ព្រះសីហនុ ៖ ព្រឹកថ្ងៃទី១២ ខែមករា ឆ្នាំ២០១៥ ការិយាល័យកណ្ដាលប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តព្រះសីហនុធ្វើការផ្សព្វផ្សាយផលប៉ះពាល់ដោយសារគ្រឿងញៀនដល់សិស្សានុសិស្សនៅវិទ្យាល័យស្រុកស្ទឹងហាវចំនួន៥១០នាក់ ស្រី២៦៤នាក់ ក្រោមអធិបតីភាពលោកសាន់ ប៊ុនថន ស្នងការរងទទួលបន្ទុកប្រធានការិយាល័យកណ្ដាលប្រឆាំងបទល្មើស។
លោក សាន់ ប៊ុនថន មានប្រសាសន៍ថា គ្រឿងញៀនមានពីរប្រភេទ គឺគ្រឿងញៀនប្រភេទរុក្ខជាតិមានដូចជា ស្រា បារី កញ្ឆា ចំណែកគ្រឿងញៀនសំយោគមានដូចជា ដើមរុក្ខជាតិយកមកផ្សំសំរាញ់លាយជាមួយជាតិគីមី បម្លែងទៅជាថ្នាំញៀនប្រភេទមេតំហ្វេតាមីនគ្រាប់ WY និងមេតំហ្វេតាមីន ICE ទឹកកក ដែលកំពុងចរាចរនៅទូទាំងប្រទេសកម្ពុជា ព្រោះកាលណាយើងបានប្រើប្រាស់គ្រឿងញៀនហើយវាអាចបង្កផលប៉ះពាល់ដល់គ្រួសារ សង្គមជាតិជាពិសេសបាត់បង់នូវធនធានមនុស្សយ៉ាងធ្ងន់ធ្ងរបាត់បង់ថវិកា និងមានការឆ្លងរាលដាលមេរោគអេដស៍ ជំងឺអេដស៍ ដោយសារការម្ជុលចាក់រួមគ្នាបញ្ហាទាំងនេះដែលនាំឲ្យយើងធ្វើការផ្សព្វផ្សាយទូលំទូលាយចូលរួមលុបបំបាត់ ជាពិសេសការរត់ពន្ធដោយខុសច្បាប់ និងការស្រាវជ្រាវការកាប់បំផ្លាញព្រៃឈើខុសច្បាប់ ដូច្នេះយើងទាំងអស់គ្នាចូលរួមសហការទប់ស្កាត់នូវការធ្វើចរាចរគ្រឿងញៀនដែលនាំចូលផ្ទៃក្នុងភូមិសាស្ត្រឲ្យមានប្រសិទ្ធភាពខ្ពស់ និងចៀសឲ្យឆ្ងាយពីគ្រឿងញៀន។
លោក តាក សារិទ្ធិ នាយការិយាល័យប្រឆាំងគ្រឿងញៀនបានធ្វើបទបង្ហាញជូនដល់សិស្សានុសិស្ស ដោយបានបញ្ជាក់ថា គ្រឿងញៀនបានធ្វើឲ្យប៉ះពាល់ដល់បុគ្គលបាត់បង់លុយកាក់ បាត់បង់ការសិក្សា បាត់បង់កិត្តិយស និងភាពថ្លៃថ្នូរ ប្រឈមមុខនឹងការឆ្លងជំងឺផ្សេងៗ បាត់បង់មិត្តល្អ បាត់បង់គ្រួសារមានដូចជា ទ្រព្យសម្បត្តិ កិត្តិយសគ្រួសារ មានអំពើហិង្សាក្នុងគ្រួសារ បាត់បង់សាច់ញាតិ ប៉ះពាល់សហគមន៍ កើតមានអំពើលួច ឆក់ ប្លន់ អំពើហិង្សាកើតមានញឹកញាប់ គ្រោះថ្នាក់ចរាចរ បាត់បង់ចំណូលសហគមន៍លើវិស័យទេសចរណ៍ជាដើម។ សង្គមជាតិបាត់បង់នូវធនធានមនុស្ស ខ្វះការពង្រឹងប្រតិបត្តិច្បាប់ទប់ស្កាត់ការប្រើប្រាស់គ្រឿងញៀន ត្រូវចំណាយថវិកាច្រើនលើសលុបឥតប្រយោជន៍សេដ្ឋកិច្ចជាតិមិនរីកចម្រើនបាត់បង់កិត្តិយសជាតិ។
លោកបានបញ្ជាក់ទៀតថា គ្រឿងញៀនជាសារធាតុមានឥទ្ធិពលលើប្រព័ន្ធសរសៃប្រសាទ ធ្វើឲ្យអ្នកប្រើប្រាស់ញៀនខ្លាំងពិបាកក្នុងការបញ្ឈប់ការប្រើប្រាស់គ្រឿងញៀនមិនមែនជាការដោះស្រាយបញ្ហាបានទេ វាគ្រាន់តែជាសោកនាដកម្មបន្ថែមមួយថ្មីទៀតតែប៉ុណ្ណោះ ព្រោះគ្រឿងញៀនមិនមែនជាចំណីអាហារដែលអាចភ្លក់ ឬសាកល្បងបានទេ គ្រឿងញៀនមិនមែនជាឱសថលើកកម្លាំង ដើម្បីទ្រាំទ្រង់នឹងការងារធ្ងន់ធ្ងរទេ ការប្រើប្រាស់គ្រឿងញៀនមិនអាចបំភ្លេចទុកកង្វល់បានទេ ប៉ុន្តែទម្រាំដឹងខ្លួនថាខុសនោះ ខ្លួនយើងញៀនរួចស្រេចទៅហើយ ដែលជាបញ្ហាធ្លាក់មកលើក្រុម គ្រួសារ សាច់ញាតិ ដូច្នេះយើងមិនត្រូវសាកល្បងប្រើប្រាស់គ្រឿងញៀននាំទុកដាក់ខ្លួន ហើយការបោះបង់គ្រឿងញៀនគឺជាការសម្រេចចិត្តត្រឹមត្រូវល្អបំផុតដើម្បីអនាគតរបស់ប្អូនៗ។
នៅក្នុងឧកាសនោះលោក សាន់ ប៊ុនថន ក៏បានប្រគល់ផ្លូវបេតុងដែលមានទទឹង៥ម៉ែត្រ បណ្តោយ៦០ម៉ែត្រ ដែលជាអំណោយរបស់លោក សហការី និងសប្បុរសជនបានជួយសាងសង់ផ្លូវនេះដោយចំណាយថវិកាជាង៥.០០០ដុល្លារអាមេរិក ព្រមទាំងចែកអំណោយជូនដល់សិស្សក្រីក្រចំនួន៣០នាក់ ស្រី២០នាក់ ក្នុងម្នាក់ទទួលបានខោអាវមួយកំប្លេ និងថវិកា២០.០០០រៀល និងផ្តល់ថវិកាជូនការិយាល័យអប់រំស្រុក៥០០.០០០រៀល សាលាវិទ្យាល័យស្រុកស្ទឹងហាវ៥០០.០០០រៀល គណបក្សស្រុកស្ទឹងហាវ៥០០.០០០រៀល ដោយឡែកអង្គការម្លប់តាប៉ាង ក៏បានផ្តល់ខោអាវម្នាក់មួយកំប្លេ និងសម្ភារសិក្សាមានការតាបស្ពាយ សៀវភៅ ខ្មៅដៃ ប៊ិច មួយចំនួនជូនដល់សិស្សក្រីក្រផងដែរ៕ ស៊ុយ ចាន់ធា
0 Comments