ភ្នំពេញ ៖ ស្ត្រីបម្រើការងារខារ៉ាអូខេបន្ទាយស្រីម្នាក់ត្រូវបានជនរងគ្រោះប្តឹងសមត្ថកិច្ចឲ្យឃាត់ខ្លួនបន្ទាប់ពីជនរងគ្រោះរកម៉ូតូរបស់ខ្លួនដែលបាត់ឃើញនៅមុខបន្ទប់ជួលរបស់ស្ត្រីនោះ ដែលត្រូវប្រុសស្នេហ៍នាងលួចយកទៅលាក់ទុករួចគេចខ្លួនបាត់។
ហេតុការណ៍នេះបានកើតឡើងកាលពីវេលាម៉ោង១៣និង៣០នាទីរសៀលថ្ងៃទី១ ខែមករា ឆ្នាំ២០១៥ នៅចំណុចផ្ទះជួលភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វា។
សមត្ថកិច្ចបានឲ្យដឹងថា ស្ត្រីសង្ស័យឈ្មោះវ៉ា ផល្លី ហៅស្រីពៅ អាយុ២៥ឆ្នាំ បម្រើការងារជានារីខារ៉ាអូខេបន្ទាយស្រី ស្នាក់នៅបន្ទប់ជួលកន្លែងកើតហេតុខាងលើ មានស្រុកកំណើតនៅឃុំប្រធាតុ ស្រុកអូររាំងឪ ខេត្តកំពង់ចាម រីឯបុរសសង្ស័យដែលរត់គេចខ្លួនបាត់នោះឈ្មោះ តយ អាយុជាង២០ឆ្នាំ ។ ចំណែកជនរងគ្រោះឈ្មោះខៀវ ស្រីវ ភេទប្រុសអាយុ៤១ឆ្នាំស្នាក់នៅម្តុំភោជនីយដ្ឋានរំចង់ក្បែរកន្លែងកើតហេតុខាងលើដែរ។
សមត្ថកិច្ចបន្តថា មុនពេលកើតហេតុជនរងគ្រោះបានទុកម៉ូតូម៉ាកសេ១២៥ពណ៌ខ្មៅមួយគ្រឿង ពាក់ស្លាកលេខ ភ្នំពេញ 1CJ1495នៅមុខផ្ទះរបស់ខ្លួន ស្រាប់តែបាត់តែម្តង។ ខណៈដែលដឹងថាបាត់ម៉ូតូក៏នាំគ្នាផ្អើលឆោឡោឡើង ពេលនោះមានអ្នកជិតខាង ប្រាប់ថាឃើញបុរសម្នាក់អូសម៉ូតូនោះចូលទៅមុខបន្ទប់ជួលរបស់នាង វ៉ាផល្លីហៅស្រីពៅ។ ក្រោយមកជនរងគ្រោះក៏ប្ដឹងសមត្ថកិច្ចចុះឆែកឆេរបន្ទប់ជួល ក៏ឃើញម៉ូតូជនរងគ្រោះមែន ប៉ុន្តែបុរសសង្ស័យដឹងខ្លួនបានគេចខ្លួនបាត់មុនពេលសមត្ថកិច្ចទៅដល់ ហើយសមត្ថកិច្ចបានឃាត់ខ្លួននារីខារ៉ាអូខេនោះបញ្ជូនទៅប៉ុស្តិ៍ព្រែកលៀបដើម្បីធ្វើការសាកសួរ។
សមត្ថកិច្ចបានបន្តទៀតថា ដោយសារតែម៉ូតូជាប់តេឡេបញ្ជាដេរ មិនឆេះទើបជនសង្ស័យបណ្ដើរចម្ងាយ១០០ម៉ែត្រទៅផ្ញើនៅទីនោះ ព្រោះសោកត្រូវកាច់ខ្ទេចរួចហើយ កុំអីចោរជិះទៅបាត់។
នៅចំពោះមុខសមត្ថកិច្ច ស្ត្រីនោះបាននិយាយថា មានបុរសម្នាក់ឈ្មោះតយ ដែលធ្លាប់ស្គាល់គ្នានៅការខារ៉ាអូខេបានយកម៉ូតូមកផ្ញើមុខបន្ទប់ ហើយនិយាយថាខ្លួននៅផឹកស្រាក្បែរហ្នឹង រួចក៏ដើរចេញបាត់តែម្តង។
បច្ចុប្បន្ននារីសង្ស័យដែលឃាត់ខ្លួនសួរនាំនោះត្រូវបានសមត្ថកិច្ចដោះលែងឲ្យទៅផ្ទះវិញព្រោះតែមិនពាក់ព័ន្ធនឹងករណីនេះទេ៕
0 Comments