ភ្នំពេញ ៖ កាលពីរសៀលថ្ងៃទី១០ ខែមករា ឆ្នាំ២០១៥ កម្លាំងកងរាជអាវុធហត្ថការិយាល័យប្រឆាំងការជួញដូរគ្រឿងញៀនរាជធានីភ្នំពេញបានចាត់បញ្ជូនអ្នកជួញដូរគ្រឿងញៀន៤នាក់ទៅឃុំនៅគុកព្រៃស និង៨នាក់ទៀត ត្រូវបានព្យួរទោសម្នាក់ៗ៤ខែ ដោយពិន័យជាប្រាក់ម្នាក់ៗពី២០ម៉ឺនទៅ៤០ម៉ឺនរៀល ទៅតាមកម្រិតនៃថ្នាំញៀនដែលដកហូតបាន។ ការចាប់ខ្លួនជនសង្ស័យទាំង១២នាក់នោះធ្វើឡើងដោយកម្លាំងការិយាល័យប្រឆាំងគ្រឿងញៀនរាជធានីសហការជាមួយអាវុធហត្ថខណ្ឌពោធិសែនជ័យ ចុះស្រាវជ្រាវឃាត់ខ្លួនជនសង្ស័យជាបន្តបន្ទាប់ពីបទពាក់ព័ន្ធនូវការជួញដូរគ្រឿងញៀន។
តាមការឲ្យដឹងពីមន្ត្រីការិយាល័យប្រឆាំងគ្រឿងញៀនកងរាជអាវុធហត្ថរាជធានីបានបញ្ជាក់កាលពីថ្ងៃទី១០ ខែមករា ឆ្នាំ២០១៥ថា ជនសង្ស័យទាំង១២នាក់នេះ ត្រូវបានចាប់ខ្លួនពេលកំពុងតែធ្វើសកម្មភាពល្មើសច្បាប់កាលពីថ្ងៃយប់ថ្ងៃទី៦ និងយប់ថ្ងៃទី៧ ខែមករា នៅចំណុចខាងលើដកហូតបានថ្នាំញៀនមួយកញ្ចប់ធំ ស្មើជាង១០០កញ្ចប់តូច និង១០កញ្ចប់តូចផ្សេងទៀត និងសម្ភារៈពាក់ព័ន្ធមួយចំនួន។ មន្ត្រីអាវុធហត្ថការិយាល័យជំនាញបានបន្តថា ការិយាល័យជំនាញនឹងបន្តចាប់ខ្លួនអ្នកជួញដូរអ្នកសេពថ្នាំញៀនគ្រប់រូបភាពតាមបទបញ្ជាដ៏ម៉ឺងម៉ាត់របស់លោក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ។
ក្នុងករណីនេះការិយាល័យជំនាញបានបញ្ជូនជនសង្ស័យ៤នាក់ក្នុងចំណោម១២នាក់ទៅឃុំខ្លួននៅគុកព្រៃស ហើយបន្ទាប់ពីសាលាដំបូងសម្រេចចេញដីកាឃុំរួចមក៕
វិមាន
0 Comments