ភ្នំពេញ ៖ នាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានអន្តោប្រវេសន៍ បានមានប្រសាសន៍ថា «អាជ្ញាធរមូលដ្ឋាន និងសមត្ថកិច្ចត្រូវបញ្ឈប់ការធ្វើសំបុត្រកំណើត សៀវភៅគ្រួសារ និងអត្តសញ្ញាណប័ណ្ណ ឲ្យជនបរទេសព្រោះទង្វើទាំងនេះជាអំពើខុសច្បាប់ និងធ្វើឲ្យការងារគ្រប់គ្រងជនបរទេសមានផលលំបាក និងអាចធ្វើឲ្យប៉ះពាល់ដល់សន្តិសុខជាតិ ដែលបង្កឡើងដោយភាវរកម្មបរទេស»។ នាយឧត្តមសេនីយ៍អគ្គនាយក បានលើកឡើងបែបនេះនៅក្នុងកិច្ចប្រជុំផ្សព្វផ្សាយការងារជំរឿន ពិនិត្យអត្ថពលករបរទេសនៅក្នុងស្នងការដ្ឋាននគរបាលខេត្តកំពង់ឆ្នាំង។នៅក្នុងពិធីនេះផងដែរ នាយឧត្តមសេនីយ៍សុខផល បានប្រគល់នូវកាណូតបាឡាស្មាច់២គ្រឿង
កុំព្យូទ័រមួយគ្រឿង និងរថយន្ត១គ្រឿងដល់ការិយាល័យអន្តោប្រវេសន៍ នៃស្នងការនគរបាលខេត្តដើម្បីប្រើប្រាស់ជាផ្លូវការ។
នាយឧត្តមសេនីយ៍សុខ ផលបានសំណូមពរដល់អាជ្ញាធរមូលដ្ឋាន និងសមត្ថកិច្ចគ្រប់គ្រង ឲ្យបាននូវការចេញចូល និងស្នាក់អាស្រ័យរបស់ជនបរទេសនៅក្នុងមូលដ្ឋាន ត្រូវពង្រឹងការអនុវត្តន៍ ច្បាប់អន្តោប្រវេសន៍ឲ្យបានម៉ឺងម៉ាត់ ដោយផ្សព្វផ្សាយអោយជនបរទេសអន្តោ ប្រវេសន៍ស្របច្បាប់ អោយ ចូលបង់អាករប្រចាំឆ្នាំតាមគោលការណ៍ច្បាប់។
បើតាមលោកឧត្តមសេនីយ៍ត្រី ប្រាក់ វុទ្ធី ស្នងការនគរបាលខេត្តកំពង់ឆ្នាំង បានរាយការណ៍ឲ្យដឹងថា ការជំរឿនជនបរទេស អន្តោប្រវេសន៍នៅក្នុងខេត្តកំពង់ឆ្នាំង មានចំនួន២.៤៧៨គ្រួសារ ក្នុងនោះមានមនុស្សរួម១០.៥១៨នាក់ ស្រី៥.០៦២នាក់ បានត្រួតពិនិត្យអត្ថពលករបាន២៥ក្រុមហ៊ុន មានមនុស្សរួម៤៦៨នាក់ មាន៤សញ្ជាតិ ក្នុងបានចាប់បញ្ជូនជនបរទេសខុសច្បាប់ចំនួន២៤នាក់ បញ្ជូនទៅអគ្គនាយកដ្ឋានអន្តោប្រវេសន៍។ ក្នុងនោះបានពិន័យជនបរទេសដែលពុំមានសៀវភៅការងារ និងប័ណ្ណការងារតាមរោងចក្រ សហគ្រាស បានចំនួន២២នាក់ និងបានផាកពិន័យក្នុងម្នាក់ៗ ៥០ម៉ឺនរៀល ស្មើនឹងទឹកប្រាក់១១លានរៀលចូលថវិការដ្ឋ។
លោក ឈួរ ច័ន្ទឌឿន ប្រធានគណៈបញ្ជាការឯកភាពរដ្ឋបាលខេត្តកំពង់ឆ្នាំង បានថ្លែងឲ្យ ដឹងថា កន្លងមកគណៈកម្មការជំរឿនជនបរទេសថ្នាក់ខេត្ត មានការលំបាកស្មុគស្មាញមួយ ចំនួន ដោយ សារជនបរទេសភាគច្រើនរស់នៅលើផ្ទៃទន្លេ និងបានផ្លាស់ទីតាំងជាញឹក ញាប់ធ្វើអោយ ប៉ះ ពាល់ ដល់បរិស្ថាន និងសុខមាលភាពប្រជាពលរដ្ឋ តាមរយៈការប្រើប្រាស់ទឹកយ៉ាងធ្ងន់ធ្ងរ។ ជនបរទេសមួយចំនួនបានលួចសម្ងំធ្វើការងារដោយគ្មានប័ណ្ណការងារ និងមិនគោរពច្បាប់អន្តោ ប្រវេសន៍។ កន្លងមកសមត្ថកិច្ចអាជ្ញាធរដែនដីមិនទាន់យល់ច្បាស់អំពីច្បាប់អន្តោប្រវេសន៍ ពេលខ្លះពួកគេឃុបឃិតលាក់បាំងដោយគិតថា បញ្ហានេះជាបញ្ហាធម្មតា៕
0 Comments