កំពង់ឆ្នាំង ៖ មនុស្សម្នាក់បានស្លាប់ និង៥នាក់ទៀតរងរបួសធ្ងន់និងស្រាល នៅក្នុងគ្រោះថ្នាក់ចរាចរណ៍២ករណីនៅកន្លែងផ្សេងគ្នានៅក្នុងចន្លោះពេលតែមួយម៉ោងប៉ុណ្ណោះ នៅយប់ថ្ងៃទី១៦ ខែមករា ឆ្នាំ២០១៤ ក្នុងឃុំ២ នៅស្រុកបរិបូណ៌ ខេត្តកំពង់ឆ្នាំង។
សមត្ថកិច្ចនគរបាលស្រុកបរិបូណ៌បានឲ្យដឹងថា ករណីទី១-បានកើតឡើងនៅវេលាម៉ោង៧និង៣០នាទីយប់ នៅលើកំណាត់ផ្លូវជាតិលេខ៥២អា ចំណុចមុខវត្តអណ្ដូងរវាង ក្នុងភូមិអញ្ចាញរូង ឃុំអញ្ចាញរូង រវាងម៉ូតូលក់ការ៉េមកីកង់បី និងរថយន្តមិនស្គាល់ម៉ាក។ ដោយមុនពេលកើតហេតុមានម៉ូតូលក់ការ៉េមកីកង់បីមួយគ្រឿង បើកបរដោយបុរសឈ្មោះ សៀម ថុល អាយុ៣៣ឆ្នាំ មានស្រុកកំណើតនៅខេត្តកណ្តាល មកស្នាក់នៅភូមិផ្សារ ឃុំផ្សារ ស្រុកបរិបូណ៌ បានបើកតាមបណ្តោយផ្លូវជាតិលេខ៥៣( ជាផ្លូវក្រាលគ្រួសក្រហម) ជិះពីលិចមកកើត ស្រាប់តែមកដល់ចំណុចកើតហេតុមានរថយន្តទំនើប៣គ្រឿងមិនស្គាល់ម៉ាក បានបើកមកពីក្រោយក្នុងដំណើរស្របទិសគ្នា លុះពេលមកដល់ចំណុចកើតហេតុ រថយន្តទី១-បើកគេចម៉ូតូកង់បីផុតទៅ ចំណែករថយន្តទី២-ដោយសារដីហុយខ្លាំងពេកមើលគ្នាមិនឃើញក៏ទៅបុកម៉ូតូកង់បីបណ្ដាលឲ្យធ្លាក់ចូលប្រឡាយ ចំណែករថយន្តបង្កបានជ្រុលទៅបុកនឹងម៉ូតូម៉ាកឌ្រីមមួយគ្រឿងទៀតដែលមានមនុស្សជិះ៣នាក់ រងរបួសស្រាល។
ក្រោយពេលកើតហេតុរថយន្តបង្កមិនបានឈប់ទេ គឺបើកគេចមកលើផ្លូវជាតិលេខ៥បាត់ស្រមោលតែម្តង។ ក្នុងហេតុការណ៍នេះអ្នកបើកម៉ូតូកង់បីលក់ការ៉េមកីរងរបួសធ្ងន់ និងដាច់ប្រដាប់ភេទទៀតផង ត្រូវបានដឹកមកសង្គ្រោះនៅមន្ទីរពេទ្យខេត្ត ចំណែកអ្នកជិះម៉ូតូ៣នាក់ទៀត បានរងរបួសស្រាល មាន១-ឈ្មោះ ផាន់ សុជាតិ អាយុ២២ឆ្នាំ ២-ឈ្មោះ លី ចាន់ អាយុ២៤ឆ្នាំ និង៣-ឈ្មោះ ហោង វិជ្ជា អាយុ៣៣ឆ្នាំ បុរសទាំង៣នាក់មានទីលំនៅភូមិអញ្ចាញរូង។
ករណីទី២-បានកើតឡើងនៅវេលាម៉ោង៨និង៣០នាទីយប់ ថ្ងៃដដែល នៅលើផ្លូវលំក្នុងភូមិអូរ ឃុំ ពន្លៃ ខណៈដែលបុរសម្នាក់ឈ្មោះ ស៊ុយ សុខុម អាយុ៣៣ឆ្នាំ មានទីលំនៅភូមិអូរ ឃុំពន្លៃ បានត្រឡប់ពីបើករថយន្តឲ្យគេវិញ បានជិះម៉ូតូរបស់ខ្លួនម៉ាកសង់កូរ៉េ គ្មានស្លាកលេខ គ្មានភ្លើង ត្រឡប់មកផ្ទះវិញ ពេលមកដល់ចំណុចកើតហេតុដោយសារគ្មានភ្លើងបំភ្លឺបានទៅបុកបុរសម្នាក់ឈ្មោះ សៀន សរ អាយុ៦៨ឆ្នាំ កំពុងជិះកង់បណ្ដាលឲ្យរងរបួសស្រាល ចំណែកអ្នកបើកម៉ូតូបានបោកក្បាលទៅថ្នល់ក្រាលគ្រួសក្រហម បណ្ដាលឲ្យរងរបួសធ្ងន់ ហើយបានស្លាប់ពេលបញ្ជូនទៅសង្គ្រោះនៅមន្ទីរខេត្ត។
ករណីទាំង២ខាងលើនេះ សមត្ថកិច្ចនគរបាលស្រុកបរិបូណ៌បានយកមធ្យោបាយទាំងអស់ទៅរក្សាទុកនៅអធិការដ្ឋាននគរបាលស្រុកដើម្បីស្រាវជ្រាវដោះស្រាយការតាមនីតិវិធីច្បាប់៕
( ឈៀង ថារិទ្ធ )
0 Comments