លោតពីលើអាគារកម្ពស់១៤ជាន់រងរបួសធ្ងន់ សង្ស័យតូចចិត្តនឹងម្ចាស់សណ្ឋាគារមិនព្រមបើកប្រាក់អោយ
ភ្នំពេញ ៖ បុរសម្នាក់បានសម្រេចចិត្តលោតពីលើអាគារ ISL ម៉ូដែនអាផាតម៉េននិងជាសណ្ឋាគារកម្ពស់១៤ជាន់បណ្ដាលឲ្យរងរបួសធ្ងន់ ដែលការលោតសម្លាប់ខ្លួននេះត្រូវបានគេដាក់ការសង្ស័យថា តូចចិត្តនឹងម្ចាស់សណ្ឋាគារមិនព្រមបើកប្រាក់ខែអោយ ហើយក្រោយពេលកើតហេតុជនរងគ្រោះក៏ត្រូវបានគេដឹកបញ្ជូនទៅកាន់មន្ទីរពេទ្យភ្លាមដែរ។
ហេតុការណ៍នៃការធ្វើអត្តឃាតនេះបានកើតឡើងកាលពីវេលាម៉ោង១១ និង១០នាទីស្ថិតក្នុងអាគារ ISL ម៉ូដែនអាផាតម៉េននិងជាសណ្ឋាគារ ផ្លូវលេខ៣១៣ សង្កាត់បឹងកក់ទី១ ខណ្ឌទួលគោក។
បើតាមសំដីរបស់ក្រុមគ្រួសារជនរងគ្រោះបានឲ្យដឹងថា ជនរងគ្រោះមានឈ្មោះគង់ ចាន់ណាភេទប្រុស អាយុ៣២ឆ្នាំ ធ្វើការនៅនិងកន្លែងកើតហេតុខាងលើផ្នែកសំអាតបានមកសុំបើកប្រាក់ខែជាច្រើនលើកច្រើនសាប៉ុន្តែខាងម្ចាស់សណ្ឋាគារមិនព្រមបើកឲ្យទេថែមទាំងជេរប្រមាថទៀត។ លុះមកដល់ព្រឹកថ្ងៃកើតហេតុនេះជនរងគ្រោះទំនងជាមានការតូចចិត្តនឹងម្ចាស់ទីតាំងខាងលើទើបសម្រេចចិត្តលោតពីលើអាគារទាំងកំរោលតែម្ដង។ ប៉ុន្តែមិនស្លាប់នោះទេ ដោយបានរងរបួសយ៉ាងធ្ងន់ធ្ងរ។
ខណៈពេលដែលមានរឿងហេតុនេះកើតឡើងក្រុមអ្នកយកព័ត៌មានជាច្រើនបានទៅដល់កន្លែងកើតហេតុដើម្បីផ្តិតយករូបភាពប៉ុន្តែពេលនោះខាងសណ្ឋាគារហាក់ដូចជាមានការលាក់លៀមជាមួយអ្នកសារព័ត៌មាននិងមិនមានការបំភ្លឺអ្វីទាំងអស់។
គួរបញ្ជាក់ទៀតថា អាគារខាងលើនេះធ្លាប់បានធ្លាក់កូនក្មេងជនជាតិបរទេសម្ដងហើយកាលប៉ុន្មានខែមុនកន្លងទៅនេះ៕
ស្រីរ័ត្ន
0 Comments