ភ្នំពេញ ៖ នៅទីស្ដីការក្រសួងមហាផ្ទៃកាលពីរសៀលថ្ងៃទី១៦ ខែមករា ឆ្នាំ២០១៥ បានប្រារព្ធពិធីចុះហត្ថលេខារសហប្រតិបត្តិការឆ្នាំ២០១៥ រវាងក្រសួងមហាផ្ទៃនៃព្រះរាជាណាចក្រកម្ពុជា ជាមួយក្រសួងនគរបាលនៃសាធារណរដ្ឋសង្គមនិយមវៀតណាម ក្រោយអធិបតីភាពលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកឧត្តមសេនីយ៍ឯក ត្រឹង ដាយក្វាង រដ្ឋមន្ត្រីក្រសួងនគរបាល។
ការចុះហត្ថលេខាលើផែនការសហប្រតិបត្តិការសម្រាប់ឆ្នាំ២០១៥ រវាងក្រសួងមហាផ្ទៃនៃព្រះរាជាណាចក្រកម្ពុជាជាមួយក្រសួងនគរបាលនៃសាធារណរដ្ឋសង្គមនិយមវៀតណាមនេះមាន៥ចំណុចធំៗទី១ក្រសួងទាំងពីរនឹងបន្តសហប្រតិបត្តិការសំដៅពង្រឹងការងារសន្តិសុខ កសាងបន្ទាត់ខ្សែព្រំដែនសន្តិភាព មិត្តភាព ស្ថិរភាព និងការអភិវឌ្ឍន៍។ ទី២ ក្រសួងទាំងពីរនឹងសហប្រតិបត្តិការក្នុងការបង្ក្រាបបទឧក្រិដ្ឋឆ្លងដែនដើម្បីធានាសុវត្ថិភាព ស្ថិរភាព និងសន្តិសុខរបស់ប្រទេសទាំងពីរ។ទី៣ក្រសួងទាំងពីរនឹងរួមសហការគ្នាក្នុងការផ្លាស់ប្ដូរគណៈប្រតិភូ ដើម្បីធ្វើទស្សនកិច្ចសិក្សារវាងប្រទេសទាំងពីរ។ ទី៤ ប្រទេសវៀតណាមនឹងបន្តជួយជ្រោមជ្រែង ក្នុងការបណ្ដុះបណ្ដាលធនធានមនុស្សជាពិសេសធនធានមនុស្សលើវិស័យនគរបាល សម្រាប់ឆ្នាំ២០១៥ (តាមផែនការគ្រោងជាង ៦០០នាក់)។ ទី៥, ក្រសួងនគរបាលនឹងផ្ដល់ការគាំទ្រ ជំរុញសហប្រតិបត្តិការលើផ្នែកភស្តុភារបច្ចេកទេស មានន័យថាក្រសួងនគរបាលវៀតណាមបន្តជួយក្នុងការកសាងសាលាមិត្តភាពនគរបាលកម្ពុជា-វៀតណាម បន្ថែមទៀត។
គួរបញ្ជាក់ផងដែរថា យោងតាមកម្មវិធីដែលបានគ្រោងទុកគណៈប្រតិភូជាន់ខ្ពស់នៃក្រសួងនគរបាលវៀតណាមនឹង បំពេញទស្សនកិច្ចនៅព្រះរាជាណាចក្រកម្ពុជារយៈពេលពីរថ្ងៃ។ ក្នុងដំណើរទស្សនកិច្ចផ្លូវការនេះគណប្រតិភូជាន់ខ្ពស់នៃក្រសួងនគរបាលវៀតណាម បានចុះហត្ថលេខាលើផែនការសហប្រតិបត្តិការសម្រាប់ឆ្នាំ២០១៥នេះ និងនៅរសៀលថ្ងៃ១៦ ខែមករា ឆ្នាំ២០១៥ នេះដែរគណប្រតិភូជាន់ខ្ពស់នៃក្រសួងនគរបាលវៀតណាម នឹងអញ្ជើញចូលជួបសម្ដែងការគួរសម សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព។ បន្ទាប់នៅថ្ងៃទី១៧ ខែមករា ឆ្នាំ២០១៥ គណប្រតិភូជាន់ខ្ពស់នៃក្រសួងនគរបាលវៀតណាម នឹងរួមដំណើរជាមួយឯកឧត្តម ស ខេង នឹងអញ្ជើញទៅសម្ពោធសាលាមិត្តភាពនគរបាលមិត្តភាពកម្ពុជា វៀតណាមនៅខេត្តកំពង់ស្ពឺ៕
0 Comments