ភ្នំពេញ ៖ ជនសង្ស័យដែលជាចោរឆក់កាបូបម្នាក់ ត្រូវបានប្រជាពលរដ្ឋចាប់បានព្រួតគ្នាវាយឡើងទ្រោមខ្លួន រួចទើបប្រគល់ឱ្យសមត្ថកិច្ច បន្ទាប់ពីគេបានធ្វើសកម្មភាពឆក់កាបូបពីនារីម្នាក់ កាលពីវេលាម៉ោង៩និង៣៥នាទីយប់ ថ្ងៃទី២០ ខែមករា ឆ្នាំ២០១៥ នៅខាងត្បូងសារៈមន្ទីប្រល័យពូជសាសន៍ទួលស្លែង ដែលស្ថិតនៅតាមបណ្តោយផ្លូវ១១៣កែងនឹងផ្លូវលេខ៣៦០ ស្ថិតក្នុងសង្កាត់បឹងកេងកងទី៣ ខណ្ឌចំការមន ខណៈដែលនារីរងគ្រោះរួមនឹងមិត្តភក្ដិជិះរថយន្តសេរីទំនើបមួយគ្រឿង និងបាននាំគ្នាមកអង្គុយញ៉ាំបង្អែម។
សាក្សីបានឲ្យដឹងថា នៅមុនពេលកើតហេតុរូបនាងជាមួយនឹងមិត្តភក្ដិ ព្រមទាំងបងប្រុស២នាក់ទៀត បានជិះរថយន្តសេរីទំនើបមួយគ្រឿងនាំគ្នាមកអង្គុយញ៉ាំបង្អែមនៅខាងត្បូងសារៈមន្ទីរប្រល័យពូជសាសន៍ទួលស្លែង ខណៈដែលកំពុងអង្គុយនិយាយគ្នាលេង ស្រាប់តែមានជនសង្ស័យម្នាក់បានមកឆក់កាបូបពីរូបនាង ហើយរត់គេចខ្លួន ភ្លាមៗនោះបងប្រុសនារីរងគ្រោះបានរត់ដេញតាមពីក្រោយ និងបានស្រែកឆោឡោឡើងថា ចោរៗបង្កឱ្យមានការភ្ញាក់ផ្អើលដល់ប្រជាពលរដ្ឋដេញចាប់បាននៅចំណុចផ្លូវលេខ១១៣ កែងផ្លូវលេខ៣០៦ វាយឡើងទ្រោមខ្លួន រួចទើបប្រគល់ទៅឱ្យសមត្ថកិច្ច។
សមត្ថកិច្ចបានឲ្យដឹងថា ជនសង្ស័យខាងលើមានឈ្មោះ រដ្ឋ សំណាង អាយុ២៦ឆ្នាំ មានស្រុកកំណើតនៅសង្កាត់បឹងព្រលឹត ខណ្ឌ៧មករា មានទីលំនៅមិនពិតប្រាកដ។ ចំណែកនារីរងគ្រោះជាម្ចាស់កាបូប មានឈ្មោះ ឡេង មួយហុង អាយុ២០ឆ្នាំ ជានិស្សិតសកលវិទ្យាល័យភូមិន្ទសេដ្ឋកិច្ច ស្នាក់នៅផ្ទះលេខ D១ តាមបណ្តោយផ្លូវសហព័ន្ធរុស្ស៊ី ស្ថិតក្នុងបុរីលឹម ឈាងហាក់ ភូមិព្រៃទា សង្កាត់កាកាប ខណ្ឌពោធិ៍សែនជ័យ។
សមត្ថកិច្ចបាននាំខ្លួនជនសង្ស័យយកទៅសួរនាំបន្តនៅប៉ុស្តិ៍នគរបាលរដ្ឋបាលបឹងកេងកងទី៣ ដើម្បីកសាងសំណុំរឿងចាត់ការទៅតាមផ្លូវច្បាប់៕
ឌួងវិរះជ័យ
0 Comments