ភ្នំពេញ ៖ ប្រព័ន្ធប្រឡាយរំដោះទឹកប៉ែកខាងត្បូងរាជធានីភ្នំពេញ ត្រូវបានអ្នកមានអំណាច និងមានប្រាក់រំលោភយកធ្វើជាកម្មសិទ្ធិ ដោយកន្លែងខ្លះប្រឡាយរំដោះទឹកនេះត្រូវបានគេរំលោភយកស្ទើរតែបាត់រូបរាងនឹងកន្លែងខ្លះបានរួមតូចដែលត្រូវស្តា និងពង្រីក ដើម្បីរំដោះទឹកនៅពេលមានភ្លៀងធ្លាក់ម្តងៗ។
ជុំវិញបញ្ហានេះដើម្បីជំរុញឲ្យមានដំណោះស្រាយក្នុងកិច្ចការពារប្រឡាយរំដោះទឹកនេះឡើងវិញ លោកអៀង អូនី អភិបាលរង រាជធានីភ្នំពេញ បានដឹកនាំមន្ត្រីមន្ទីរជំនាញ និងសមត្ថកិច្ចពាក់ព័ន្ធ រួមនឹងអាជ្ញាធរដែនដីចុះពិនិត្យ និងកំណត់អ័ក្សប្រឡាយឲ្យបានត្រឹមត្រូវ ក្នុងនោះរួមមានប្រឡាយព្រែកហា,ស្ពានទួលពង្រដល់ស្ពានចំការដូង ដែលកន្លងមកសាលារាជធានីភ្នំពេញ បានធ្វើការសិក្សារួចហើយ ក្នុងការលើកគំរោងស្តារប្រឡាយទាំងនោះ។ ជាមួយគ្នានេះប្រព័ន្ធប្រឡាយ ដង្កោ, ប្រឡាយភូមិម័ល,និង ប្រឡាយផ្សេងៗទៀតក៏ត្រូវស្តារផងដែរ។
ទីតាំងប្រឡាយឬចំណីប្រឡាយត្រូវបាន ប្តូរ ទៅជាបុរី ឬផ្ទះល្វែងជាបន្តបន្ទាប់ ជាមួយនិងបញ្ហា នេះលោកអៀង អូនី បានណែនាំដល់មន្ត្រីពាក់ព័ន្ធអង្គភាពចំនួន៤ក្នុងនោះ មាន អង្គភាពលូទឹក នៃមន្ទីរសាធារណៈការ និងដឹកជញ្ជូនរាជ ធានីភ្នំពេញ,ការិយាល័យ រៀបចំក្រុង,មន្ទីរធនធានទឹកនិង ឧតុនិយម,មន្ទីររៀបចំដែនដីនគរូបនីយកម្ម និងសំណង់ ត្រូវចេញដីកាការពារប្រឡាយទាំងអស់នោះ ដោយត្រូវកំណត់អ័ក្ស ប្រឡាយ និងទំហំប្រឡាយ ឲ្យបានច្បាស់លាស់ និងសិក្សាឲ្យបានម៉ត់ចត់ដើម្បីស្តារប្រឡាយ ទាំងអស់នេះឲ្យ បានល្អប្រសើរ ហើយមន្ទីរពាក់ព័ន្ធទាំងអស់ត្រូវលើកគំរោងស្តារប្រឡាយខាងលើជា ជំហ៊ានៗដើម្បីបើកមុខទឹកឲ្យហូរបានលឿនទាន់នៅរដូវប្រាំង។
ជាមួយគ្នានោះដែរប្រព័ន្ធប្រឡាយនៅប៉ែកខាងជើងរាជធានីភ្នំពេញ ក៏ត្រូវមន្ត្រីជំនាញដឹកនាំដោយ លោក នៅ សារឿន ធ្វើការពិនិត្យ និងសិក្សាផងដែរ ដើម្បីស្តានៅក្នុងដើមឆ្នាំ ២០១៥នេះ។ បើតាម ការចុះពិនិត្យជាក់ស្តែងប្រឡាយនៅប៉ែកខាងជើងក៏ត្រូវបានគេរំលោភយកធ្វើជាកម្មសិទ្ធិផ្ទាល់ខ្លួន ឲ្យរួមតូចផងដែរ ដែលតម្រូវឲ្យមន្ត្រីពាក់ព័ន្ធទាំងអស់ត្រូវរួមគ្នាដុតដៃជើង ដើម្បីមានវិធានការ តែបើនៅតែបែបនេះភាពលិចលង់រាជធានីនៅតែបន្តកើតមានដដែលជាដដែល៕
0 Comments