កំពង់ឆ្នាំង ៖ ម៉ូតូកែច្នៃចម្លែកមួយគ្រឿង បានផលិតតាមទំនើងចិត្តនៅឆ្នាំ២០១៥ ត្រូវបាននគរបាលក្រុងកំពង់ឆ្នាំងចាប់ដកហូតពីម្ចាស់មករក្សាទុកនៅអធិការដ្ឋាននគរបាលក្រុងកំពង់ឆ្នាំង មិនឲ្យចរាចរណ៍លើផ្លូវបន្តទៀតឡើយ ព្រោះកែច្នៃខុសបច្ចេកទេស ដោយអ្នកបើកបរស្រវឹងបើកបង្ហោះជុំវិញរង្វង់មូលលេង។ ការដកហូតនេះបានកើតឡើងនៅវេលាម៉ោងនិង៣០នាទីយប់ ថ្ងៃទី១៨ ខែមករា ឆ្នាំ២១០៥ នៅចំណុចរង្វង់មូលវិមានឯករាជ្យក្នុងក្រុងកំពង់ឆ្នាំង។
លោក ញ៉ោក ប៊ុនធី អធិការរងនគរបាលក្រុងកំពង់ឆ្នាំងបាននិយាយឲ្យដឹងថា មុនពេលចាប់
ឃាត់ម៉ូតូខាងលើនេះ គឺនៅពេលលោកកំពុងដាក់កម្លាំងឈរជើងការពារសន្តិសុខសណ្ដាប់ធ្នាប់នៅតាមគោលដៅ ស្រាប់តែប្រទះឃើញម៉ូតូខាងលើនេះបើកបរដោយយុវជនម្នាក់ បានបើកបង្ហោះលេងជុំវិញរង្វង់មូលវិមានឯករាជ្យ លោកបានក៏ឲ្យមន្ត្រីនគរបាលស្ទាក់ចាប់ ហើយបានដឹងថា អ្នកបើកម៉ូតូស្រវឹងទៀតផង ទើបលោកឆ្លងយោបល់ថ្នាក់លើសម្រេចឲ្យឃាត់និងដកហូតរក្សាទុកនៅអធិការនគរបាលក្រុងកំពង់ឆ្នាំង ដោយមិនអនុញ្ញាតឲ្យធ្វើចរាចរណ៍នៅលើផ្លូវជាតិទៀតឡើយ។
ម៉ូតូកែច្នៃនេះ ជាម៉ូតូមានតែដែកឆ្អឹងតួម៉ូតូតួប្រុស បំពាក់ម៉ាស៊ីនគ្មានធុងសាំងគ្មានភ្លើងបំភ្លឺ មានបំពង់ស៊ីម៉ាំងតែមួយកំណាត់ឮផ្អើលគេឯង។ ចំណែកធុងសាំងវិញគេដាក់តែដបជ័រមួយបង្ហូរចូលម៉ាស៊ីន ឯកែបម៉ូតូវិញគេដាក់តែក្ដារឈើមួយបន្ទះ ចាប់ស្លាកលេខភ្នំពេញ1-F9591នៅលើឈ្នាន់ចំហៀងខុសទំនង គេមិនដឹងថាជាម៉ូតូម៉ាកអីទេ ដែលមន្ត្រីនគរបាលដាក់ឈ្មោះម៉ូតូកូនកាត់ឆ្នាំ២០១៥។
លោក សំ សិទ្ធី អធិការនគរបាលក្រុងកំពង់ឆ្នាំងបានឲ្យដឹងនៅព្រឹកថ្ងៃទី១៩ ខែមករា ឆ្នាំ២០ ១៥នេះថា ម្ចាស់ម៉ូតូនេះជាក្មេងស្ទាវនៅឃុំជ្រៃបាក់ ស្រុករលាប្អៀរ ក្នុងពេលសមត្ថកិច្ចដកបានឡូឡាយ៉ាងខែងរែងច្រងេងច្រងាងដាក់មន្ត្រីនគរបាលក្រុងមិនតិចឡើយ ដោយអំណាចសុរា ព្រោះតែមិនចង់ឲ្យសមត្ថកិច្ចដកហូតម៉ូតូគេ ដោយគេសួថា តើគេខុសអី..!! ហើយក្រោយពេលសមត្ថកិច្ចដកហូតរួចមក រូបគេបានហៅបក្ខពួកជាច្រើននាក់ជិះម៉ូតូក្រវែលអធិការដ្ឋាននគរបាលក្រុងដៀមដាមឲ្យសមត្ថកិច្ចចង់បង្ករឿងទៀតផង។
លោកអធិការបញ្ជាក់ឲ្យដឹងថា កំហុសរបស់គេគឺ ទី១-ស្រវឹងក្នុងពេលបើកបរ ទី២-កែច្នៃម៉ូតូខុសបច្ចេកទេសមិនធានាសុវត្ថិភាពក្នុងពេលបើកបរ ដែលម៉ូតូបែបនេះក្នុងច្បាប់មិនអាចធ្វើចរាចរណ៍លើផ្លូវជាតិបានឡើយ៕
( ឈៀង ថារិទ្ធ )
0 Comments