ឧត្តរមានជ័យ ៖ បុរសម្នាក់មិនដឹងថាខូចចិត្តរឿងអ្វីឬជាខឹងរឿងអ្វីនោះទេ បានសម្រេចចិត្តចងក ធ្វើអត្តឃាតសម្លាប់ខ្លួនឯងដោយខ្សែអង្រឹងព្យួរនឹងដើមពង្រនៅខាងលិចផ្ទះ ដែលមានចម្ងាយ៥០ម៉ែត្រ បណ្ដាលឲ្យស្លាប់ដោយពុំដឹងមូលហេតុ។ ហេតុការណ៍ដែលបុរសម្នាក់សម្រេចចិត្តចងកធ្វើអត្តឃាតសម្លាប់ខ្លួនឯងនេះ បានកើតឡើងកាលពីវេលាម៉ោង១៦និង៥០នាទីល្ងាច ថ្ងៃទី១៦ ខែមករា ឆ្នាំ២០១៥ នៅចំណុចកើតហេតុខាងលើ ស្ថិតនៅក្នុងភូមិថ្មី ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។ លោក ស៊ីម វណ្ណះ អធិការនគរបាលស្រុកបានឲ្យកម្ពុជាថ្មីដឹងថា បន្ទាប់ពីទទួលបានព័ត៌មានថាមានករណីបុរសម្នាក់ចងកធ្វើអត្តឃាតសម្លាប់ខ្លួនឯងនោះ លោកអធិការនគរបាលស្រុកបានចាត់តាំងកម្លាំងសមត្ថកិច្ចជំនាញនិងប៉ុស្តិ៍ ចុះទៅត្រួតពិនិត្យកន្លែងកើតហេតុភ្លាមៗផងដែរ ឃើញថាជនរងគ្រោះបានសម្លាប់ខ្លួនឯងដោយសារចងកពិតប្រាកដមែន។ ហើយបុរសដែលធ្វើអត្តឃាតដោយចងកសម្លាប់ខ្លួននោះមានឈ្មោះ ង៉ែត រ៉ន ភេទប្រុស អាយុ៤១ឆ្នាំ រស់នៅភូមិ/ឃុំខាងលើ ហើយនៅពេលបច្ចុប្បន្នសមត្ថកិច្ចជំនាញ និងប៉ុស្តិ៍ឃុំបានប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕
(ដោយចាន់ ធី)
0 Comments