កំពង់ឆ្នាំង ៖ រថយន្តដឹកទំនិញពេញម៉ាកហ៊ីយ៉ាន់ដាយមួយគ្រឿង បានរេចង្កូតបុករះរថយន្តតាក់ស៊ីម៉ាកនីសសាន់ នៅពេលកំពុងបើកបរច្រាសទិសគ្នាតាមបណ្តោយផ្លូវជាតិលេខ៥ បណ្ដាលឲ្យរថយន្តហ៊ីយ៉ាន់ដាយធ្លាក់ស្នាមភ្លោះបុកដើមស្វាយបាក់អស់មួយដើម ដែលសមត្ថកិច្ចប្រាប់ឲ្យដឹងថា ទំនងជាបើកបរក្នុងភាពងោកងុយ។ ហេតុការណ៍នេះបានកើតឡើងនៅវេលាម៉ោង១១និង១៥នាទី ថ្ងៃទី០៤ ខែមករា ឆ្នាំ២០១៤ ស្ថិតក្នុងភូមិស្មែតឃុំ ស្វាយជ្រំ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលចរាចរណ៍បានឲ្យដឹងថា រថយន្តរងគ្រោះម៉ាកនីសសាន់២បាំងនោះ ពណ៌កាប់ស្ទាំង ពាក់ស្លាកលេខពោធិ៍សាត់ 2A-0429 បើកបរដោយឈ្មោះ លី សុខា អាយុ៤២ឆ្នាំ មុខរបររត់តាក់ស៊ី រស់នៅក្នុងភូមិមាន់ចែ ឃុំព្រៃញី ស្រុកសំពៅមាស ខេត្តពោធិ៍សាត់ បើកបរពីក្រុងភ្នំពេញទៅខេត្តពោធិ៍សាត់។ ចំណែករថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខ ព្រះសីហនុ 3A-1173 បើកបរច្រាសទិសជាមួយរថយន្តនីសាន់(រងគ្រោះ)។
មុនពេលកើតហេតុ គេបានឃើញរថយន្តនីសាន់ដែលមានផ្ទុកអ្នកដំណើរ០៤នាក់ បានបើកក្នុងល្បឿនមធ្យមពីត្បូងទៅជើង លុះមកដល់ចំណុចកើតហេតុស្រាប់តែរថយន្តបង្កខាងលើបានរេចង្កូតមកឆ្វេង ហើយបានបុករះផ្នែកខាងឆ្វេងរថយន្តនីសាន់ និងបានធ្លាក់ស្នាមភ្លោះខ្លួនឯង បុកដើមស្វាយបាក់០១ដើម បណ្ដាលឲ្យមុខរថយន្តបង្កខូចខាតទាំងស្រុង ដោយឡែករថយន្តរងគ្រោះកំពឹតផ្នែកខាងឆ្វេង និងបានដាច់កាលេក្រោយទៀត។
ក្រោយពេលកើតហេតុ អ្នកបើកបររថយន្តបង្កបានទុករថយន្តចោល ហើយក៏បានរត់គេចបាត់ស្រមោលតែម្តង។ ដោយឡែកគេឃើញតែស្ត្រីចំណាស់ម្នាក់ទំនងជាម្ចាស់រថយន្តបង្ក បានឡូឡាក្អេងក្អាងនៅទីនោះ។ ក្នុងហេតុការណ៍នេះមិនបានបង្កគ្រោះថ្នាក់ដល់អ្នកដំណើរនោះទេ ចំណែករថយន្តទាំង០២គ្រឿង ត្រូវបានសមត្ថកិច្ចនគរបាលចរាចរណ៍ខេត្តអូសយកមកទុកនៅការិយាល័យនគរបាលចរាចរណ៍ផ្លូវគោកខេត្តរង់ចាំដោះស្រាយតាមផ្លូវច្បាប់។
នៅក្នុងហេតុការណ៍នេះ សមត្ថកិច្ចបានសន្និដ្ឋានថា ប្រហែលមកពីអ្នកបើកបររថយន្តបង្ក បើកងោកងុយ ទើបបង្កឲ្យមានគ្រោះថ្នាក់បែបនេះកើតឡើង៕
( ឈៀង ថារិទ្ធ )
0 Comments