បន្ទាយមានជ័យ ៖ បុរសជាជនជាតិថៃម្នាក់ ត្រូវបានកម្លាំងនគរបាលអន្តោប្រវេសន៍ នៃស្នងការនគរបាលខេត្តបន្ទាយមានជ័យ ចាប់ឃាត់ខ្លួន និងបណ្តេញចេញទៅប្រទេសថៃវិញ កាលពីចុងសបា្តហ៍កន្លងទៅនេះ បន្ទាប់ពីបានឆ្លងដែនមករស់នៅខុសច្បាប់លើទឹកដីកម្ពុជា។
តាមការឲ្យដឹងពីនគរបាលនៃការិយាល័យអន្តោប្រវេសន៍ នៃស្នងការនគរបាលខេត្តបន្ទាយមានជ័យបានឲ្យដឹងកាលពីព្រឹកមិញនេះថា ជនបរទេសជាជនជាតិថៃម្នាក់ឈ្មោះ ចាក់លើមឆាប ភេទប្រុស អាយុ២២ឆ្នាំ មានទីលំនៅភូឡាំប៊ុនម៉ាហាម៉ា ឃុំមឿង ស្រុកឡុកបូរី ខេត្តឡុកបូរី ប្រទេសថៃ ត្រូវបានកម្លាំងនគរបាលនៃអធិការស្រុកភ្នំស្រុក ធ្វើការឃាត់ខ្លួនកាលពីថ្ងៃទី ១៧ កមរា ២០១៥ ហើយបានចាត់បញ្ជូនមក ការិយាល័យជំនាញ។ តាមចម្លើយរបស់ជនបរទេសរូបនេះ បានរៀបរាប់អោយដឹងថា រូបគេបានចេញពីផ្ទះរយៈពេល៣ខែមកហើយ ហើយបានដើរវង្វេងកាត់ព្រៃចូលមកកម្ពុជា រយៈពេល១៦ថ្ងៃ។ គោលបំណងដែលខ្លួនចេញពីផ្ទះដើម្បីរកការងារធ្វើនៅ ឡាក់ស៊ីម៉ា តែដោយសារតែខ្លួនបាត់ប័ណ្ណប្រជាជនខ្លាចតម្រួតចាប់ ទើបដើរគេចវង្វេងចូលកម្ពុជា ដោយខ្លួនពុំដឹងថាមកតាមច្រកណានោះទេ។ ដោយអនុវត្តតាមច្បាប់អន្តោប្រវេសន៍ និងតាមការណែនាំរបស់លោកស្នងការនគរបាលខេត្ត ជនបរទេសរូបនេះត្រូវបាន បណ្តេញចេញទៅវិញកាលពីថ្ងៃទី១៨ មករា ២០១៥ តាមច្រកទ្វារប៉ោយប៉ែត៕
0 Comments