ភ្នំពេញ ៖ យោងតាមរបាយការណ៍ពីនាយកដ្ឋានសណ្ដាប់ធ្នាប់នៃអគ្គស្នងការដ្ឋាននគរបាលជាតិបានឲ្យដឹងថា កាលពីថ្ងៃទី១៨ ខែមករា ឆ្នាំ២០១៥នេះ មានករណីគ្រោះថ្នាក់ចរាចរណ៍នៅទូទាំងប្រទេសបានកើតឡើងចំនួន១៧លើក (យប់១២លើក) បណ្ដាលឲ្យមនុស្សស្លាប់១១នាក់ (ស្រី០២នាក់), របួសធ្ងន់១១នាក់ (ស្រីម្នាក់) និងរបួសស្រាល១៤នាក់ (ស្រី០៣នាក់)។
នៅក្នុងហេតុការណ៍គ្រោះថ្នាក់ចរាចរណ៍ទាំង១៧លើកនេះ បានបង្កឲ្យមានការខូចខាតយានយន្តសរុប២៦គ្រឿង ក្នុងនោះមានម៉ូតូចំនួន១៧គ្រឿង, រថយន្តធុនតូចចំនួន០៣គ្រឿង, រថយន្តធុនធំចំនួន០៥គ្រឿង និងយានផ្សេងៗចំនួន០១គ្រឿង។
តាមរបាយការណ៍បន្តថា មូលហេតុដែលបណ្ដាលឲ្យកើតមានករណីគ្រោះថ្នាក់ចរាចរណ៍ គឺបណ្ដាលមកពីកត្តាល្បឿន០៨លើក, ប្រជែងគ្រោះថ្នាក់០៤លើក, បត់គ្រោះថ្នាក់០១លើក, ស្រវឹង០២លើក, បើកបរងងុយដេក០១លើក និងកត្តាយានយន្ត០១លើក ក្នុងនោះអ្នកជិះម៉ូតូគ្រោះថ្នាក់ដោយមិនបានពាក់មួកសុវត្ថិភាពចំនួន២២នាក់ (យប់១៤នាក់)។
ប្រភពព័ត៌មានពីនាយកដ្ឋានសណ្ដាប់ធ្នាប់នៃអគ្គស្នងការដ្ឋាននគរបាលជាតិប្រាប់ឲ្យដឹងថា រថយន្តដែលត្រូវផាកពិន័យនៅអង្គភាពកាលពីថ្ងៃទី១៨ ខែមករា ឆ្នាំ២០១៥នេះ សរុបចំនួន១០៤គ្រឿង ក្នុងនោះមាន រថយន្តទេសចរណ៍គ្រួសារ០១គ្រឿង, រថយន្តដឹកអ្នកដំណើរធុនតូច៣០គ្រឿង, រថយន្តដឹកទំនិញធុនតូចចំនួន០៥គ្រឿង និងរថយន្តដឹកទំនិញធុនធំចំនួន៦៨គ្រឿង។ រថយន្តទាំងអស់ត្រូវបានបង់ប្រាក់ពិន័យរួចរាល់នៅអធិការដ្ឋាននគរបាលស្រុកចំនួន០៩គ្រឿង និងនៅស្នងការដ្ឋាននគរបាលខេត្តចំនួន៩៥គ្រឿង។
ដោយឡែកម៉ូតូត្រូវបានពិន័យសរុបចំនួន៥៨៥គ្រឿង ក្នុងនោះមាន ជិះម៉ូតូអត់ពាក់មួកចំនួន ៣៦៧គ្រឿង, ជិះម៉ូតូអត់ដាក់កញ្ចក់ចំនួន២០៨គ្រឿង, ជិះម៉ូតូអត់មួកនិងកញ្ចក់ចំនួន០៥គ្រឿង, ជិះម៉ូតូមានជាតិស្រវឹងចំនួន០៣គ្រឿង, ល្មើសសញ្ញាចរាចរណ៍ចំនួន០១គ្រឿង និងម៉ូតូបើកភ្លើងពេលថ្ងៃ ០១គ្រឿង។ ម៉ូតូទាំងអស់ត្រូវបានបង់ប្រាក់ពិន័យរួចរាល់នៅអធិការដ្ឋាននគរបាលស្រុកចំនួន៥៤៨គ្រឿង និងនៅស្នងការដ្ឋាននគរបាលខេត្តចំនួន៣៧គ្រឿង៕
រ៉ាវុទ្ធ
0 Comments