ព្រះសីហនុ ៖ លោក ណុះ ស្លេះ អនុរដ្ឋលេខាធិការក្រសួងអប់រំយុវជន និងកីឡា ជាសមាជិកគណៈកម្មាធិការកណ្ដាលទទួលបន្ទុកវិស័យអប់រំ និងយុវជននៃអង្គការមូលនិធិអភិវឌ្ឍន៍មូស្លិមកម្ពុជា អញ្ជើញជាអធិបតីចែកសញ្ញាបត្រអាហារូបករណ៍ភាសាអង់គ្លេសរបស់ស្ថានទូតសហរដ្ឋអាមេរិកប្រចាំកម្ពុជាជូនដល់សិស្សចំនួន១៥នាក់ នៅសាលាREGENT SCHOOL សាខាទី១ដែលមានទីតាំងស្ថិតក្នុងសង្កាត់លេខ៤ ក្រុង/ខេត្តព្រះសីហនុនៅព្រឹកថ្ងៃទី០៥ ខែមករា ឆ្នាំ២០១៥។
លោក ណុះ ស្លេះ បានសំណេះសំណាលជាមួយសិស្ស និងអាណាព្យាបាលដែលបានអញ្ជើញចូលរួមថា វគ្គបណ្តុះបណ្តាលភាសាអង់គ្លេសរយៈពេលពីរឆ្នាំ គឺចាប់ផ្តើមកាលពីខែមករា ឆ្នាំ២០១៣ និងត្រូវបញ្ចប់នៅខែមករា ឆ្នាំ២០១៥ ដែលមានសិស្សសរុបចំនួន១៥នាក់ ព្រោះភាសាអង់គ្លេសជាមូលដ្ឋានគ្រឹះសម្រាប់ឲ្យសិស្សបន្តការសិក្សាបន្តនៅថ្នាក់ឧត្តមសិក្សាបន្ថែមទៀត។ លោកសង្ឃឹមថា សិស្សទាំងអស់ទទួលបាននូវអាហារូបករណ៍បន្តទៀតនៅថ្ងៃក្រោយ សិស្សទាំងអស់មិនត្រឹមតែបានរៀនភាសាអង់គ្លេសមួយមុខនោះទេ គឺបានរៀននូវមុខវិជ្ជាផ្សេងៗទៀតមានដូចជាសិទ្ធិមនុស្ស សិទ្ធិប្រជាធិបតេយ្យ និងព័ត៌មានផ្សេងៗទៀត ដើម្បីបង្កើននូវចំណេះដឹង។
លោកបានបន្តថា ក្នុងនាមអង្គការមូលនិធិអភិវឌ្ឍន៍មូស្លីមកម្ពុជានិងខិតខំរកអាហារូបករណ៍បន្ថែមទៀតជួយដល់សិស្សានុសិស្សនៅក្នុងខេត្តព្រះសីហនុ ដោយបច្ចុប្បន្នក្រសួងអប់រំ និងរាជរដ្ឋាភិបាលដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបាននឹងកំពុងរៀបចំកែទម្រង់វិស័យអប់រំនៅទូទាំងប្រទេសឲ្យមានគុណភាពតាមស្តង់ដារអន្តរជាតិ ដើម្បីប្រកួតប្រជែងនិងប្រទេសក្នុងតំបន់អាស៊ាន ព្រោះនៅពេលខាងមុខកម្ពុជា និងធ្វើសមាហរណកម្មអាស៊ានដែលទាមទារឲ្យកម្ពុជាមានធនធានមនុស្សប្រកបដោយគុណភាព ប្រសិទ្ធភាព ជាពិសេសការប្រឡងសញ្ញាបត្របាក់ឌុបក្នុងឆ្នាំ២០១៤ គឺយើងប្រឡងជាប់ទាំងពីរលើកប្រមាណជា៤០% ដូចនេះនៅឆ្នាំ២០១៥នេះ ការប្រឡងបាក់ឌុប គឺក្រសួងធ្វើការប្រឡងតែម្តង ដូច្នេះចូលប្អូនៗត្រូវខិតខំរៀនសូត្រ ដើម្បីបង្កើននូវចំណេះដឹងឱ្យមានគុណភាព ដើម្បីប្រកួតប្រជែងជាមួយប្រទេសក្នុងតំបន់អាស៊ាននាពេលខាងមុខ ហើយការអភិវឌ្ឍន៍ធនធានមនុស្សធ្វើឱ្យប្រទេសជាតិមានការអភិវឌ្ឍន៍រីកចម្រើនផងដែរ។
លោក សាឡុង សាន់ បានថ្លែងអំណរគុណចំពោះឯកឧត្តមអនុរដ្ឋលេខាធិការក្រសួងអប់រំ ដែលបានខិតខំរកអាហារូបករណ៍ភាសាអង់គ្លេស បណ្តុះបណ្តាលដល់សិស្សានុសិស្សក្នុងខេត្តព្រះសីហនុមិនថាតែបងប្អូនជនជាតិខ្មែរឥស្លាមទេ សូម្បីតែជនជាតិខ្មែរក៏អាចទទួលបាននូវអាហារូបករណ៍ភាសាអង់គ្លេសនេះផងដែរ និងសូមឲ្យឯកឧត្តមជួយរកអាហារូបករណ៍ភាសាអង់គ្លេសបន្ថែមទៀត ដើម្បីបណ្តុះបណ្តាលបង្កើននូវធនធានមនុស្សព្រោះសិស្សានុសិស្សជាទំពាំងស្នងឫស្សីក្នុងការចូលរួមចំណែកអភិវឌ្ឍនប្រទេសជាតិនាពេលខាងមុខ៕
ដោយ ស៊ុយ ចាន់ធា
0 Comments