រាកព្យាបាលនៅក្នុងមន្ទីរពេទ្យមិត្តភាពកម្ពុជា-ជប៉ុនស្រុកមង្គលបូរីកន្លងមកបានមកពីសាច់ញាតិអ្នកជំងឺ ,សប្បុរសជន,និង មន្ទីរពេទ្យខ្លួនឯងផងដែរ។ លោកក៏សូមអំពាវនាវឱ្យមន្ត្រីរាជការ កងកម្លាំងប្រដាប់អាវុធ រួមនឹង ប្រជាពលរដ្ឋទូទៅក្នុងខេត្តបន្ទាយមានជ័យនាំគ្នាមកបរិច្ចាគឈាមដើម្បីជួយសង្គ្រោះជីវិតប្រជាពលរដ្ឋដែលចាំបាច់ឈាមយកមកជួយសង្គ្រោះជីវិតជំងឺនៅក្នុងមន្ទីរពេទ្យ៕
គង្គា
0 Comments