ភ្នំពេញ ៖ កម្លាំងប៉ូលិសខណ្ឌឫស្សីកែវបានធ្វើការស្រាវជ្រាវឈានទៅចាប់ឃាត់ខ្លួនបក្ខពួកជនសង្ស័យបានជាបន្តបន្ទាប់ ខណៈជនសង្ស័យ និងបក្ខពួកបានធ្វើសកម្មភាពកាត់សោរបងផ្ទះគេលួចម៉ូតូ កាលពីថ្ងៃទី២៥ ខែតុលា ឆ្នាំ២០១៤ នៅសង្កាត់ទួលទំពូង ខណ្ឌចំការមន រួចគេចខ្លួនបាត់រយៈពេលជាង២ខែ។
ហេតុការណ៍ឃាត់ខ្លួនជនសង្ស័យកាលពីវេលាម៉ោង១រំលងអាធ្រាត្រឆ្លងចូលថ្ងៃទី១១ ខែមករា ឆ្នាំ២០១៥ នៅចំណុចផ្ទះលេខ៧០កែងផ្លូវបេតុងកា៥ ស្ថិតនៅក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ។
សមត្ថកិច្ចបានឱ្យដឹងថា ជនសង្ស័យឈ្មោះ សុះ សាឡេះ ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅផ្ទះលេខ១៧៣ ផ្លូវជាតិលេខ៥ សង្កាត់ច្រាំងចំរេះទី១ ខណ្ឌឫស្សីកែវ។ ចំណែកជនរងគ្រោះឈ្មោះ ហៃ សេងលីន ភេទប្រុស អាយុ២៣ឆ្នាំ មុខរបរជំនួយការលោកក្រឡាបញ្ជីព្រះរាជអាជ្ញារងអមសាលាដំបូងរាជធានីភ្នំពេញស្នាក់នៅផ្ទះលេខ554EO ផ្លូវលេខ១៦៣ សង្កាត់ទួលទំពូង ខណ្ឌចំការមន រាជធានីភ្នំពេញ។
ប៉ូលិសបានឲ្យដឹងទៀតថា កាលពីវេលាម៉ោង១៥និង១០នាទី ថ្ងៃទី៣ ខែវិច្ឆិកា ឆ្នាំ២០១៤សមត្ថកិច្ចឃាត់ខ្លួនជនសង្ស័យម្នាក់ ឈ្មោះ សេត សារី ភេទប្រុស អាយុ២០ឆ្នាំ ស្នាក់នៅផ្ទះគ្មានលេខផ្លូវជាតិលេខ៥ ក្រុម៤ សង្កាត់ច្រាំងចំរេះទី២ ខណ្ឌឫស្សីកែវ រួមនិងម៉ូតូម៉ាកនិច ពណ៌សគ្មានស្លាកលេខដែលជនសង្ស័យកាត់សោបងផ្ទះរបស់ជនរងគ្រោះលួចយកកាលពីយប់ថ្ងៃទី២៥ ខែតុលាឆ្នាំ២០១៤កន្លងមក។ បន្ទាប់ពីចាប់ឃាត់ខ្លួនជននេះនិងបាននាំជនសង្ស័យមកសាកសួរ ដោយគេក៏បានឆ្លើយថា ម៉ូតូដែលខ្លួនជិះនេះគឺគេខ្ចីពីឈ្មោះ សុះ សាឡេះ ក្រោយពីប៉ូលិសពីសាកសួររួចក៏បានអនុញ្ញាតឲ្យ សេត សារី វិលត្រឡប់ទៅផ្ទះវិញ។
សមត្ថកិច្ចជំនាញក្រោយទទួលបានមុខសញ្ញាច្បាស់ ហើយក៍បានសុំគោលការណ៍ពីលោកគឺ ប៉ុណ្ណារ៉ាព្រះរាជអាជ្ញារងអមសាលាដំបូងរាជធានីភ្នំពេញដើម្បីឈានទៅធ្វើការឃាត់ខ្លួនជនសង្ស័យឈ្មោះ សុះ សាឡេះ នាំមកកាន់ប៉ុស្តិ៍ប៉ូលិសទួលសង្កែធ្វើការសាកសួររួចបញ្ជូនបន្តទៅអធិការដ្ឋានខណ្ឌឫស្សីកែវដើម្បីកសាងសំណុំរឿងបញ្ជូនទៅតុលាការក្រុងភ្នំពេញចាត់ការតាមនីតិវិធីច្បាប់៕ ឌីរៀ
0 Comments