កំពង់ឆ្នាំង ៖ ជនជាតិខ្មែរឥស្លាមម្នាក់ ត្រូវបានសមត្ថកិច្ចនគរបាលព្រហ្មទណ្ឌស្រុកកំពង់ត្រឡាចចាប់ខ្លួននៅព្រឹកថ្ងៃទី១១ ខែមករា ឆ្នាំ២០១៥ នៅភូមិព្រៃពីស ឃុំឈូកស ស្រុកកំពង់ត្រឡាច បន្ទាប់ពីជនសង្ស័យនេះទទួលទិញគោញី២ក្បាលពីចោរម្នាក់ កាលពីថ្ងៃទី១០ ខែមករា ឆ្នាំ២០១៥ ក្នុងតម្លៃជាង៤លានរៀល។
សមត្ថកិច្ចនគរបាលស្រុកកំពង់ត្រឡាចបានឲ្យដឹងថា ជនសង្ស័យជាអ្នកទទួលផលចោរកម្មរូបនេះមានឈ្មោះ ស៊ីត វណ្ណនី អាយ២៣ឆ្នាំ មានទៅលំនៅភូមិព្រៃពីស ឃុំឈូកស ស្រុកកំពង់ត្រឡាច។ ចំណែកឯជនដៃដល់ជាចោរមានឈ្មោះ អឿ គឹមសេង អាយុ៤៤ឆ្នាំ មានទៅលំនៅភូមិទ័ពស្រូវ ឃុំបន្ទាយព្រាល ស្រុករលាប្អៀរ។
សមត្ថកិច្ចឲ្យដឹងទៀតថា កាលពីថ្ងៃទី៩ ខែមករា ឆ្នាំ២០១៥ ម្ចាស់គោឈ្មោះ យឹម ប៊ន រស់
នៅភូមិព្រះរាមរង្សី ឃុំជ្រៃបាក់ ស្រុករលាប្អៀរ និងម្ចាស់គោម្នាក់ទៀតឈ្មោះ អ៊ឹង ស៊ត រស់នៅភូមិ ត្រពាំងក្រវាន់ ឃុំជ្រៃបាក់ជាមួយគ្នា បានបាត់គោញីចំនួន២ក្បាល ក្រោយពេលបាត់គោ ម្ចាស់គោទាំង២នាក់បានដាក់ពាក្យប្ដឹងសមត្ថកិច្ចនគរបាលមូលដ្ឋាន ហើយបាននាំគ្នាដើររកគោ ក៏បានប្រទះឃើញគោរបស់ខ្លួននៅជាមួយឈ្មោះ ស៊ីត វណ្ណី នៅស្រុកកំពង់ត្រឡាច ហើយបានប្ដឹងសមត្ថកិច្ចនៅទីនោះ ទើបមានការចាប់ឃាត់ខ្លួនឈ្មោះ ស៊ីត វណ្ណនី។
នៅចំពោះមុខសមត្ថកិច្ចនគរបាល ជនសង្ស័យឈ្មោះ ស៊ីវណ្ណនី បានសារភាពថា រូបគេបានទិញគោញី២ក្បាលនេះពីឈ្មោះ អឿ គឹមសេង ក្នុងតម្លៃ៤លាន២០ម៉ឺនរៀល តែមិនទាន់បានឲ្យលុយទេ ចាំ២ថ្ងៃទៀតទើបបានលុយ។
មន្ត្រីនគរបាលបាននិយាយថា ក្រោយពីបានចម្លើយនេះរួចមក ព្រលឹមស្រាងៗ ថ្ងៃទី១១ ខែមករា ឆ្នាំ២០១៥ មន្ត្រីនគរបាលស្រុកសហការជាមួយខេត្ត បានទៅផ្ទះឈ្មោះ អឿ គឹមសេង បំណងទៅចាប់ខ្លួន ប៉ុន្តែគ្រាន់តែនគរបាលដែលបានក្លែងឯកសណ្ឋានស្លៀកពាក់ស៊ីវិលទៅដល់មុខផ្ទះជនសង្ស័យខាងលើនេះស្រាប់តែឈ្មោះ អឿ គឹមសេង ស្ទុះហក់តាមទ្វារក្រោយគេចខ្លួនបាត់តែម្តង។
មន្ត្រីនគរបាលបានប្រគល់គោចំនួន២ក្បាលឲ្យទៅម្ចាស់ដើមវិញ និងបានកសាងសំណុំរឿង
ឈ្មោះ ស៊ីត វណ្ណនី ពីបទទទួលផលចោរកម្មទៅតុលាការ និងសុំដីកាចាប់ខ្លួនតាមចាប់ជនដៃដល់ឈ្មោះ អឿ គឹមសេង ដែលកំពុងតែរត់គេចខ្លួន៕ ពៅ សុខហ៊ាន
0 Comments