តាកែវ ៖ យ៉ាងហោចណាស់មនុស្ស៣នាក់ បានបាត់បង់ជីវិតនៅកន្លែងកើតហេតុ និងម្នាក់ទៀតរងរបួសធ្ងន់ដោយសារគ្រោះថ្នាក់ចរាចរណ៍ រវាងម៉ូតូនិងម៉ូតូបុកគ្នានៅលើកំណាត់ផ្លូវជាតិលេខ៣ ចន្លោះគីឡូម៉ែត្រលេខ៣៧.៣៨ ចំណុចក្នុងភូមិទួលល្ហុង ឃុំតាំងដូង ស្រុកបាទី ខេត្តតាកែវ កាលពីវេលាម៉ោង២០និង៣០នាទីយប់ ថ្ងៃទី១៨ ខែមករា ឆ្នាំ២០១៥។
ប៉ូលិសចរាចរណ៍ស្រុកបាទីបានឲ្យដឹងថា ជនរងគ្រោះដែលបាត់បង់ជីវិត និងរងរបួសនោះគឺទី១-មានឈ្មោះ ម៉ៃ ដារ៉ា ភេទប្រុស អាយុ២៤ឆ្នាំ មានទីលំនៅភូមិថ្លុកមាន ឃុំស្នំក្រពើ ស្រុកគងពីសី ខេត្តកំពង់ស្ពឺ ជានាក់បើកម៉ូតូម៉ាកC125 ពណ៌ខ្មៅ ពាក់ស្លាកលេខភ្នំពេញ 1BS.8929 ស្លាប់នៅកន្លែងកើតហេតុ ទី២-ឈ្មោះដុំ វិបុល ភេទប្រុស អាយុ២៣ឆ្នាំ ជានាក់រួមដំណើរជាមួយឈ្មោះ ម៉ៃ ដារ៉ា នៅភូមិ/ឃុំជាមួយគ្នារងរបួសធ្ងន់ ទី៣-ឈ្មោះ ឡន សុភក្ត្រ័ ភេទប្រុស អាយុ២៤ឆ្នាំ មានទីលំនៅភូមិក្រាំងឈើនាង ឃុំត្បែង ស្រុកកណ្ដាលស្ទឹង ខេត្តកណ្តាល ជានាក់បើកម៉ូតូ C125 ពណ៌ខ្មៅ ពាក់ស្លាកលេខភ្នំពេញ1BP.4233 ស្លាប់នៅកន្លែងកើតហេតុ និងទី៤-ឈ្មោះ ផេង វីរះ ភេទប្រុស អាយុ២៣ឆ្នាំ ជានាក់រួមដំណើរ មានទីលំនៅភូមិ/ឃុំជាមួយគ្នាស្លាប់នៅកន្លែងកើតហេតុ។
សាក្សីនៅកន្លែងកើតហេតុបានឲ្យដឹងថា នៅម៉ោងប្រហែលជាង០៨យប់ មានម៉ូតូពីរគ្រឿងបានធ្វើដំណើរបញ្ច្រាសទិសគ្នា នៅលើកំណាត់ផ្លូវជាតិលេខ៣ លុះមកដល់ចំណុចគីឡូម៉ែត្រលេខ៣៧.៣៨ ក៏ស្រាប់តែបុកគ្នាយ៉ាងពេញទំហឹងស្នូរលឺតែប្រាវ ពេលនោះឃើញមានមនុស្ស៤នាក់ដេករដូករណែលក្នុងថ្លុកឈាម ជាប់នៅម៉ូតូរៀងៗខ្លួន លើទ្រូងផ្លូវ គឺក្នុងនោះមានមនុស្ស៣នាក់បានដាច់ខ្យល់ស្លាប់ និងម្នាក់របួសធ្ងន់កំពុងស្រែកដង្ហោយរកការជួយសង្គ្រោះ។
ប៉ូលិសចរាចរណ៍ស្រុកបាទីបានបញ្ជាក់ឲ្យដឹងថា ជនរងគ្រោះទាំង៤នាក់នោះមិនមានពាក់មួកសុវត្ថិភាព ហើយការគ្រោះថ្នាក់នេះ ភាគីទាំងសងខាងសុទ្ធតែមិនគោរពច្បាប់ចរាចរណ៍ដូចគ្នា បើកបរម៉ូតូនៅលើទ្រូងផ្លូវ និងមានល្បឿនលឿនទៀតផង។
បច្ចុប្បន្នសាកសពជនរងគ្រោះទាំង៣នាក់នេះ ត្រូវបានសមត្ថកិច្ចនគរបាលស្រុកបាទីប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី រីឯអ្នករងរបួសម្នាក់ទៀត បានចាត់បញ្ជូនទៅកាន់មន្ទីរពេទ្យធ្វើការសង្គ្រោះ ចំណែកវត្ថុតាងមានម៉ូតូចំនួនពីរគ្រឿង ជំនាញបានយកមករក្សាទុកនៅអធិការដ្ឋាននគរបាលស្រុកបាទីដើម្បីអនុវត្តតាមនីតិវិធីច្បាប់៕
មុនី
0 Comments