ព្រះសីហនុ ៖ កាលពីរសៀលថ្ងៃទី១៥ ខែមករា ឆ្នាំ២០១៥ ខណ្ឌរដ្ឋបាលជលផលកំពង់សោមបាន និងកំពុងបំផុសចលនាមហាជនឱ្យគូរស្វាមី ភរិយាដែលរៀបអាពាហ៍ពិពាហ៍ថ្មីចំនួន០៤គូរ ចូលរួមដាំដុះថែរក្សា អភិរក្សព្រៃកោងកាងក្នុងសួនអាពាហ៍ពិពាហ៍ ដើម្បីជានិមិត្តរូបក្នុងការចូលរួមថែរក្សា និងអភិរក្សព្រៃឈើឡើងវិញ។ ជាពិសេសបង្កើតជម្រកសម្រាប់ត្រីពង កូន និងជីវចម្រុះក្នុងសមុទ្រឱ្យបានកាន់តែសម្បូរឡើងថែមទៀត។
លោក នេន ចំរើន នាយខណ្ឌរដ្ឋបាលជលផលកំពង់សោមបានឱ្យដឹងថា នេះជាលើកទី៣ហើយ ដែលគូរស្វាមី ភរិយារៀបអាពាហ៍ពិពាហ៍ចំនួន០៤គូរ បានចូលរួមដាំកូនកោងកាងក្នុងសួន អាពាហ៍ពិពាហ៍ ដែលរដ្ឋបាលជលផលបានបង្កើតឡើងកាលពីខែសីហា ឆ្នាំ២០១៤នេះ លើផ្ទៃដីចំនួន០២ហិកតា ស្ថិតក្នុងសហគមន៍នេសាទព្រៃនប់២ ដែលមានការគាំទ្រពីអាជ្ញាធរមូលដ្ឋាន ជាពិសេសឯកឧត្តមអភិបាលខេត្តព្រះសីហនុតែម្តង។ ព្រោះការបង្កើតសួនអាពាហ៍ពិពាហ៍នេះ ធ្វើឡើងក្នុងគោលបំណងឱ្យគូស្វាមីភរិយាដែលបានរៀបអាពាហ៍ពិពាហ៍រួចចូលរួមដាំកូនកោងកាង ក្នុងសួនអាពាហ៍ពិពាហ៍នេះម្នាក់មួយដើមៗ ជានិមិត្តរូបក្នុងការរួមចំណែកថែរក្សា ការពារបរិស្ថាន និង ការដាំដុះព្រៃឈើឡើងវិញ។ ជាពិសេសរក្សាបាននូវគម្របព្រៃឈើជាជម្រកសម្រាប់សត្វ និងពួកមច្ឆជាតិពង កូន និងជីវចម្រុះក្នុងទឹកឲ្យកាន់តែសម្បូរឡើង។
លោក នេន ចំរើន បានឱ្យដឹងបន្តទៀតថា មន្ត្រីរបស់យើងនៅរង់ចាំសហការជាមួយប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិមកលេងកំសាន្តខេត្តព្រះសីហនុ ដែលស្រឡាញ់ ព្រៃឈើ និងជីវចម្រុះឱ្យសម្បូរឡើងវិញ។ តាមគោលនយោបាយរបស់រាជរដ្ឋាភិបាលកម្ពុជា ក្នុងការគ្រប់គ្រងថែរក្សាព្រៃលិចទឹកនៅក្នុងដែនសហគមន៍នេសាទ ក៏ដូចជាក្នុងដែនគ្រប់គ្រងរបស់សមត្ថកិច្ចរដ្ឋបាលជលផលកំពង់សោមឱ្យមាននិរន្តរភាព ការដាំកូនកោងកាងនៅក្នុងសួនអាពាហ៍ពិពាហ៍នៅក្នុងសហគមន៍នេសាទព្រៃនប់២លើផ្ទៃដីចំនួន០២ហិកតានេះ មិនមែនសម្រាប់តែយុវវ័យដែលត្រូវរៀបអាពាហ៍ពិពាហ៍នោះទេ ប៉ុន្តែប្រជាពលរដ្ឋនិងអ្នកទេសចរក៏អាចមកដាំកូនកោងកាងនៅក្នុងសួនអាពាហ៍ពិពាហ៍នេះបានផងដែរ ហើយមន្ត្រីរបស់យើងនៅរង់ចាំជាប្រចាំ និងនៅតាមដានកូនកោងកាងជាប់ជានិច្ច ប្រសិនបើវាងាប់ និងដាំដុះជំនួសឡើងវិញ ដើម្បីឱ្យយុវវ័យដែលបានដាំដុះរួចហើយ ថ្ងៃក្រោយអាចមកមើលដើមកោងកាងនោះវាធំធាត់ប៉ុណ្ណា។
លោកនាយខណ្ឌរដ្ឋបាលជលផលកំពង់សោមបានបញ្ជាក់ថា នេះជាលើកទី៣ហើយដែលមានគូស្វាមីភរិយាចំនួន០៤គូ បានមកដាំកូនកោងកាងនៅក្នុងសួនអាពាហ៍ពិពាហ៍នេះ ហើយសង្ឃឹមថានៅរដូវប្រាំងខាងមុខនឹងមានគូរស្វាមី ភរិយាដែលបានរៀបអាពាហ៍ពិពាហ៍ចូលរួមដាំកូនកោងកាងនៅក្នុងសួនអាពាហ៍ពិពាហ៍នេះកាន់តែច្រើនឡើងបន្ថែមទៀត។ មកដល់ពេលនេះមានគូរស្វាមី ភរិយាចំនួន១០គូរបានចូលរួមដាំកូនកោងកាងក្នុងសួនអាអាពាហ៍ពិពាហ៍។
ក្នុងឱកាសនោះលោកប្រធានខណ្ឌរដ្ឋបាលជលផលកំពង់សោមបានឧបត្ថម្ភថវិកាកម្ចីចំនួន ៦លានរៀលដល់ធនាគារក្តាមក្នុងសហគមន៍នេសាទព្រៃនប់២ ដើម្បីទិញក្តាមមេពូជចិញ្ចឹម ហើយថវិកានេះមានការជួយឧបត្ថម្ភដោយSeafde តាមរយៈអង្គការ Corin Asia Combodia៕
ស៊ុយ ចាន់ធា
0 Comments