ភ្នំពេញ ៖ សិក្ខាសាលាបណ្ដុះបណ្ដាលស្តីពី" ការកសាងសមត្ថភាពក្នុងការកាត់បន្ថយការប្រែប្រួលអាកាសធាតុ និងអត្ថប្រយោជន៍នានាដែលទទួលបានក្នុងវិស័យព្រៃឈើ" ត្រូវបានរៀបចំឡើងដោយរាជបណ្ឌិត្យសភាកម្ពុជា និងសាកលវិទ្យាល័យហ៊ីយោហ្គោ កាលពីថ្ងៃទី៨ ខែមករា ឆ្នាំ២០១៥នៅសណ្ឋាគារឡឺរ៉ូយ៉ាល់ ក្រោមការឧបត្ថម្ភដោយលេខាធិការដ្ឋានអាស៊ាន និងមូលនិធិសមាហរណកម្មជប៉ុន- អាស៊ាន។
លោកស្រីបណ្ឌិតសភាចារ្យ ខ្លូត ធីតា ប្រធានរាជបណ្ឌិតសភាកម្ពុជាបានមានប្រសាសន៍គូសបញ្ជាក់ឲ្យដឹងថា សិក្ខាសាលាសាលាបណ្ដុះបណ្ដាលស្តីពី" ការកសាងសមត្ថភាពក្នុងការកាត់បន្ថយការប្រែប្រួលអាកាសធាតុ និងអត្ថប្រយោជន៍នានាដែលទទួលបានក្នុងវិស័យព្រៃឈើ" ដែលបានរៀបចំឡើងនេះមានរយៈពេល៨ថ្ងៃ ចាប់ពីថ្ងៃទី៨ដល់ថ្ងៃទី១៥ខែមករាឆ្នាំ២០១៥ ក្នុងរយៈពេលនេះគឺសិក្ខាកាមទាំងអស់ក៏ត្រូវចុះទៅទស្សនកិច្ចនៅខេត្តគោលដៅក្នុងខេត្តព្រះវិហារ ហើយវត្ថុបំណងសំខាន់នៃគម្រោងនេះគឺផ្តល់នូវសមត្ថភាពយល់ដឹងអំពីការកាត់បន្ថយផលប៉ះពាល់នៃបម្រែបម្រួលអាកាសធាតុ តួនាទីរបស់ព្រៃឈើ និងវិធីសាស្ត្រកាត់បន្ថយបម្រែបម្រួលអាកាសធាតុ។ជាមួយគ្នានេះ សិក្ខាកាមនឹងបានស្វែងយល់ថា តើអាស៊ានអាចទទួលបាននូវអត្ថប្រយោជន៍យ៉ាងដូចម្តេចខ្លះពីគម្រោងការកាត់បន្ថយការបំភាយ ឧស្ម័នពីការកាប់បំផ្លាញព្រៃ និងការថយចុះនៃព្រៃឈើនៃអនុសញ្ញាក្របខណ្ឌ សហប្រជាជាតិស្ដីពីបម្រែបម្រួលអាកាសធាតុ។ ឯការចុះទៅទស្សនកិច្ចសិក្សានៅគោលដៅក្នុងខេត្តព្រះវិហារនោះគឺដើម្បីផ្ដល់ដល់សិក្ខាកាមនូវសមត្ថភាពក្នុងការពិភាក្សាអំពីស្ថានភាពពិតប្រាកដ នៃបញ្ហាសង្គម សេដ្ឋកិច្ច ហើយរកវិធីសាស្ត្រស្រោចស្រង់សហគមន៍ទាំងនោះដែលរស់នៅអាស្រ័យដោយព្រៃឈើ។
លោកស្រីបណ្ឌិត្យសភាចារ្យបានបន្តសិក្ខាសាលានេះ មានធនធានគ្រូឧទ្ទេសសម្រាប់បណ្ដុះបណ្ដាល ដែលអញ្ជើញមកពីប្រទេសជប៉ុនចំនួន៦នាក់ពីប្រទេសអាស៊ានចំនួន៣នាក់ កម្ពុជា៦នាក់ និងវាគ្មិនជាន់ខ្ពស់ដែលអញ្ជើញមកពីក្រសួងស្ថាប័នជំនាញចំនួន៧រូប។ សិក្ខាកាមគោលដៅរបស់យើង គឺជាមន្ត្រីរដ្ឋាភិបាល និងអ្នកស្រាវជ្រាវពីបណ្ដាប្រទេសអាស៊ានសរុបចំនួន៥៨រូប ក្នុងនោះកម្ពុជាចំនួន៤០នាក់។ ចំពោះប្រធានបទសិក្សារួមមាន១. ប្រធានបទគោលដែលពាក់ព័ន្ធនឹងគោលបំណងសិក្ខាសាលាអន្តរជាតិ ២.តួនាទីរបស់ព្រៃត្រូពិកសម្រាប់កាត់បន្ថយបម្រែបម្រួលអាកាសធាតុ ៣.បម្រែបម្រួលអាកាសធាតុសម្របទៅតាមស្ថានការណ៍ ៤.ទស្សនកិច្ចសិក្សាទៅកាន់តំបន់ព្រៃឈើគោលដៅ តំបន់អេកូទេសចរណ៍ និងប្រាសាទព្រះវិហារក្នុងខេត្តព្រះវិហារ ៥. ការអនុវត្តលើការគ្រប់គ្រងព្រៃឈើ ៦.គម្រោងផែនការREDD+ និងការកាត់បន្ថយបម្រែបម្រួលអាកាសធាតុ ៧. ការសម្រេចបាននូវការកាត់បន្ថយការសាយភាយឧស្ម័នកាបូន ៨.អភិបាលកិច្ច និងការចេញលិខិតព្រៃឈើ និង៩.បទពិសោធន៍ស្តីពីហិរញ្ញវត្ថុកាបូន។ ការរៀបចំសិក្ខាសាលានាពេលនេះគឺជាការរួមចំណែកចំពេលវេលាមួយជាមួយក្រសួង ស្ថាប័នជំនាញ ជាពិសេសក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទដែលជាសេនាធិការរបស់រាជរដ្ឋាភិបាលកម្ពុជា និងជាការចូលរួមអនុវត្តនូវផែនការយុទ្ធសាស្ត្រក្នុងការលើកកម្ពស់ភាពជាដៃគូ និងចូលរួមពហុស្ថាប័នសំដៅពង្រឹងយុទ្ធសាស្ត្រកាត់បន្ថយ និងបន្សាំខ្លួនទៅនឹងការប្រែប្រួលអាកាសធាតុក្នុងតំបន់អាស៊ាន និងសកលលោក។
ស្របពេលដែលរាជរដ្ឋាភិបាលដែលមានសម្តេចតេជោបណ្ឌិតសភាចារ្យ ហ៊ុន សែន ជាប្រមុខដឹកនាំបានកំពុងអនុវត្តយ៉ាងសកម្មនូវសកម្មភាពកាត់បន្ថយ និងបន្សាំខ្លួនទៅនឹងការប្រែប្រួលអាកាសធាតុដែលស្តែងចេញតាមរយៈគម្រោងការច្បាប់ និងគោលនយោបាយជាតិនានា ដូចជាផែនការយុទ្ធសាស្ត្រជាតិសម្រាប់ការអភិវឌ្ឍ បៃតង២០១៣-២០៣០ ផែនការយុទ្ធសាស្ត្របម្រែបម្រួលអាកាសធាតុកម្ពុជា ២០១៤-២០២៤ ផែនការអភិវឌ្ឍយុទ្ធសាស្ត្រជាតិ២០១៤-២០១៨និងកម្មវិធីព្រៃឈើជាតិ២០១៩-២០២៩ជាដើម៕
0 Comments