ប៉ៃលិន ៖ យុវជនម្នាក់រងរបួសធ្ងន់សន្លប់បាត់ស្មារតី និងម្នាក់ទៀតរងរបួសជើងឆ្វេងស្រាល ក្នុងករណីគ្រោះថ្នាក់ចរាចរណ៍ដែលបង្កឡើងដោយបុរសម្នាក់ដែលគេស្គាល់ថា ជានាយរងខណ្ឌរដ្ឋបាលព្រៃឈើខេត្តប៉ៃលិន ដោយបើករថយន្តបត់ឆ្វេងមិនបើកភ្លើងស៊ីញ៉ូ បណ្ដាលឱ្យបុកជាមួយម៉ូតូយុវជនរងគ្រោះ។ គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៥និង៤០នាទីល្ងាចថ្ងៃទី៨ ខែមករា ឆ្នាំ២០១៤ ស្ថិតនៅតាមបណ្តោយផ្លូវជាតិលេខ៥៧ ក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន។
ជនរងគ្រោះ ទី១. ឈ្មោះ ស៊ីន ភេទប្រុស អាយុ២០ឆ្នាំ រងរបួសធ្ងន់សន្លប់នៅនឹងកន្លែងជាអ្នកបើកបរម៉ូតូម៉ាកវីវ៉ា ពណ៌ក្រហម ស៊េរីឆ្នាំ២០១០ ពាក់ស្លាកលេខភ្នំពេញ 1AH-2421 រងការខូចខាតផ្នែកខាងមុខយ៉ាងដំណំ និងទី២.ជាអ្នករួមដំណើរ ឈ្មោះ សឿង ភេទប្រុស អាយុ២២ឆ្នាំ រងរបួសស្រាលទាំងពីរនាក់រស់នៅភូមិអូរតាប្រាង សង្កាត់ប៉ៃលិន ក្រុងប៉ៃលិន ខេត្តប៉ៃលិន។ ចំណែកជនបង្កហេតុ ឈ្មោះ ហែម សុផាត ភេទប្រុស អាយុ៤៥ឆ្នាំ ជានាយរងខណ្ឌរដ្ឋបាលព្រៃឈើប៉ៃលិន រស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន បើកបររថយន្តម៉ាកតូយ៉ូតាតាកូម៉ា ពណ៌ស្លែ ពាក់ស្លាកលេខ ក្រុងប៉ៃលិន2A-0462 បើកបរទិសដៅពីលិចទៅកើត។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់ជានាយរងខណ្ឌរដ្ឋបាលព្រៃឈើខេត្តប៉ៃលិន បានបើកបររថយន្តម៉ាកតូយ៉ូតាតាកូម៉ាក្នុងល្បឿនលឿន ដោយទិសដៅពីលិចទៅកើត លុះដល់ត្រង់ចំណុចផ្លូវបំបែក រថយន្តក៏បត់ឆ្វេងមិនបើកភ្លើងស៊ីញ៉ូ បណ្ដាលឱ្យម៉ូតូមួយគ្រឿងទៀត ដែលបើកបរក្នុងទិសដៅច្រាសគ្នាក្នុងល្បឿនលឿនដែរ ក៏ជ្រុលចង្កូតទៅបុករថយន្តចំពីមុខពេញទំហឹង បណ្ដាលឱ្យដួលបោកផ្ទប់ទៅលើផ្លូវថ្នល់ជាតិរងរបួសធ្ងន់សន្លប់ម្នាក់ និងរបួសស្រាលម្នាក់។
ប្រភពបន្តទៀតថា ក្រោយពេលកើតហេតុជនរងគ្រោះម្នាក់ ត្រូវរថយន្តសង្គ្រោះមន្ទីរពេទ្យបង្អែកខេត្ត ដឹកយកទៅសង្គ្រោះភ្លាមៗតែម្តង។ ចំណែកសមត្ថកិច្ចចរាចរជើងគោកខេត្តប៉ៃលិន បានឱ្យដឹងថា ក្រោយពេលធ្វើការវាស់វែងរកឃើញថា រថយន្តនាយរងខណ្ឌរដ្ឋបាលព្រៃឈើខេត្តប៉ៃលិន ជាអ្នកបង្កហេតុដោយបើកបរបត់ឆ្វេងអត់មានបើកភ្លើងស៊ីញ៉ូ ហើយក្រោយមកទាំងរថយន្ត និងម៉ូតូត្រូវកម្លាំងសមត្ថកិច្ចនគរបាល អូសយកទៅរក្សាទុកនៅស្នងការដ្ឋាននគរបាលខេត្តរង់ចាំភាគីទាំងសងខាងចូលមកដោះស្រាយតាមផ្លូវច្បាប់៕
សេង សុវណ្ណារិទ្ធ
0 Comments