ខេត្តកណ្តាល ៖ បុរសម្នាក់បានស្លាប់ពេលបញ្ចូលទៅដល់មន្ទីរពេទ្យភ្នំពេញ ដោយសារបើកម៉ូតូធ្លាក់លូត្រង់ចំណុចផ្លូវបំបែកលេខ២១ កែងផ្លូវលេខ១១០ ក្នុងក្រុងតាខ្មៅ កាលពីវេលាម៉ោង៨និង៣០នាទីយប់ និងម្នាក់ទៀតត្រូវរថយន្តដឹកដីបើកបុកកិនពីលើស្លាប់នៅកន្លែងកើតហេតុ ចំណុចផ្លូវជាតិលេខ៥ ក្នុងស្រុកពញាឮ កាលពីវេលាម៉ោង១៧និង០០នាទីល្ងាច ថ្ងៃទី ០១ ខែមករា ឆ្នាំ២០១៥។
បើតាមប៉ូលិសចរាចរណ៍ក្រុងតាខ្មៅបានឲ្យដឹងថា ជនរងគ្រោះដែលបាត់ជីវិតដោយសារបើកបរម៉ូតូធ្លាក់ចូលលូត្រង់ចំណុចផ្លូវកែងលេខ២១ និងផ្លូវ១១០ ក្នុងភូមិតាខ្មៅ សង្កាត់តាខ្មៅ ក្រុងតាខ្មៅ កាលពីវេលាម៉ោង០៨និង៣០នាទីយប់ នោះគឺមានឈ្មោះ ម៉ាក ផល ភេទប្រុសអាយុ៤១ នៅភូមិក្រពើហា សង្កាត់ព្រែកឫស្សី ក្រុងតាខ្មៅ មានស្មាមរបួសបាក់ឆ្អឹងក និងឆ្អឹងថ្គាម។ សាក្សីនៅកន្លែងកើតហេតុបាននិយាយថា នៅម៉ោងប្រហែល៣០នាទី គេឃើញជនរងគ្រោះជិះម៉ូតូម៉ាក សេ១២៥ ព័ណ៌ខ្មៅ ពាក់ស្លាកលេខកណ្តាល១B.៤៥៩៩ លើកំណាត់ផ្លូវជាតិលេខ២១ មានល្បឿនយ៉ាងលឿនរេពេញផ្លូវ លុះដល់ផ្លូវបំបែកកែង១១០ ប្រុងបត់ឆ្វេងក៏ទៅធ្លាក់ចូលក្នុងលូ ទាំងម៉ូតូ ទាំងមនុស្សតែម្តង។
ដោយឡែកករណីគ្រោះថ្នាក់ចរាចរណ៍នៅស្រុកពញាឮ ដែលជនរងគ្រោះត្រូវរថយន្តដឹកដីរបស់ក្រុមហ៊ុនចិន ធ្វើផ្លូវជាតិលេខ៥ បើកបុកកិនពីលើ កាលពីវេលាម៉ោង១៧និង០០នាទីល្ងាចនៅចំណុចចន្លោះគីឡូម៉ែត្រ២៧-២៨ភូមិទួលអំពិល ឃុំពញាឮ ស្រុកពញាឮ គឺមានឈ្មោះសំ រិតសំភស្សភេទប្រុស អាយុ២២ឆ្នាំនៅភូមិពោធិមង្គល ឃុំព្រែកតាទែន ស្រុកពញាឮ ខេត្តកណ្តាល។
ប៉ូលិសបានបញ្ជាក់ថា ករណីនេះបង្កដោយម៉ូតូC125ពណ៌ខ្មៅ ដែលបើកបរដោយជនរងគ្រោះមានឈ្មោះ សំ រិតសំភស្ស ធ្វើដំណើរពីត្បូងទៅជើងលុះដល់ចំណុចកើតហេតុម៉ូតូមានល្បឿនលឿនក៏ជ្រុលទៅបុកចំពីមុខ ជាប់និងកង់រថយន្តម៉ាកហ្វលែនពណ៌ក្រហម គ្មានស្លាកលេខរបស់ក្រុមហ៊ុនចិនផ្នែកខាងឆ្វេង បណ្តាលឲ្យស្លាប់ភ្លាមៗនៅកន្លែងកើតហេតុ។
ករណីគ្រោះថ្នាក់ចរាចរណ៍ខាងលើដែលបណ្តាលឲ្យមនុស្សពីនាក់បាត់បង់ជីវិតនោះ ប៉ូលិសបានបញ្ជាក់ថា មូលហេតុបណ្តាលមកពីមិនគោរពច្បាប់ចរាចរណ៍ និងកត្តាមួយទៀត អ្នកបើកបរមានស្ថានភាពស្រវឹង ហើយមិនមានពាក់មួកសុវត្ថិភាពទៀត៕
0 Comments