ភ្នំពេញ ៖ បាំងបែងចែកទ្រូងផ្លូវចំនួន១២កង់ បានទទួលរងការខួចខាត ក្រោយពីមានរថយន្តលុចស៊ីសមួយគ្រឿង សង្ស័យម្ចាស់វាស្រវឹងធ្លាក់បើកមកបុកយ៉ាងពេញទំហឹងនោះ ហើយក្រោយពេលកើតហេតុអ្នកបើកបររថយន្តបង្កគេចខ្លួនបាត់ស្រមោលភ្លាមដែរ។
ហេតុការណ៍គ្រោះថ្នាក់ចរាចរខាងលើនេះ បានកើតមានឡើងកាលពីរាត្រីថ្ងៃទី១៦មករាឆ្នាំ២០១៥វេលាម៉ោងប្រមាណ៩និង៨០នាទី នៅចំណុចមុខយានដ្ឋានតុង ហ៊ូ ហ្គាស៍ ផ្លូវ២៧១ សង្កាត់ទឹកល្អក់ទី៣ ខណ្ឌទួលគោក។
រថយន្តបង្កត្រូវបានគេដឹងថា ជាប្រភេទរថយន្តលុចស៊ីស RX៣០០ពណ៌ឈាមជ្រូក ពាក់ស្លាកលេខភ្នំពេញ2N 2403 មិនបានដឹងថា បើកបរដោយបុរសឬស្ត្រីនោះទេ ព្រោះក្រោយពេលកើតហេតុបានរត់គេចខ្លួនបាត់។
មន្ត្រីប៉ូលិសបានឲ្យដឹងថា នៅមុនពេលកើតហេតុគេបានឃើញរថយន្តបង្កខាងលើបានបើកបរបោះពួយយ៉ាងលឿនតាមបណ្តោយផ្លូវ២៧១ក្នុងទិសដៅពីត្បូងមកជើង លុះបើកបរមកដល់ចំណុចកើតហេតុ សង្ស័យម្ចាស់វាស្រវឹងធ្លាក់ភ្នែក ក៏បានរេចង្កូតមកបុករបាំងពុះចែកទ្រូងផ្លូវយ៉ាងពេញទំហឹងតែម្តង ហើយក្រោយពេលកើតហេតុអ្នកបើកបររថយន្តបង្កក៏បានគេចខ្លួនបាត់ស្រមោលភ្លាមដែរ។
បច្ចុប្បន្នរថយន្តបង្ក ត្រូវបានប៉ូលិសស្ទូចមករក្សាទុកនៅការិយាល័យចរាចរជើងគោករាជធានីភ្នំពេញ ដើម្បីដោះស្រាយសងទ្រព្យសម្បត្តិរដ្ឋទៅតាមច្បាប់៕
0 Comments