ភ្នំពេញ ៖ យុវជនម្នាក់បានរងរបួសធ្ងន់ធ្ងរ ដោយសារតែត្រូវរថយន្តតាក់ស៊ីម៉ែត្រ របស់ក្រុមហ៊ុនមហាកំផែងបើកបុកប៉ះជាមួយម៉ូតូជនរងគ្រោះ ហើយព្យាយាមបើករត់ តែរត់មិនរួចកាលពីវេលាម៉ោង កាលពីវេលាម៉ោង១និង០៥នាទីរំលង អធ្រាត្រឆ្លងចូលថ្ងៃទី១២ ខែមករា ឆ្នាំ២០១៥ នៅតាមបណ្ដោយផ្លូវលេខ១១៤កែងផ្លូវលេខ៦១ ខាងមុខមន្ទីរពេទ្យធ្មេញអប្សរា ស្ថិតក្នុងសង្កាត់ផ្សារថ្មី១ ខណ្ឌដូនពេញ។
សមត្ថកិច្ចមូលដ្ឋានបានឲ្យដឹងថា អ្នកបើករថយន្តតាក់ស៊ីឈ្មោះថៃ សុផាត ភេទប្រុស អាយុ២៩ឆ្នាំ ស្នាក់នៅសង្កាត់បឹងទំពុន ខណ្ឌមានជ័យ។
ប្រភពព័ត៌មានពីកន្លែងកើតហេតុបានឲ្យដឹងថា នៅវេលាកើតហេតុ គេឃើញយុវជនម្នាក់ បើកម៉ូតូម៉ាកហុងដាស្កូពី ពណ៌ខៀវលាយស ពាក់ស្លាកលេខភ្នំពេញ 1AT.1331 ធ្វើដំណើរតាមផ្លូវ លេខ៦១ ក្នុងទិសដៅពីត្បូងទៅជើង លុះមកដល់ចំណុចកើតហេតុស្រាប់តែរថយន្តតាក់ស៊ីម៉ែត្រ របស់ក្រុមហ៊ុនមហាកំផែង ពាក់ស្លាក លេខភ្នំពេញ 2AB.4029 ដែលបើកបរដោយតៃកុងស្ទើរភ្លើងហើយបើកយ៉ាងលឿនតាមផ្លូវលេខ១១៤ ក្នុងទិសដៅពីលិចទៅកើត ក៏បុកម៉ូតូពេញទំហឹងបណ្តាលឲ្យអ្នកបើកម៉ូតូរងរបួសធ្ងន់ធ្ងរ។ ចំណែករថយន្តតាក់ស៊ីម៉ែត្រមិនបានឈប់ទទួលខុសត្រូវឡើយដោយព្យាយាមបើករត់ទៅដល់ខាងក្រោយណាហ្គាវើល ស្ថិតក្នុងសង្កាត់ទន្លេបាសាក់ ខណ្ឌចំការមន ត្រូវសមត្ថកិច្ចឃាត់ជាប់ដើម្បីឲ្យអ្នកបើកបរបង្កហេតុរូបនោះទទួលខុសត្រូវ។
ប្រភពព័ត៌មានដដែលបានបន្តទៀតថា ក្នុងហេតុការណ៍នោះ សមត្ថកិច្ចមូលដ្ឋានបានចុះអន្តរាគមន៍ហៅផ្នែកជំនាញចរាចរណ៍ចុះមកយករថយន្ត និងម៉ូតូទៅរក្សាទុកនៅការិយាល័យចរាចរ ផ្លូវគោករង់ចាំដោះស្រាយ គ្នាជាក្រោយបន្តទៀត៕
0 Comments