ការពារ​ជាតិ​ និង ​គីរីវង់ ​ជាប់​លេខ​ក្នុង​មណ្ឌល​ភ្នំពេញ

ភ្នំពេញ ៖ ព្រឹត្តិការណ៍ Hun Sen-Cup វគ្គ​ជម្រុះ​ក្នុង​ពូល សម្រាប់​មណ្ឌល​រាជធានី​ភ្នំពេញ គិត​ត្រឹម​ល្ងាច​ថ្ងៃទី​១១​ ខែ​មករា គឺ​បាន​រក​ឃើញ​ក្រុម​ដែល​ជាប់​លេខ​១​ក្នុង​ពូល​ទាំងពីរ​ហើយ គឺ​ក្រុម​ការពារ​ជាតិ​ស្ថិត​នៅ​កំពូល​នៃ​ពូ​ល A និង គីរីវង់​សុខ​សែន​ជ័យ​ស្ថិតនៅ​កំពូល​នៃ​ពូ​ល​B ។ ក្រុម​ទាំងពីរ​នេះ ត្រូវ​បាន​ឡើង​ទៅ​វគ្គ​១៦​ក្រុម​ ក្រុម​ចុងក្រោយ​ខណៈ​ដែល​មួយ​ក្រុម​ទៀត ​សម្រាប់​មណ្ឌល​រាជធានី​ភ្នំពេញ​នេះ​ដែរ រក​មិនទាន់​ឃើញ​រវាង​ក្រុម​ព្រែកជ័យ​កីឡា និង​ក្រុម Albirex Niigata ។ ពីរ​ក្រុម​ ព្រែក​ជ័យ​កីឡា និង​ក្រុម Albirex Niigata ដែល​ជាប់​លេខ​២​ក្នុង​ពូ​ល​ដូច​គ្នា​នេះ​ ត្រូវ​ប្រជែង​គ្នា ក្រុម​ណា​ឈ្នះ​នឹង​ជាប់​លេខ​៣​បាន​ឡើង​ទៅលេង​បន្ត ហើយ​ក្រុម​ណា​ចាញ់​នឹង​ជ្រុះ​ធ្លាក់​ហាលអាវ។​

គួរ​បញ្ជាក់​ថា ក្នុង​ការ​ប្រកួត​ចុងក្រោយ​នៃ​ពូ​ល A ក្រុម​អាកាសចរ​ស៊ីវិល​ចាញ់​ក្រុម​ព្រែក​ជ័យ​កីឡា​១​ទល់​៦។ សម្រាប់​ពូ​ល A នេះ​ មានតែ​៣​ក្រុម​ប៉ុណ្ណោះ ​គឺ​ក្រុម​ការពារ​ជាតិ​ ស្ថិតនៅ​កំពូល​តារាង​ដោយ​២​ប្រកួត​ឈ្នះ​ទាំង​២​ប្រកួត​បាន​៦​ពិន្ទុ។ ក្រុម​ព្រែក​ជ័យ​កីឡា​របស់​ខណ្ឌ​ច្បារអំពៅ​២​ប្រកួត​ឈ្នះ​១​ប្រកួត​ចាញ់​១​ប្រកួត​មាន​៣​ពិន្ទុ​លេខ​២​ក្នុង​ពូល។ ក្រុម​អាកាសចរ​ស៊ី​វិល​២​ប្រកួត​ចាញ់​ទាំង​២​ប្រកួត​ពិន្ទុ​០​នៅ​បាត​តារាង។​

ចំពោះ​ពូ​ល B ដែល​មាន​៤​ក្រុម​នោះ គីរីវង់​សុខ​សែន​ជ័យ​ស្ថិតនៅ​កំពូល​តារាង​ដោយ​៣​ប្រកួត​ឈ្នះ​ទាំង​៣​ប្រកួត មាន​៩​ពិន្ទុ។ Albirex Niigata ស្ថិតនៅ​លំដាប់​លេខ​២​ដោយ​៣​ប្រកួត​ឈ្នះ​២​ប្រកួត​ចាញ់​១​ប្រកួត​មាន​៦​ពិន្ទុ ​ខណ្ឌ​ជ្រោយចង្វា​៣​ប្រកួត​ឈ្នះ​១​ប្រកួត​ ចាញ់​២​ប្រកួត​មាន​៣​ពិន្ទុ​ ស្ថិតនៅ​ចំណាត់​ថ្នាក់​លេខ​៣ និង ខណ្ឌ​ទួលគោក​ ដែល​ស្ថិតនៅ​បាត​តារាង​នោះ​៣ ប្រកួត​ចាញ់​ទាំង​៣​ប្រកួត សម្រាប់​មណ្ឌល​ផ្សេងៗ ក្រុម​ដែល​ត្រូវ​ឡើង​មក​លេង​វគ្គ​១៦​ក្រុម​ចុងក្រោយ​ដែរ​នោះ ក៏​កំពុង​ជិត​រក​ឃើញ​ដែរ។ ក្នុង​នោះ​សម្រាប់​តំបន់​ខាងកើត ខេត្តព្រៃវែង និង ខេត្ត​ត្បូងឃ្មុំ​ត្រូវ​ប្រជែង​គ្នា​ដណ្ដើម​កៅអី​សម្រាប់​វគ្គ​១៦​ក្រុម​ចុងក្រោយ។ ក្រុម​ទាំង​២​នេះ​ក្រុម​ណា​ឈ្នះ​បាន​ឡើង ហើយ​ក្រុម​ចាញ់​គឺ​ត្រូវ​ដើរ​ចេញពី​ការប្រកួត។ ចំណែក​ខេត្តកណ្តាល​ខ្ទាត​ចេញពី​ការប្រកួត​ជា​ស្ថាពរ​ហើយ បន្ទាប់ពី​ប្រកួត​ចាញ់​ខេត្តព្រៃវែង​២​ទល់​៤​ ហើយ​ចុង​ក្រោយនេះ​ចាញ់​ខេត្ត​ត្បូងឃ្មុំ​១​ទល់​៥​ទៀត​នោះ។

ចំពោះ​តំបន់​កណ្ដាល​ដែល​មានតែ​២​ក្រុម ​គឺ​ខេត្តសៀមរាប និង កំពង់ធំ​នោះ ​តម្រូវ​ឲ្យ​ជួបគ្នា​២ ដង ហើយ​នៅក្នុង​ជំនួប​លើក​ទី​១​សៀមរាប​ឈ្នះ​កំពង់ធំ​១​ទល់​០ និង ជំនួប​លើក​ទី​២​លេង​ស្មើគ្នា​០ ទល់​០​។ ខេត្តសៀមរាប​បាន​ឡើង​លេង​បន្ត​វគ្គ​១៦​ក្រុម​ចុងក្រោយ ឯ​ខេត្តកំពង់ធំ​ហាលអាវ​ត្រឹមនេះ​។​

​ តំបន់​ខាងត្បូង​ដែល​មានតែ​២​ក្រុម​ គឺ​ខេត្តកំពត និង តាកែវ​នោះ ក៏​តម្រូវ​ឲ្យ​ជួបគ្នា​២​ដង​ដែរ​។ ជំនួប​លើក​ទី​១ កំពត​ឈ្នះ​តាកែវ​៣​ទល់​០ និង ជំនួប​លើក​ទី​២​កំពត​ឈ្នះ​តាកែវ​ម្ដង​ទៀ​ក្នុង​លទ្ធផល​២ ទល់​១​។​ ដូច្នេះ​កំពត​បាន​ឡើង​លេង​វគ្គ​១៦​ក្រុម​ចុងក្រោយ​៕

​វិ​សិទ្ធ​(​រូប​៣)