ភ្នំពេញ ៖ អំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ត្រូវបានផ្តល់ជូនដល់ដៃប្រជាពលរដ្ឋទីទ័លក្រ និងជនគ្មានទីពឹង១០គ្រួសារ រស់នៅសង្កាត់ដង្កោ ខណ្ឌដង្កោ រាជធានីភ្នំពេញ កាលពីព្រឹកថ្ងៃទី៦ ខែមករា ឆ្នាំ២០១៥ តាមរយៈលោក នុត ពុធដារ៉ា អភិបាល នៃគណៈអភិបាលខណ្ឌដង្កោ អមដំណើរដោយលោកអភិបាលរង និងមន្ត្រីក្រោមឳវាទជុំវិញសាលាខណ្ឌជាច្រើនរូបទៀត។
អំណោយដែលត្រូវយកទៅចែកជូនដល់ប្រជាពលរដ្ឋក្រីក្រទាំង១០គ្រួសារ ដោយក្នុងមួយគ្រួសារៗទទួលបាន ថវិកា ១០ម៉ឺនរៀល អង្ករ ២៥គីឡូក្រាម មី ១កេស ទីកស៊ីអ៊ីវ ១យួរ ទឹកត្រី ១យួរ គ្រឿងឧបភោគ បរិភោគ និងសម្ភារៈប្រើប្រាស់ ១០មុខទៀត។ ក្នុងឱកាសនោះ លោក នុត ពុធដារ៉ា អភិបាលខណ្ឌដង្កោបានថ្លែងអំពីការយកចិត្តទុកដាក់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេច និងសម្តេចកិត្តិព្រឹទ្ធបណ្ឌិត តែងតែយកចិត្តទុកដាក់ជានិច្ច ចំពោះបងប្អូនប្រជាពលរដ្ឋនៅទូទាំងប្រទេស ដែលជួបការលំបាក និងងាយរងគ្រោះ និងមានជីវភាពខ្វះខាតក្រីក្រ ជាពិសេស ជនចាស់ជរា ទុរគតជន អ្នកផ្ទុកមេរោគអេដស៍ ជំងឺអេដស៍ កុមារកំព្រា និងជនងាយរងគ្រោះផ្សេងៗ។
លោកអភិបាលខណ្ឌបានបន្តថា ជាក់ស្តែងដូចថ្ងៃនេះលោកបាននាំយកអំណោយរបស់សម្តេចតេជោ និងសម្តេចកិត្តិព្រឹទ្ធបណ្ឌិតមកចែកជូនដល់ដៃបងប្អូនប្រជាពលរដ្ឋក្រីក្រទាំង១០គ្រួសារ ដែលកំពុងជួបការលំបាក។ បើទោះបីជាអំណោយទាំងនេះមានតិចតួចក្តី ប៉ុន្តែវាក៏អាចជួយសម្រួលទុក្ខលំបាកដល់បងប្អូនប្រជាពលរដ្ឋរបស់យើងបានមួយកំរិតផងដែរ។
នាពេលនោះដែរលោក នុត ពុធដារ៉ា ក៏បានធ្វើការផ្តែផ្តាំទៅដល់បងប្អូនប្រជាពលរដ្ឋទាំងអស់ ត្រូវខំថែរក្សាសុខភាព និងរក្សាអនាម័យចំណីអាហារក្នុងការរស់នៅរបស់បងប្អូនឲ្យបានល្អ ដើម្បីរង់ចាំមើលការអភិវឌ្ឍឥតឈប់ឈររបស់ប្រទេសជាតិក្រោមការដឹកនាំប្រកបដោយកិតិ្តបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី ដែលបានធ្វើឲ្យប្រទេសជាតិ មានការរីកចម្រើនគ្រប់ទីកន្លែង។
លោកអភិបាលខណ្ឌក៏បានថ្លែងអំពីការយកចិត្តទុកដាក់របស់សម្តេចទាំងពីរ ចំពោះការរស់នៅរបស់បងប្អូនប្រជាពលរដ្ឋទាំងអស់ ចាប់ពីក្រោយថ្ងៃ៧ មករា ១៩៧៩ គឺជាថ្ងៃកំណើតទី២របស់យើងទាំងអស់គ្នា ប្រជាពលរដ្ឋទាំងអស់បានរស់ឡើងវិញ៕
0 Comments