ភ្នំពេញ ៖ អភិបាលរាជធានីភ្នំពេញ លោកប៉ា សុជាតិវង្សបានមានប្រសាសន៍លើកឡើងថា នៅភ្នំពេញមកដល់ពេលបច្ចុប្បន្ននេះ មានបូរីចំនួន៧៤ កំពុងដំណើរការយ៉ាងរលូនស្របពេលដែលអំណាចទិញរបស់ប្រជាពលរដ្ឋកើនឡើងខ្ពស់ ហើយការបញ្ជាការទិញពីប្រជាពលរដ្ឋកើនឡើងច្រើនបែបនេះ គឺពិតជាបង្ហាញឲ្យឃើញយ៉ាងច្បាស់ថា ប្រជាពលរដ្ឋពួកគាត់ពិតជាបាននឹងកំពុងរកស៊ីទទួលទានមានបានខ្លាំង។ ធម្មតាបើប្រជាពលរដ្ឋរកស៊ីទទួលទានមានបាននោះ មានន័យថាគោលនយោបាយដឹកនាំរាជរដ្ឋាភិបាលកម្ពុជាក្រោមការដឹកនាំរបស់សម្ដេចតេជោ ហ៊ុន សែនជានាយករដ្ឋមន្ត្រីគឺពិតជាដើរលើផ្លូវត្រឹមត្រូវហើយ។
លោកប៉ា សុជាតិវង្សបន្តថា វិស័យឯកជនពិតជាបានជួយអភិវឌ្ឍន៍ប្រទេសជាតិច្រើនណាស់ពិសេសលើការវិនិយោគ។ ការកសាងនូវបូរីនេះឡើងគឺជាការបង្កើតនៅភូមិសហគមន៍ថ្មីមួយទៀតដែលមានលក្ខណៈរៀបរយ។ នៅភ្នំពេញមានសហគមន៍ក្រីក្រចំនួន៣៣៥សហគមន៍ ក្នុងនាមយើងជាអាជ្ញាធរត្រូវយកចិត្តទុកដាក់ដើម្បីកុំឲ្យគម្លាតអ្នកមាននិងអ្នកក្រនៅឆ្ងាយពីគ្នាពេក ហើយដើម្បីធ្វើបញ្ហានេះបានវាមិនមែនជាបញ្ហាងាយស្រួលនោះទេ តែវាជាបញ្ហាប្រឈមធំមួយដែលយើងត្រូវនាំគ្នាពុះពារធ្វើ ហើយកិច្ចការងារនេះបើមិនមានការចូលរួមពីវិស័យឯកជននិងសង្គមស៊ីវិលទេក៏យើងពិបាកធ្វើដែរ។ លោកបន្តទៀតថា កាលពីព្រឹកថ្ងៃទី១១ ខែមករា ឆ្នាំ២០១៥ ក្នុងពិធីសម្ពោធបើកការដ្ឋានក្រុមហ៊ុនអ័រគីដេវីឡា "ជីវិតរស់នៅដ៏ប្រណីត" ដែលមានទីតាំងស្ថិតតាមបណ្តោយផ្លូវ២០០៤ក្នុងសង្កាត់ទឹកថ្លា ខណ្ឌសែនសុខ ដែលពិធីនេះក៏មានការចូលរួមពីលោកជំទាវហ៊ុន ម៉ាណាអគ្គនាយិកា វិទ្យុ និងទូរទស្សន៍បាយ័នផងដែរ។
លោកបន្តថា ម្ចាស់បូរីមួយចំនួនមិនទាន់គ្រប់គ្រងបូរីរបស់ខ្លួនបានល្អនៅឡើយទេ ទោះបីបូរីទាំងនោះមានច្បាប់របស់គេក្តី ដែលតម្រូវឲ្យម្ចាស់បូរីទាំងនោះត្រូវសហការឲ្យបានល្អជាមួយអាជ្ញាធរមូលដ្ឋាន ពិសេសលើការគ្រប់គ្រងស្ថិតិតែម្តង បើយើងគ្រប់គ្រងស្ថិតិមិនបានល្អទេពាក់ព័ន្ធនឹងបញ្ហាសន្តិសុខក៏ពិបាកនឹងគ្រប់គ្រងដែរ។ ដោយឡែកសម្រាប់បូរីអ័រគីដេវីឡា "ជីវិតរស់នៅដ៏ប្រណីត" គឺការគ្រប់គ្រងរបស់គេបានល្អប្រសើរដែលធ្វើឲ្យប្រជាពលរដ្ឋមានជំនឿចិត្ត រហូតបាននាំគ្នាមកទិញជាបន្តបន្ទាប់ ដែលធ្វើអោយក្រុមហ៊ុនមួយនេះដំណើរការបន្តបើកគម្រោងរបស់ខ្លួនជាបន្តបន្ទាប់មកដល់ពេលនេះ។
ក្នុងឱកាសនោះដែរ លោកស្រី ខៀវ សស៊ីលៀប នាយិកាប្រតិបត្តិទូទៅនៃអ័រគីដេវីឡា"ជីវិតរស់នៅដ៏ប្រណីត"បានមានប្រសាសន៍លើកឡើងដែរថា គម្រោង Orkide Villa the Royal ត្រូវបានបែងចែកជា៣ផ្សេងគ្នាលើផ្ទៃដីសរុបចំនួន៣៦ហិកតា ក្នុងនោះផ្នែកទី១គឺជាប្រភេទផ្ទះអាជីវកម្ម ១៨៨ល្វែង និងអគារចំនួន៨ផងដែរ ហើយមកដល់ពេលនេះលក់បានប្រមាណ៣៥%រួចហើយ។
ផ្នែកទី២ជាប្រភេទ ខុនដូដែលមាន៦អាគារសរុបប្រមាណ១.០០០បន្ទប់ បំពាក់ដោយគ្រឿងបរិក្ខារប្រើប្រាស់ ហើយគម្រោងនេះក្រុមហ៊ុននឹងសាងសង់ជាផ្សារទំនើប មជ្ឈមណ្ឌលកម្សាន្ត ហាងទំនិញ ភោជនីយដ្ឋាននិងអ្វីៗជាច្រើនទៀត ដែលនឹងបើកលក់នៅ៦ខែទៀត។ លោកស្រីបន្តថា គោលបំណងរបស់ក្រុមហ៊ុនគឺចង់បង្កើតសហគមន៍មួយដ៏ប្រណិតដែលមានការរស់នៅប្រកបដោយសុវត្ថិភាព សោភណភាព ផាសុខភាព ការរស់នៅមានលក្ខណៈឯកជន ដែលធ្វើអោយជីវិតរស់នៅរបស់អតិថិជនប្រកបដោយភាពល្អឥតខ្ចោះតាមស្តង់ដារអន្តរជាតិពិតប្រាកដ៕
ស្រីរ័ត្ន
0 Comments