បន្ទាយមានជ័យ ៖ កង់ជជុះរបស់ប្រទេសជប៉ុនចំនួន៤០០គ្រឿង ដែលជាអំណោយដ៏ថ្លៃថ្លារបស់អង្គការក្រៅរដ្ឋាភិបាល"កុគីសៃ" ប្រទេសជប៉ុន តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបន្ទាយមានជ័យ បានយកមកចែកជូនសិស្សក្រីក្រកូនជនពិការ មណ្ឌលភ្នំឆ័ត្រ និងមណ្ឌលកុមារកំព្រានៅព្រឹកថ្ងៃទី១៩ ខែមករា ឆ្នាំ២០១៥ នៅមជ្ឈមណ្ឌលជីវិតថ្មីភ្នំបាក់ ភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។ ដែលពិធីនេះមានការចូលរួមលោក នឹមថូត រដ្ឋលេខាធិការក្រសួងសង្គមកិច្ចអតីតយុទ្ធជន និងយុវនីតិសម្បទា លោកស្រី កិម គឹមឡាងអគ្គនាយកអង្គការអាស៊ីអាស្ពេកាប្រចាំប្រទេសកម្ពុជា លោក យុន វុទ្ធី ជាប្រធានមន្ទីរសង្គមកិច្ចអតីតយុទ្ធជននិង យុវនីតិសម្បទាខេត្តបន្ទាយមានជ័យ ព្រមទាំងសិស្សក្រីក្រចំនួន២០០នាក់ ដែលបានចូលរួមនៅទីនេះផងដែរ។ ថ្លែងក្នុងពិធីនេះលោក យុន វុទ្ធី បានមានប្រសាសន៍ថា ដោយមើលឃើញជនក្រីក្រនិង កុមារកំព្រានៅខេត្តបន្ទាយមានជ័យមានច្រើន ហើយគ្មានមធ្យោបាយធ្វើដំណើរទៅសាលារៀនភាគច្រើនក្មេងក្រីក្រនោះដើរទៅរៀន ទើបអង្ការអាស៊ីអាស្ពេការបាននាំយកកង់ជជុះរបស់ប្រទេសជប៉ុនយកមកចែកជូនក្មេងក្រីក្រជាបន្តបន្ទាប់។ ជាក់ស្តែងនៅថ្ងៃនេះអង្គការអាស៊ីអាស្ពេការដែលដឹកនាំដោយលោកស្រី កិម គឹមឡាង បានយកកង់ចំនួន៤០០គ្រឿងយកមកចែកជូនដល់កូនជនពិការក្រីក្រ នៅមណ្ឌលភ្នំឆ័ត្រ និងមណ្ឌលកុមារកំព្រា។
លោកបានបន្តថា ការយកកង់មកចែកជូនដល់កុមារកំព្រានេះ មានចំនួន២លើករួចមកហើយហើយមណ្ឌលភ្នំឆ័ត្របានទទួលកងចំនួន២០០គ្រឿង កូនជនពិការក្រីក្រឲ្យបានទទួលកង់ចំនួន១០៥គ្រឿង ចំណែកមណ្ឌលកុមារកំព្រាបានទទួលកង់៩៥គ្រឿង។
លោកបានបន្តថា ប្អូនៗពេលបានទទួលកង់ហើយ ត្រូវចេះថែរក្សាឲ្យបានគង់វង្ស មិនត្រូវជិះបណ្ដើរគ្នាទាំងហ្វូងៗឡើយ ព្រោះវាអាចឲ្យមានគ្រោះថ្នាក់ចរាចរជាយថាហេតុបានយ៉ាងងាយ ហើយអាចឲ្យប្អូនៗ ត្រូវបោះបង់ការសិក្សាចោលទៀតផង។
លោកស្រី កិម គឹមឡាង ជាម្ចាស់ជំនួយបានធ្វើការផ្តាំផ្ញើដល់ក្មេងៗក្រីក្រ និងកូនជនពិការថាក្រោយពីទទួលបានកង់ហើយនោះ ត្រូវចេះថែរក្សាឲ្យបានល្អ ហើយត្រូវខិតខំរៀនសូត្រដើម្បីឲ្យក្លាយជាក្មេងល្អ សិស្សល្អ ពលរដ្ឋល្អ ពិសេសប្អូនៗនឹងក្លាយទៅជាទំពាំងដែលត្រូវស្នងឫស្សីនៅពេលខាងមុខនេះ៕
គង្គា
![](https://www.pinterest.com/pin/create/button/?url=https://cambodia-breaking-news.blogspot.com/2015/01/blog-post_187.html&media=https://blogger.googleusercontent.com/img/b/R29vZ2xl/AVvXsEiitPIjNQrOhl7jb80HfzevOTxYfAoSfWRBAFuVpZuytpSfxWxh5e2shChMKiZkRjrqJus76kstTrR9Fi6r28zOWLAUwVaRb5G9yOicwqKJikRqgEzyOCj9Z5RZIXqvqLNr7n3NI6-2BNc/s320/Pisey-19-01-2015-full-R-761927.jpg&description=សិស្សក្រីក្រកូនជនពិការមណ្ឌល"ភ្នំឆ័ត្រនិងមណ្ឌលកុមារកំព្រា" បានទទួលអំណោយកង់ចំនួន៤០០គ្រឿងពីអង្គការក្រៅរដ្ឋាភិបាល"កុគីសៃ"ប្រទេសជប៉ុន){kind=link}
0 Comments