វ៉ន វីវ៉ា និង ​ផាន់​គ្រាន់​ឈ្នះ ខណៈ​ដែល​ ឈាន ​ហុង​ចាញ់​

ភ្នំពេញ ៖ អ៊ុំ ចំរើន ​ផ្ដួល​សោម​ តឿ​ទី​ទឹក​ទី​២ ឯ​ឡេះ​តើក ​ឈ្នះ​បឺត សំរេច​អ្នក​ប្រដាល់​ជើង​ខ្លាំង​របស់​កម្ពុជា វ៉ន វីវ៉ា ក្លឹប​ព្រះ​ខ័ន​រាជ បាន​ផ្ដួល​អ្នក​ប្រដាល់​ថៃ Chea Rasak នៅ​ទឹក​ទី​៤ ក្នុង​ការ​ប្រកួត​គ្នា​ជា​លក្ខណៈ​មិត្តភាព​អន្តរជាតិ ក្នុង​កម្មវិធី​ប្រដាល់​ទេសចរណ៍​របស់​SEA-TV នៅ​សង្វៀន​ប៉ោយប៉ែត​នា​យប់​ថ្ងៃទី​១០ ខែ​មករា ឆ្នាំ​២០១៥​នោះ។​

Chea Rasak ពី​ដំបូង​គេ​វាយ​មិន​ញញើត​ឡើយ ដោយ​បាន​វាយ​ច្រាស​សង​ទៅលើ​វ៉ន វីវ៉ា វិញ​ភ្លាមៗ ទាំង​កណ្ដាប់ដៃ ទាំង​ការ​ទាត់​ចេញ ដែល​មើលទៅ​ហាក់ដូចជា​គួរសម​ដែរ។ តែ​នៅក្នុង​ទឹក​ទី​៣ Chea Rasak ត្រូវ ​វីវ៉ា ​វាយ​ត្រូវ​ច្រើន​ និង​ដួល​ច្រើន​ទៀត​ផង ដែល​ធ្វើ​ឲ្យ​គេ​ចាញ់​ប្រៀប​ឈ្នះ​របស់​វីវ៉ា។ ចូល​ដល់​ទឹក​ទី​៤ Chea Rasak បាន​ព្យាយាម​វាយ​ប្ដូរ​កែង​ជាមួយ​វីវ៉ា តែ​វីវ៉ា មិន​មែន​ជា​អ្នក​ប្រដាល់​ដែល​ងាយ​បំបាក់​បាន​ឯណា ក៏​ត្រូវ ​វីវ៉ា​ វាយ​ច្រាស​សង​កែង​វិញ ហើយ​ថែមទាំង​ប្រលែង​ជង្គង់​ទៅ​បន្ថែម​ទៀត​ធ្វើឲ្យ​ Chea Rasak បោះបង់​ការប្រកួត ក្រោយពី​អាជ្ញាកណ្ដាល​រាប់​គេ​ដល់​១០​ហើយ​នោះ។ អាច​ចាត់​ទុក​ជា​សំណាង​របស់ Chea Rasak​ហើយ ដែល​វ៉ន វីវ៉ា​បាន​បណ្ដែត​មកដល់​ទឹក​ទី​៤ ទើប​ផ្ដួល​នោះ ព្រោះ​ការប្រកួត​មុនៗ​កន្លងមក​ជាមួយ​អ្នក​ប្រដាល់​ថៃ​នេះ វីវ៉ា​ បញ្ចប់​ការប្រកួត​ត្រឹម​ទឹក​១​ឬ​ទឹក​ទី​២​ប៉ុណ្ណោះ។​

ផាន់ គ្រាន់ អ្នក​ប្រដាល់​ក្លឹប​គជសារ​កីឡា ប្រកួត​ឈ្នះ​អ្នក​ប្រដាល់​ថៃ​Thy Deth ដោយ​ពិន្ទុ​យ៉ាង​តឹងតែង​បន្ទាប់ពី​ប្រកួត ៥​ទឹក​នោះ។ ទោះជា​បែបនេះ​ក្តី ក៏​អាច​ចាត់ទុកថា​ ផាន់ គ្រាន់​គេ​វាយ​បាន​ល្អ​ដែរ ព្រោះ​គេ​ចាញ់​ទាំង​កម្ពស់​អ្នក​ប្រដាល់​ថៃ​នោះ​ទៅទៀត ហើយ​ស្នៀត​ប្រដាល់​របស់​ថៃ​នោះ ក៏​មិន​ជា​ក្រោម​ផាន់​គ្រាន់​ដែរ។​

ផាន់ គ្រាន់ គេ​វាយ​មិន​ញញើត​បន្តិច​ណា​ទេ គឺ​ដើរចូល​វាយ​មុន​ជានិច្ច​ដែល​ធ្វើ​ឲ្យ​អ្នក​ប្រដាល់​ថៃ Thy Deth ចង់​ញ៉ាក​មិនសូវ​ហ៊ាន​វាយ​រំលោភ​មក​លើ​ដែរ។ ចប់​ការប្រកួត អ្នក​ប្រដាល់​ថៃ Thy Deth ចាញ់​ដោយ​ពិន្ទុ។

ដោយឡែក ឈាន ហុង អ្នក​ប្រដាល់​ក្លឹប​កីឡា​ក្រសួងការពារជាតិ ប្រកួត​ចាញ់​ពិន្ទុ​អ្នក​ប្រដាល់​ថៃ Chea Sek ដោយ​ពិន្ទុ​ទាំង​មិន​អស់ចិត្ត។ ការប្រកួត​ដែល​ស្ថិត​ក្នុង​ស្ថានភាព​តឹងតែង​នោះ ឈាន ហុង​ចាញ់​ប្រៀប​អ្នក​ប្រដាល់​ថៃ​រូប​នេះ។ ឈាន ហុង ក្រោយពេល​ដឹងខ្លួន​ចាញ់​ប្រៀប​គូប្រកួត​នោះ គេ​បាន​ប្រើ​គ្រប់​កលល្បិច​ដើម្បី​ស្ដារ​ពិន្ទុ​ឡើងវិញ​តែ​ស្ដារ​មិន​រួច។​ ចប់​ទឹក​ទី​៥ ​ឈាន ហុង​ចាញ់ Chea Sek ដោយ​ពិន្ទុ​ទាំង​មិន​អស់ចិត្ត ។​

ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ​នោះ ពៅ ស៊ី​យ៉េត​ក្លឹប​ប៉ោយប៉ែត​កីឡា​ប្រកួត​ស្មើ​ពិន្ទុ​ជាមួយ​លាស់ យីន​ក្លឹប​សម្រែក​រាជសីហ៍​បង្ក្រាប​គ្រឿងញៀន។ ឯ​ឃីម បូរ៉ា​ ក្លឹប​រស្មី​ភូមិ​គាប​ខេត្ត​បន្ទាយមានជ័យ​ប្រកួត​ឈ្នះ​សូត្រ ប៊ុន​ធី​ក្លឹប​បក្សី​ស្លាប​ដែក​ដោយ​ពិន្ទុ។​

ដោយឡែក​លើ​សង្វៀន SEA-TV ព្រឹក​ថ្ងៃទី​១១ ខែ​មករា អ្នក​ប្រដាល់​ អ៊ុំ ចំរើន​ក្លឹប​តា​ឡី​ដំរី​មាន​រិ​ទ្ធិ​ប្រើ​ជើង​ផ្ដួល​អ្នក​ប្រដាល់​សោម តឿ​ទី ក្លឹប​ខ្លារខិន​មាន​រិ​ទ្ធិ មុន​ស្នូរ​ជួង​បញ្ចប់​ទឹក​ទី​២។ តាមពិត​សោម តឿ​ទី មិន​សមជា​ដៃគូ​ជា​មួយ ​អ៊ម ចំរើន​នោះ​ទេ តែ​ដោយសារ​នូវ ស៊ីថា ដែល​ជា​មិត្ត​រួម​ក្លឹប​ជា​មួយ​ចំរើន គេ​ឈឺ​មិនអាច​ឡើង​ប្រកួត​បាន ទើប​ប្ដូរ​ដាក់​ អ៊ុំ ចំរើន​ឲ្យ​ប្រកួត​ជំនួស​វិញ​នោះ។​

សោម តៀ​ទី គេ​ចង់​បោះបង់​ការប្រកួត​តាំងពី​ក្នុង​ទឹក​ទី​១​មក​ម្ល៉េះ ព្រោះ​មិនអាច​ទ្រាំ​ជាមួយ​កណ្ដាប់ដៃ និង​ជើង​ទាត់​ដ៏​ខ្លាំង​របស់​ចំរើន​បាន។ ក្នុង​ដើម​ទឹក​ទី​២ តឿ​ទី​ ត្រូវ​ចំរើន​ទាត់​ឡើង​ចង់​ខូច​ដៃ និង​ត្រូវ​អាជ្ញាកណ្ដាល​រាប់​៨​ដល់​ទៅ​ពីរ​ដង ហើយ​នៅពេល​ដួល​ម្តង​ទៀត អាជ្ញាកណ្ដាល​ក៏​បញ្ឈប់​លែង​ឲ្យ​បន្ត​ប្រកួត​ទៀត​តែ​ម្តង​ទៅ។​

ឯក កៃ​ឈៀង អ្នក​ប្រា​ដល់​ក្លឹប​មកុដ​រាជសីហ៍ បាន​ប្រើ​ជើង​ទាត់​នឿន វ៉ាន់ឌី​ អ្នក​ប្រដាល់​ក្លឹប​អេ​ភូ​ថង​កីឡា​ឲ្យ​សន្លប់​ធំ​នៅ​ពាក់កណ្ដាល​ទឹក​ទី​១។ វ៉ន់​ឌី ត្រូវ​មួយ​ជើង​ផ្កាប់​ចាន​របស់ ​កៃ​ ឈៀង​នេះ គឺ​ធ្ងន់ធ្ងរ​មែនទែន ដោយ​វង្វេងស្មារតី​លែង​ចងចាំ​បាន​អ្វី​ទាំងអស់ រហូតដល់​លែង​ដឹង​ថា​ គេ​វ៉ៃ​ដួល​ដោយ​ត្រូវ​នឹង​អ្វី​ថែមទៀត។​

ប៊ិ​ត ប៊ុនធឿន អ្នក​ប្រដាល់​ក្លឹប​តា​ព្រហ្ម​មានជ័យ ប្រកួត​ឈ្នះ​សាន រាជសីហ៍ អ្នក​ប្រដាល់​ក្លឹប​ក្រសួងការពារជាតិ​ដោយ​ពិន្ទុ។ សាន​រាជសីហ៍ គ្រាន់តែ​អាជ្ញាកណ្ដាល​រាប់​៨​ដល់​ទៅ​៣​ដង គឺ​ក្នុង​ទឹក​ទី​១​ម្តង និង​ក្នុង​ទឹក​ទី​៤​ពីរ​ដង ដោយសារតែ​ត្រូវ​នឹង​កណ្ដាប់ដៃ​របស់ ​ប៊ុន ធឿន​នោះ។ ចំណែក ម៉ន រិទ្ធី អ្នក​ប្រដាល់​ក្លឹប​ការិយាល័យ​ទី​៥ កងទ័ពជើងគោក ផ្ដួល​សាង សី អ្នក​ប្រដាល់​ក្លឹប​ឃ្លាំងមឿង​កីឡា​ឲ្យ​សន្លប់​នៅក្នុង​ទឹក​ទី​៣។​

លើ​សង្វៀន SEA-TV នា​ពេល​ល្ងាច​ថ្ងៃអាទិត្យ​ដដែល​នេះ​ដែរ ឡេះ តើក អ្នក​ប្រដាល់​ក្លឹប​ពុទ្ធ​សេរី​វង្ស​កីឡា​បាន​វាយ​ឈ្នះ​បឺត សំរេច អ្នក​ប្រដាល់​ក្លឹប​សាលវ័ន​កីឡា​ដោយ​ពិន្ទុ​ដាច់​តែម្តង ក្រោយពី​ប្រកួត​គ្នា​ប្រាំ​ទឹក​បោះ។​

គ្មាន​ចៅក្រម​ណា​ម្នាក់​ក្នុងចំណោម​៥​នាក់​នោះ​ឲ្យ​បឺត សំរេច​ឈ្នះ​នោះ​ឡើយ គឺ​ផ្តល់​ពិន្ទុ​ឲ្យ​ឡេះ តើក​ឈ្នះ​ទាំង​ប្រាំ​នាក់។ ហ៊​ល ដា​រ៉ា អ្នក​ប្រដាល់​ក្លឹប​សាលវ័ន​កីឡា​បាន​យកឈ្នះ​សេន កុសល អ្នក​ប្រដាល់​ក្លឹប​មោងឫស្សី​មរតក​គុន​ខ្មែរ​ខេត្តបាត់ដំបង​ដោយ​ពិន្ទុ ក្រោយពី​ប្រកួត​គ្នា​ប្រាំ​ទឹក​ពេញ​នោះ។ ប៉ុន្តែ​យ៉ាងណា សេន កុសល គេ​ចាញ់​ទាំង​មិន​អស់ចិត្ត​ឡើយ។​

គួរ​បញ្ជាក់​ឲ្យ​ដឹង​ដែរ​ថា គូ​នេះ​ចៅក្រម​៤​នាក់​ឲ្យ​ហ៊​ល ដា​រ៉ា​ឈ្នះ ហើយ​មានតែ​ចៅក្រម​ម្នាក់​ប៉ុណ្ណោះ​ដែល​ឲ្យ​សេន កុសល​ឈ្នះ​នោះ គឺ​ហ៊​ល ​ដា​រ៉ា​ឈ្នះ​៤​ទល់​១។​

ម៉ន វ៉ាន់​នី អ្នក​ប្រដាល់​ក្លឹប​ការិយាល័យ​ទី​៥​កងទ័ពជើងគោក​បាន​ផ្ដួល​យកឈ្នះ​ហឿន សុខលី អ្នក​ប្រដាល់​ក្លឹប​តា​ព្រហ្ម​មានជ័យ នៅក្នុង​ទឹក​ទី​៤ បន្ទាប់ពី​គេ​អុក​ជង្គង់​ឆ្វេង​ចូល​ចុងដង្ហើម​របស់ ​សុខ​លី​នោះ។ ចំណែក បឺត សង្ឃឹម អ្នក​ប្រដាល់​ក្លឹប​រ៉ា​ហាប់​ស្វាយប៉ាក គេ​ក៏បាន​វាយ​សយ សី អ្នក​ប្រដាល់​ក្លឹប​ពន្លឺ​វិបុល​រិទ្ធី​ឲ្យ​សន្លប់​ដោយសារ​ជង្គង់​ក្នុង​ទឹក​ទី​៣​ដែរ៕

​វិ​សិទ្ធ​(១២)