បាត់ដំបង ៖ ថ្នាក់ដឹកនាំគ្រប់រូបត្រូវមានសីលសមាធិ និងបញ្ញានៅក្នុងខ្លួន ដែលនេះជាគោលធម៌របស់ព្រះសម្មាសម្ពុទ្ធដែលនាំឆ្ពោះទៅរកការងារមួយមានប្រសិទ្ធភាពខ្ពស់ និងមានប្រពៃណីសាមគ្គីភាពផ្ទៃក្នុងឲ្យកាន់តែល្អប្រសើរ នេះជាប្រសាសន៍របស់ លោក មិន ឃិន រដ្ឋមន្ត្រីក្រសួងធម្មការ និងសាសនាដែលបានលើកឡើងក្នុងពិធីប្រកាសចូលកាន់មុខតំណែង លោក គុណ សម្បត្តិមុនីរតន៍ ជាប្រធានមន្ទីរធម្មការនិងសាសនាខេត្តបាត់ដំបង ជំនួសលោក សួន ប៊ុនជឿន ដែលបានចូលនិវត្ត នៅថ្ងៃទី១២ ខែមករា ឆ្នាំ២០១៥ នាសាលាខេត្តបាត់ដំបង។
បន្ទាប់ពីការអានសេចក្តីប្រកាសតែងតាំង និងគណៈអធិបតីធ្វើការប្រគល់សេចក្តីសម្រេចនិងត្រា ព្រមទាំងការធ្វើការប្ដេជ្ញាចិត្តរបស់លោក គុណ សម្បត្តិមុនីរតន៍ ប្រធានថ្មីទើបតែងតាំងរួចមក លោក ចន្ទ សុផល អភិបាលនៃគណៈអភិបាលខេត្តក៏បានគូសបញ្ជាក់ថា ការប្រគល់ភារកិច្ច និងការទទួលខុសត្រូវដល់ លោក គុណ សម្បត្តិមុនីរតន៍ នាពេលនេះគឺជាទំនុកចិត្តរបស់ប្រមុខរាជរដ្ឋាភិបាល ក៏ដូចក្រសួងធម្មការនិងសាសនា គឺតម្រូវឲ្យសាមីខ្លួនត្រូវបញ្ចេញឲ្យអស់សមត្ថភាពលទ្ធភាព និងទេពកោសល្យក្នុងការជំនះរាល់ការលំបាកដោយសហការជាមួយថ្នាក់ដឹកនាំមន្ត្រីក្រោមឱវាទដើម្បីឲ្យអង្គភាពមានការប្រែប្រួលមុខមាត់ថ្មី សំដៅធានារ៉ាប់រងបាននូវភារកិច្ចស្នូលដែលអង្គភាពត្រូវបំពេញ ពិសេសទទួលខុសត្រូវចំពោះមុខស្ថាប័ន និងភារកិច្ចតាមការចាំបាច់ដែលរដ្ឋបាលខេត្តប្រគល់ជូន។ លោកអភិបាលខេត្តបានបន្តទៀតថា ការប្រកាសតែងតាំងតួនាទីថ្នាក់ដឹកនាំមន្ទីរ គឺជាប្រពៃណីទំនៀមទម្លាប់របស់ថ្នាក់ដឹកនាំមន្ត្រីរាជការស៊ីវិលក្នុងជួររាជរដ្ឋាភិបាលក្នុងការពង្រឹងនូវសមត្ថភាពការងារក្នុងសង្គមលើការងារអនុវត្តនូវគោលនយោបាយយុទ្ធសាស្ត្រចតុកោណដំណាក់កាលទី៣ នីតិកាលទី៥ នៃរដ្ឋសភាក្នុងគោលបំណងដើម្បីធានានូវសុវត្ថិភាពការងារ ការសហការល្អ និង ការប្ដេជ្ញាចិត្តខ្ពស់ស្របតាមគោលការណ៍ទាំងឡាយរបស់រាជរដ្ឋាភិបាល។ លោក មិន ឃិន បានលើកឡើងថា ការប្រកាសតែងតាំងប្រធានមន្ទីរថ្មី ក្រសួងតែងតែគិតគូរចំពោះការងារដឹកនាំការគ្រប់គ្រងមន្ត្រីថ្នាក់ក្រោមគ្រប់កាលៈទេសៈដើម្បីអនុវត្តតាមយុទ្ធសាស្ត្រ និងគោលការណ៍របស់រាជរដ្ឋាភិបាលសំដៅធ្វើឲ្យវិស័យសាធារណៈកាន់តែប្រសើរឡើងថែមទៀត។ លោកក៏បានចែករំលែកនូវបទពិសោធន៍ និងអនុសាសន៍ល្អៗមួយចំនួនដែលជាយន្តការក្នុងការដឹកនាំអង្គភាពឲ្យមានការរីកចម្រើន និងត្រូវធ្វើការកែលំអសេវាសាធារណៈដោយត្រូវបង្កើនការផ្សព្វផ្សាយលិខិតបទដ្ឋាន សារាចរ និងច្បាប់នានា ព្រមទាំងក្តាប់ឲ្យបាននូវរាល់អធិករណ៍ដែលបានកើតឡើង ជាពិសេសត្រូវធ្វើឲ្យវិស័យសាសនាឲ្យមានការរីកចម្រើន និងបានជំរុញឲ្យលោកប្រធានមន្ទីរទើបចូលកាន់តំណែងត្រូវតែបន្តអនុវត្តការងារនេះឲ្យស្របទៅតាមកម្មវិធីនយោបាយចតុកោណដំណាក់កាលទី៣ នៃរដ្ឋសភាសំដៅធ្វើឲ្យកង់អាណាចក្រ និងពុទ្ធចក្រដើរទន្ទឹមគ្នា។
លោករដ្ឋមន្ត្រីក្រសួងធម្មការនិងសាសនាសង្ឃឹមជឿជាក់ថា ក្នុងការដឹកនាំរបស់ប្រធានមន្ទីរថ្មីនឹងពង្រឹងប្រពៃណីសាមគ្គីភាពផ្ទៃក្នុងឲ្យកាន់តែល្អប្រសើរ ព្រមទាំងមានការទំនាក់ទំនងល្អតាមបណ្ដាមន្ទីរ ស្ថាប័ន អង្គភាព និងព្រះសង្ឃក្នុងការដោះស្រាយនូវរាល់បញ្ហានានាសំដៅដល់ការអភិវឌ្ឍន៍វិស័យសាសនានៅទូទាំងខេត្តឲ្យមានការរីកចម្រើនផងដែរ៕
0 Comments