ពួកមេធាវីសិទ្ធិមនុស្សបាននិយាយនៅថ្ងៃពុធថា បាតុកម្មមួយរបស់ពួកអ្នកស្វែងរកសិទ្ធិជ្រកកោនរាប់រយនាក់នៅឯមជ្ឈមណ្ឌលឃុំឃាំងមួយរបស់អូស្ត្រាលី នៅប៉ាពូញូវហ្គីណេ ជាកន្លែងដែលអ្នកខ្លះបិទមាត់មិននិយាយនោះ មិនបានបញ្ចប់ទេទោះបីជាសេចក្តីថ្លែងការណ៍របស់រដ្ឋាភិបាលនិយាយផ្ទុយក៏ដោយ។
ប្រទេសអូស្ត្រាលីប្រើមណ្ឌលឃុំឃាំងនៅឯនាយសមុទ្រនៅប៉ាពូញូវហ្គីណេ និងប្រទេសកោះណាអ៊ូរូនៅប៉ាស៊ីហ្វិកខាងត្បូង ដើម្បីលៃលកពួកជនភៀសខ្លួនដែលកំពុងព្យាយាមទៅកាន់ប្រទេសនោះតែងតែធ្វើដំណើរតាមទូកគ្មានសុវត្ថិភាព ក្រោយពីបង់លុយឲ្យពួកអ្នករត់ពន្ធមនុស្សនៅក្នុងប្រទេសឥណ្ឌូនេស៊ីនោះ។
មជ្ឈមណ្ឌលឃុំឃាំងអន្តោប្រវេសន៍នៅលើកោះម៉ានូស នៅប៉ាពូញូវហ្គីណេគឺជាកន្លែងកុប្បកម្មនៅក្នុងខែកុម្ភៈ ឆ្នាំ២០១៤ ដែលនៅក្នុងនោះអ្នកស្វែងរកសិទ្ធិជ្រកកោនម្នាក់ ត្រូវបានគេសម្លាប់ និងជាង៧០នាក់ត្រូវរបួស ក្រោយពីពួកអ្នកស្រុកលុកលុយជំរុំនោះ និងវាយប្រហារពួកជាប់ឃុំឃាំង។
បាតុកម្មជាច្រើនទៀតបានចាប់ផ្តើម កាលពីសប្ដាហ៍មុន ក្រោយពីពួកអ្នកស្វែងរកសិទ្ធិជ្រកកោនត្រូវបានគេនិយាយប្រាប់ថា ពួកគេនឹងត្រូវជម្លៀសទៅកាន់ទីតាំងថ្មី ដែលគេព្រួយបារម្ភថា កាន់តែងាយទទួលការវាយប្រហារដោយពួកអ្នកនៅប៉ាពូញូវហ្គីណេ ដែលប្រឆាំងនឹងវត្តមានរបស់គេនោះ៕
0 Comments