ភ្នំពេញ ៖ កាលពីព្រឹកថ្ងៃទី២០ ខែមករា ឆ្នាំ២០១៥ ការិយាល័យប្រឆាំងបទល្មើសព្រហ្មទណ្ឌ នៃបញ្ជាការដ្ឋានកងរាជអាវុធហត្ថរាជធានីភ្នំពេញ បានបញ្ជូនជនសង្ស័យទាំង០៥នាក់ ពាក់ព័ន្ធនឹងបទល្មើសផ្សេងៗដាច់ពីគ្នាចំនួន០៣ករណីទៅកាន់សាលាដំបូងរាជធានីភ្នំពេញ។
ករណីទី១ ៖ កាន់កាប់និងជួញដូរអាវុធខុសច្បាប់ ជនសង្ស័យមានគ្នា០៣នាក់រួមមាន ១- ឈ្មោះ យន់ សំបូរ ហៅគោ ភេទប្រុស អាយុ២៥ឆ្នាំ ជាតិខ្មែរមុខរបរមិនពិតប្រាកដ ទីលំនៅបច្ចុប្បន្ន ភូមិបត្តជី ឃុំព្រែកហូរ ក្រុងតាខ្មៅ ខេត្តកណ្តាល ជាអ្នកកាន់កាប់អាវុធអាវុធខ្លី១ដើមម៉ាកកា54។ ២- ឈ្មោះ ឆុន កែវ ភេទប្រុស អាយុ២១ឆ្នាំ ជាតិខ្មែរ ប្រកបមុខរបរធ្វើការរោងចក្រ មានទីលំនៅបច្ចុប្បន្ន ឃុំស្វាយរលំ ស្រុកស្អាង ខេត្តកណ្តាល ជាបក្សពួកឈ្មោះ យន់ សំបូរ។
ជនសង្ស័យទាំង២នាក់នេះ ត្រូវសមត្ថកិច្ចអាវុធហត្ថខណ្ឌមានជ័យឃាត់ខ្លួនកាលពីវេលាម៉ោង២និង២០នាទីរំលងអាធ្រាត្រ ឈានចូលថ្ងៃទី១៨ ខែមករា ឆ្នាំ២០១៥ ខណៈពេលដែលកម្លាំងកងរាជអាវុធហត្ថខណ្ឌមានជ័យធ្វើការល្បាត និងឆែកត្រួតពិនិត្យអាវុធជាតិផ្ទុះនៅមុខក្លិបកំសាន្តមួយកន្លែង ដែលនៅតាមផ្លូវជាតិលេខ២ ក្នុងភូមិទួលរកា សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ក្រោយពេលឃាត់ខ្លួន ជនសង្ស័យទាំង២នាក់បានសារភាពថា អាវុធខ្លីមួយដើមនេះគេបានទិញពីឈ្មោះ ប៉ាល វណ្ណា ទើបសមត្ថកិច្ចបន្តឈានទៅរកការឃាត់ខ្លួនជនសង្ស័យទី៣ដែលមានឈ្មោះ ប៉ាល វណ្ណា ភេទប្រុស អាយុ២៥ឆ្នាំ ជនជាតិខ្មែរ មុខរបរជួសជុល និងលក់ទូរស័ព្ទដៃក្នុងក្រុងភ្នំពេញ និងខេត្តនានា ដែលមានទីលំនៅភូមិព្រែកឫស្សី ក្រុងតាខ្មៅ ខេត្តកណ្តាល។ ឈ្មោះ ប៉ាល វណ្ណា បានសារភាពថា ខ្លួនពិតជាបានលក់អាវុធខ្លីម៉ាក K54 មួយដើមឲ្យទៅឈ្មោះ យន់ សំបូរ ហៅគោនោះ ពិតប្រាកដមែន គឺក្នុងតម្លៃ៥០០ដុល្លារអាមេរិក។ រូបគេក៏បានបន្តទៀតថា អាវុធខ្លីមួយដើមនេះ ខ្លួនបានទិញយោធាម្នាក់ទុកគ្រាន់ការពារខ្លួន ព្រោះកាលពីមុនរូបគេជាអ្នកបើកបររថយន្តឲ្យលោកឧកញ៉ាម្នាក់។
ករណីទី២ ៖ លួចនិងទទួលផលចោរកម្ម ជនសង្ស័យម្នាក់ឈ្មោះ ហួន សំអាត ហៅ ណន ឈុន ហៅហេង វុត្ថា ភេទប្រុស ឆ្នាំកំណើត១៩៨៣ មានទីលំនៅបច្ចុប្បន្នផ្ទះជួលភូមិព្រៃព្រីង សង្កាត់ចោមចៅ ខណ្ឌពោធិសែនជ័យ ជាមុខសញ្ញាសង្ស័យពាក់ព័ន្ធនឹងករណីទទួលផលចោរកម្ម ត្រូវបានកម្លាំងអាវុធហត្ថខណ្ឌពោធិសែនជ័យធ្វើការឆែកឆេរដល់លំនៅដ្ឋាន ហើយបានរកឃើញម៉ូតូម៉ាក FZS ពណ៌ខ្មៅ បិទស្កុតក្រហមមួយគ្រឿង ពាក់ស្លាកលេខ 1CM-7147 រួមនឹងសម្ភារៈសម្រាប់ប្រព្រឹត្តបទល្មើសមួយចំនួនមានដូចជា ជញ្ជីងថ្លឹងថ្នាំញៀន០១ និងផ្លាកលេខម៉ូតូចំនួន០៧សន្លឹកដែលរួមមាន ៖ ១-ភ្នំពេញ 1BK-6202 កែច្នៃពីលេខពិត1BY-5202 ,២-ភ្នំពេញ 1CB-8201 ,៣-ភ្នំពេញ 1BW-2312 ,៤-ភព1 ទ3618 ,៥-ភ្នំពេញ DG-0533 ,៦-ភ្នំពេញ 1AQ-5927 ,និង៧-កំពង់ចាម 1B-7542។
ក្រោយពេលឃាត់ខ្លួន ជនសង្ស័យបានសារភាពឲ្យដឹងថា កន្លងមកខ្លួនជាប់ពន្ធនាគារព្រៃស ពីបទលួច(ម៉ូតូ) ហើយទើបតែចេញក្នុងឆ្នាំ២០១៤នេះទេ បន្ទាប់ពីបានចេញពីពន្ធនាគារខ្លួនធ្លាប់ធ្វើសកម្មភាពលួចកាច់កម៉ូតូចំនួន០៣លើក និងធ្លាប់ទទួលទិញម៉ូតូពីបក្សពួកខ្លួនក្នុងតម្លៃថោកៗ យកទៅលក់បន្តជាច្រើនលើកផងដែរ។ ឯម៉ូតូមួយគ្រឿងម៉ាក FZS ពាក់ស្លាកលេខ ភ្នំពេញ 1CM-7147 ខ្លួនបានទិញពីឈ្មោះ ហេង (មិនស្គាល់ផ្ទះ) នៅតាមផ្លូវផ្សារស្ពឺ ក្នុងតម្លៃ១៧០០ដុល្លារអាមេរិក រីឯស្លាកលេខទាំង០៧សន្លឹកនោះជារបស់ឈ្មោះ ចិន និងឈ្មោះ វណ្ណី ដែលជាបក្សពួកខ្លួន និងជាអ្នកផ្ញើឲ្យខ្លួនទុកផងដែរ។
ក្នុងចំណោមស្លាកលេខទាំង០៧សន្លឹកនោះ សមត្ថកិច្ចអាវុធហត្ថបានស្រាវជ្រាវរកឃើញម្ចាស់ស្លាកលេខភ្នំពេញ 1CB-8201ម្នាក់ឈ្មោះ ខេង ខេមរិន្ទ ដែលម៉ូតូរបស់គាត់ម៉ាកហុងដា សេ125 ត្រូវបានជនសង្ស័យ០២នាក់ជិះម៉ូតូម៉ាកស្កូពី ពណ៌ខ្មៅលាយស យកកាំភ្លើងមិនស្គាល់ម៉ាក០១ដើម មកភ្ជង់យកទៅបាត់ កាលពីថ្ងៃទី០៣ ខែមករា ឆ្នាំ២០១៥ នៅវេលាម៉ោងប្រហែល២១និង៣០នាទី ខណៈពេលដែលខ្លួនជិះទៅផ្ទះមេជាងដើម្បីជួបជុំជាមួយមិត្តភក្ដិដែលធ្វើការជាមួយគ្នា។
ករណីទី៣ ៖ រំលោភលើទំនុកចិត្ត ជនសង្ស័យម្នាក់ឈ្មោះ ជួប តុងស៊ី ហៅតុង ភេទប្រុស អាយុ២៩ឆ្នាំ ជនជាតិខ្មែរ មានមុខរបរមិនពិតប្រាកដ ដែលទីលំនៅបច្ចុប្បន្នភូមិទ្រា សង្កាត់ស្ទឹងមានជ័យ ខណ្ឌមានជ័យ បានខ្ចីម៉ូតូ០១គ្រឿងម៉ាកហុងដាសេ125 ពីមិត្តរបស់ខ្លួន ឈ្មោះ ម៉ុច សំអុល ដែលនៅក្នុងភូមិជាមួយគ្នា ថាយកទៅបញ្ចាំ០៥ថ្ងៃដើម្បីយកលុយលោះយកប្លង់ដីពីធនាគារ លុះដល់ថ្ងៃកំណត់០៥ថ្ងៃ ជនសង្ស័យរូបនេះបានខ្ចីម៉ូតូពីឈ្មោះ ម៉ុច សំអុល មួយគ្រឿងទៀតម៉ាកវេវ ដោយប្រាប់ថា ទៅយកលុយពីធនាគារ ពេលខ្ចីបានក៏យកទៅបញ្ចាំទៀត ទើបជនរងគ្រោះមកប្តឹងកងរាជអាវុធហត្ថឲ្យធ្វើការឃាត់ខ្លួនតែម្តង៕
វិមាន
0 Comments