កំពង់ឆ្នាំង ៖ បង្គោលថ្មមួយដើមដែលជារបងស្តូបមិត្តភាពកម្ពុជា-វៀតណាម និងការ៉ូការ៉ូឡាប្រមាណ៥០ការ៉េ នៅលើសួនច្បារមុខមន្ទីរបរិស្ថានខេត្ត ត្រូវបានបែកបាក់ខូចខាតដោយសារអ្នកបើកបររថយន្តកាម៉ាស់មួយគ្រឿង បើកងោកនៅពេលយប់ឡើងលើសួនច្បារបុកបង្កឲ្យមានការខូចខាត។ ហេតុការណ៍នេះបានកើតឡើងនៅវេលាម៉ោង៤និង៣០នាទីទៀបភ្លឺ ថ្ងៃទី១៧ ខែមករា ឆ្នាំ២០១៥ លើសួនច្បារមុខមន្ទីរបរិស្ថានខេត្ត ស្ថិតនៅក្នុងក្រុងកំពង់ឆ្នាំង។ លោក យីវ ជាអ្នកហៅម៉ូយដាក់រថយន្តតាក់ស៊ីនៅក្នុងបេនរថយន្តផ្សារលើក្រុងកំពង់ឆ្នាំងបាននិយាយឲ្យដឹងថា នៅក្នុងម៉ោងខាងលើមានរថយន្តកាម៉ាស់ដឹកស្រូវមួយគ្រឿង ពាក់ស្លាកលេខភ្នំពេញ3B 1965 បើកបរក្នុងទិសដៅពីជើងទៅត្បូងដល់ចំណុចផ្លូវបត់កែងកៀនមន្ទីរបរិស្ថានខេត្ត គេមិនបត់ឆ្វេងតាមផ្លូវជាតិទេ បែរជាបើកបញ្ឆិតទៅទិសខាងកើតឡើងលើសួនច្បារបុកបង្គោលរបងស្តូបមួយដើមបាក់ និងបែកការ៉ូការ៉ឡាមួយអស់ចំនួន។ ក្រោយពេលកើតហេតុអ្នកបើកបររថយន្តកាម៉ាស់បានបើករថយន្តថយក្រោយចុះមកលើផ្លូវជាតិវិញ ហើយបើកគេចខ្លួនទៅមុខទោះបីអ្នកណាឃាត់ឲ្យគេឈប់ ក៏គេមិនព្រមឈប់ដែរ បន្ទាប់មកគេក៏បានទូរស័ព្ទរាយការណ៍ជូនសមត្ថកិច្ចនគរបាលចរាចរណ៍ខេត្ត ដើម្បីតាមចាប់រថយន្តបង្កនេះធ្វើការដោះស្រាយសងការខូចខាត។
លោក អៀ ប៉ុនធឿន នាយការិយាល័យនគរបាលចរាចរណ៍ផ្លូវគោកខេត្តបាននិយាយឲ្យដឹងថា រថយន្តកាម៉ាស់ខាងលើនេះ ដែលបង្កការខូចខាតក្រោយពេលកើតហេតុបែរជាមិនទទួលខុសត្រូវ ហើយបើករថយន្តគេចថែមទៀត។ ករណីនេះក្រោយពេលកើតហេតុភ្លាមៗ លោកបានបញ្ជាឲ្យសមត្ថកិច្ចនគរបាលចរាចរណ៍ស្រុករលាប្អៀរបញ្ចេញកម្លាំងតាមចាប់រថយន្តខាងលើនេះ ហើយនៅវេលាម៉ោង៦និង១០នាទី សមត្ថកិច្ចនគរបាលចរាចរណ៍ស្រុករលាប្អៀរ បានប្រទះឃើញរថយន្តខាងលើខូចកាប៉ែនហ្វ្រាំងឈប់ជួសជុលនៅចំណុចទំនាបស្រែហង់ ក្នុងឃុំទឹកហូត ស្រុករលាប្អៀរ និងត្រូវសមត្ថកិច្ចនគរបាលចរាចរណ៍ខេត្តឃាត់ទុក។
សមត្ថកិច្ចបានឲ្យម្ចាស់ដោះស្រាយជាមួយអង្គការចៃការ ដែលជាអ្នកទទួលខុសត្រូវជួសជុលសួនច្បាររបស់ខេត្ត ដែលមន្ត្រីតំណាងឲ្យអង្គការចៃការបានតម្រូវឲ្យម្ចាស់រថយន្តតម្កល់ប្រាក់ចំនួន៥០០ដុល្លារ ដើម្បីធ្វើការជួសជុលការ៉ូការ៉ូឡាដែលបែកបាក់ប្រមាណ៥០ម៉ែត្រការ៉េ និង ជួសជុលបង្គោលថ្ម១ដើមដែលបាក់នោះឡើងវិញនៅថ្ងៃច័ន្ទក្រោយនេះ បើលុយនេះនៅសល់អង្គការចៃការនិងប្រគល់ឲ្យទៅម្ចាស់រថយន្តវិញ។
អ្នកបើកបររថយន្តបានដោះសាជាមួយសមត្ថកិច្ចថា មូលហេតុដែលរថយន្តបើកឡើងលើសួនច្បារនេះបណ្ដាលមកពីរថយន្តបែកកាបែនហ្វ្រាំងបត់មិនកើត ទើបបង្កការខូចខាតបែបនេះ គឺមិនមែនបើកបរងោកនោះទេ៕ ( ឈៀង ថារិទ្ធ )
0 Comments