ប្រធានាធិបតីចិន លោកស៊ី ជិនពីង បានបញ្ជាឲ្យមានការស៊ើបអង្កេតមួយនៅក្នុងការរត់ជាន់គ្នានៅយប់ថ្ងៃចូលឆ្នាំថ្មី នៅក្រុងសៀងហៃដែលបានធ្វើឲ្យស្លាប់មនុស្ស៣៦នាក់ និងធ្វើឲ្យរបួស៤៧នាក់។
ការរត់ជាន់គ្នានោះបានកើតឡើងនៅទីលាន Chenyi Square នៅក្នុងសង្កាត់បាន់ ជាកន្លែងដែលក្រុមមនុស្សកុះករប្រមូលផ្ដុំគ្នារង់ចាំខោនដោន (ការរាប់ពេលថយក្រោយ)។
សារព័ត៌មានរដ្ឋនិយាយថា ការចេញមកខាងក្រៅប្រមូលផ្ដុំគ្នា មានចំនួនច្រើនជាងការដែលគេបានព្យាករ ហើយប៉ូលិសសៀងហៃនិយាយថា ពួកគេសោកស្ដាយចំពោះការដែលគេមិនបានធ្វើអន្ដរាគមន៍ទាន់ពេលវេលា។ ប៉ូលិសកំពុងធ្វើការសើុបអង្កេតថា តើអ្វីដែលបង្កឲ្យមានការរត់ជាន់គ្នានោះ។ រដ្ឋាភិបាលបានលុបចោលពិធីបុណ្យថ្ងៃចូលឆ្នាំថ្មី នៅក្រុងសៀងហៃ។
សារព័ត៌មានរដ្ឋបានរាយការណ៍ថា លោកសីុ ជិនពីង បាននិយាយប្រាប់ពួកមន្ដ្រីក្រុងសៀងហៃ ឲ្យធ្វើការពន្យល់មួយពីការស្លាប់នៅថ្ងៃពុធឆាប់ៗតាមដែលអាចធ្វើទៅបាន ហើយនិងធ្វើការប្រឹងប្រែងឲ្យអស់សមត្ថភាពដើម្បីព្យាបាលអ្នករបួស។
លោកស៊ីបានបន្ថែមទៀតថា ពួកមន្ដ្រីក្នុងស្រុកនៅជុំវិញប្រទេសចិន ត្រូវតែធានាឲ្យបានថា នឹងមិនអាចកើតមានដូចឧប្បត្ដិហេតុនៅសៀងហៃ នៅកន្លែងដទៃទៀតនៅក្នុងអំឡុងពេលពិធីបុណ្យចូលឆ្នាំតាមចន្ទគតិនាពេលខាងមុខនោះទៀតទេ៕
រឹទ្ធ
0 Comments