ភ្នំពេញ ៖ នគរបាលផ្នែកព្រហ្មទណ្ឌ នៃអធិការដ្ឋាននគរបាលខណ្ឌដង្កោ បានដឹកបញ្ជូនជនសង្ស័យ៣នាក់ ពាក់ព័ន្ធពីរករណីផ្សេងគ្នាទៅកាន់សាលាដំបូងរាជធានីភ្នំពេញ នាព្រឹកថ្ងៃទី១២ ខែមករា ឆ្នាំ២០១៥។ ជនសង្ស័យទាំង៣នាក់ រួមមានទី១-ឈ្មោះ រិទ្ធ សុខកែវ ហៅ ទិត្យ សុគា ភេទប្រុស អាយុ២៨ឆ្នាំ មុខរបរមិនពិតប្រាកដ មានទីលំនៅភូមិទួលសំបូរ សង្កាត់ព្រៃវែង ខណ្ឌដង្កោ ទី២-ឈ្មោះ សាន វិសាល ភេទប្រុស អាយុ២០ឆ្នាំ ជានិស្សិត និងទី៣-ឈ្មោះ គង់ រក្សា ភេទប្រុស អាយុ២០ឆ្នាំ មុខរបរលក់នំប៉័ង ទាំង២នាក់ បច្ចុប្បន្នស្នាក់នៅក្នុងសាលាបឋមសិក្សាចតុមុខ សង្កាត់ជ័យជំនះ ខណ្ឌដូនពេញ និងមានស្រុកកំណើតនៅភូមិអន្លុងមាស ឃុំព្រៃល្វា ស្រុកព្រៃកប្បាស ខេត្តតាកែវ។
មន្ត្រីនគរបាលព្រហ្មទណ្ឌដង្កោប្រាប់ថា ជនសង្ស័យឈ្មោះ រិទ្ធ សុខកែវ ជាប់ចោទពីបទបង្កហិង្សាយកខ្សែក្រវាត់វាយទៅលើជនរងគ្រោះឈ្មោះ សន ស្រីពៅ ភេទស្រី អាយុ៣៣ឆ្នាំ មុខរបររើសអេតចាយ រស់នៅភូមិទួលសំបូរ សង្កាត់ព្រៃវែង ខណ្ឌដង្កោ កាលពីថ្ងៃទី៧ ខែមករា ឆ្នាំ២០១៥ វេលាម៉ោង២១និង៤០នាទី បណ្ដាលឲ្យបែកចិញ្ចើមខាងឆ្វេងហូរឈាមពេញផ្ទៃមុខ ហើយមិនតែប៉ុណ្ណោះជនសង្ស័យបានស្ទុះទៅវាយកញ្ចក់តុដាក់ទូរទស្សន៍បណ្ដាលឲ្យបែក និងផ្តាច់ខ្សែមុងរបស់ជនរងគ្រោះចោលទៀត ដោយសាររឿងខ្ចីស៊ីមទូរស័ព្ទដៃប៉ុណ្ណោះ។
ក្រោយពីសួរនាំនៅប៉ុស្តិ៍រដ្ឋបាលព្រៃវែងទៅលើជនសង្ស័យខាងលើ ក៏ធ្លាយ១រឿងផ្សេងទៀត គឺករណីលួចទូរស័ព្ទដៃចំនួន០២គ្រឿង ក្នុងនោះ១គ្រឿងម៉ាក ខេមហ្វូន និង១គ្រឿងទៀតម៉ាកសាំស៊ុង របស់ជនរងគ្រោះ ឈ្មោះ សាយ សុខលី ភេទប្រុស អាយុ៥៣ឆ្នាំ មុខរបរលក់បន្លែ រស់នៅភូមិទួលសំបូរ សង្កាត់ព្រៃវែង ខណ្ឌដង្កោ ហើយជនរងគ្រោះក៏បានដាក់ពាក្យប្ដឹងជនសង្ស័យផងដែរ។
មន្ត្រីនគរបាលព្រហ្មទណ្ឌដង្កោដដែលប្រាប់បន្តថា ចំណែកជនសង្ស័យឈ្មោះ សាន វិសាល និងឈ្មោះ គង់ រក្សា គឺពាក់ព័ន្ធករណីគ្រឿងញៀន កាលពីយប់ថ្ងៃទី៩ ខែមករា ឆ្នាំ២០១៥ គណៈបញ្ជាការឯកភាពរដ្ឋបាលខណ្ឌដង្កោ ដឹកនាំដោយលោក ចេង មុនីរ៉ា អភិបាលរងខណ្ឌ និងលោក ប្រាជ្ញ សោភ័ណ្ណា អធិការរងនគរបាលខណ្ឌដង្កោ ដាក់គោលដៅត្រួតពិនិត្យជាតិអាល់កុល និងត្រួតពិនិត្យអាវុធជាតិផ្ទុះនៅមុខសាលាខណ្ឌដង្កោ លើកំណាត់ផ្លូវ២១៧ ស្ថិតក្នុងភូមិថ្មី សង្កាត់ដង្កោ ខណ្ឌដង្កោ ក្នុងគោលបំណងពង្រឹងសន្តិសុខក្នុងមូលដ្ឋាន ជាពិសេសអនុវត្តន៏នូវគោលនយោបាយភូមិ/ឃុំមានសុវត្ថិភាពឲ្យមានប្រសិទ្ធភាពខ្ពស់។ ខណៈកំពុងត្រួតពិនិត្យ ស្រាប់តែឃើញជនសង្ស័យទាំង២នាក់ខាងលើ ជិះម៉ូតូ១គ្រឿងម៉ាកDUKE ពណ៌ខ្មៅលាយស ពាក់ស្លាកលេខ ភ្នំពេញ 1CP-2002 គ្មានដាក់កញ្ចក់ និងគ្មានពាក់មួកការពារត្រឹមត្រូវ សមត្ថកិច្ចក៏បានឃាត់ធ្វើការឆែកឆេរ រកឃើញថ្នាំញៀន១កញ្ចប់ ប្រភេទម្សៅក្រាមពណ៌សថ្លានៅជាប់នឹងខ្លួន ទើបឃាត់ខ្លួនជនសង្ស័យទាំង២នាក់ រួមទាំងវត្ថុតាង នាំទៅកាន់អធិការដ្ឋាននគរបាលខណ្ឌដង្កោចាត់តាមនីតិវិធី៕ រ៉ាវុទ្ធ
0 Comments