កំដៅនៅតែបន្តកើនឡើងក្នុងតំបន់ទេសចរភ្នំគូលេនរវាងពលរដ្ឋនឹងអាជ្ញាធរ
សៀមរាប ៖ អស់រយៈពេល២ថ្ងៃមកហើយដែលកម្លាំងសមត្ថកិច្ចចំរុះជិត៣០០នាក់បានធ្វើការចុះរុះរើខ្ទមពលរដ្ឋសាងសង់គ្មានច្បាប់ទម្លាប់ជាច្រើនខ្នងស្ថិតនៅតំបន់ឧទ្យានជាតិភ្នំគូលេន បន្ទាប់ពីពលរដ្ឋទាំងនោះសាងសង់ នៅក្នុងចំការរបស់រដ្ឋបាល ព្រៃឈើ ហើយពលរដ្ឋទាំងនោះកំពុងឡើងកំដៅជាមួយសមត្ថកិច្ចផងដែរ ប៉ុន្តែសមត្ថកិច្ចចំរុះនៅរង់ចាំបទបញ្ជាថ្នាក់លើសិន។ ប្រតិបត្តិការចុះនេះ ធ្វើឡើងនៅព្រឹកថ្ងៃទី៤និងទី៥ខែមករានេះ ដឹកនាំកំលាំងដោយលោក ស៊ិន រុន អភិបាលរងខេត្ដសៀមរាប រដ្ឋបាលព្រៃឈើនិងអាជ្ញាធរមូលដ្ឋានព្រមទាំងកងកម្លាំងប្រដាប់អាវុធជាច្រើននាក់ផងដែរ។
ប្រភពបានឲ្យដឹងថា ខ្ទមប្រជាពលរដ្ឋប្រហែលជាង១០០ខ្នងត្រូវបានសមត្ថកិច្ចមានរដ្ឋបាល ព្រៃឈើ នគរបាល និងកងរាជអាវុធហត្ថ រុះរើចោលដោយអះអាងថា ជាសំណង់ខុសច្បាប់។ ប្រភពដដែលបានបន្ដថា កូនខ្ទមទាំងនោះបានសាងសង់នៅក្នុងអំឡុងខែធ្នូឆ្នាំ២០១៤កន្លងមកនោះ ស្ថិតនៅក្នុងតំបន់ឧទ្យានជាតិភ្នំគូលេន និងជាចំការព្រៃឈើរបស់រដ្ឋបាលព្រៃឈើ។ ពួកគេបានកាប់ដើមឈើដែល រដ្ឋបាលព្រៃឈើទើបដាំដុះកាលពីឆ្នាំ២០០២។
ប្រភពបានឲ្យដឹងបន្ថែមថា ខ្ទមដែលសមត្ថកិច្ចរុះរើនេះ មានប្រជាពលរដ្ឋជាង៥០០គ្រួសារ មកសង់ដោយលួចលាក់ ហើយនិងបានកាប់បំផ្លាញព្រៃឈើដែលទើបដាំថ្មីៗយកទៅសង់ខ្ទមពួកគេ ផងដែរ។ ទោះជាយ៉ាងណាការរុះរើមិនមានហិង្សាកើតឡើងនោះទេ ដោយសារពលរដ្ឋដែលបានប្រព្រឹត្តដឹងខ្លួន ហើយបានរត់គេចខ្លួនអស់ ហើយមន្ត្រីជំនាញកំពុងតាមចាប់ខ្លួនអ្នកនៅពីក្រោយខ្នង។ ប្រភព័ត៌មានបានឲ្យដឹងថា ពលរដ្ឋដែលសង់ខ្ទមនោះ មានជាង៥០០គ្រួសារ ដែលកន្លងមកធ្លាប់បានបិទផ្លូវនិងធ្លាប់មកតវ៉ានៅសាលាខេត្ដសៀមរាប បន្ទាប់ពីឃើញអាជ្ញាធរខេត្តសម្រេចកាត់ដីជាង៩៦ហិតា ផ្ដល់ឲ្យពលរដ្ឋ៨៥គ្រួសារ ដែលធ្លាប់បានធ្វើការតវ៉ាទាមទារយ៉ាងខ្លាំងក្លានាពេលកន្លងមក។
នាយខណ្ឌរដ្ឋបាលព្រៃឈើនៃខេត្តសៀមរាប លោក ទា គឹមសុទ្ធ បានមានប្រសាសន៍ប្រាប់ កម្ពុជាថ្មី តាមទូរស័ព្ទនៅរសៀលថ្ងៃទី០៥ ខែមករា ឆ្នាំ២០១៥នេះថា កម្លាំងសមត្ថកិច្ចចំរុះប្រមាណជិត៣០០នាក់បានចុះធ្វើការរុះរើនៅព្រឹកមិញ បន្ទាប់ពីពលរដ្ឋទាំងនោះ កំពុងប្រមូលផ្តុំគ្នាដើម្បីកាប់ព្រៃសាងសង់ខ្ទមឡើងវិញ។ លោកបន្តថា មកទល់ម៉ោងនេះស្ថានភាពនៅតំបន់ភ្នំគូលេនមានសភាពតឹងតែងនៅឡើយ ហើយក្រុមការងារកំពុងរង់ចាំបទបញ្ជាថ្មីរបស់លោកអភិបាលខេត្ត ដើម្បីមានផែនការបន្តទៀត។ លោកបន្តថា សមត្ថកិច្ចកំពុងតាមប្រមាញ់មេខ្លោងដែលនាំឲ្យពលរដ្ឋចូលមកសាងសង់សំណង់ខុសច្បាប់នៅតំបន់ភ្នំគូលេននេះ។
លោក សួស ណារិន អ្នកឃ្លាំមើល សិទ្ធិមនុស្ស នៃសមាគមអាដហុកនៃខេត្តសៀមរាប បានមានប្រសាសន៍ថា ខ្ទមដែលសមត្ថកិច្ចរុះរើនេះមានពលរដ្ឋប្រមាណជា៥០០គ្រួសារមកសាងសង់លួចលាក់ដោយខុសច្បាប់ ដូច្នេះករណីនេះលោកសាទរទៅនឹងចំណាត់ការរបស់សមត្ថកិច្ច។ លោកបន្តថា ទោះជាយ៉ាងណាការចុះរុះរើរបស់សមត្ថកិច្ចនោះពុំមានធ្វើហិង្សាណាមួយនោះទេ ហើយក៏ពុំមានពលរដ្ឋណាម្នាក់ចេញមុខតវ៉ា រារាំងនោះដែរ។ លោកបន្តថា នៅថ្ងៃទី០៥ ខែមករា ឆ្នាំ២០១៥នេះ ពលរដ្ឋនៅតែបន្តមានបំណងចង់បិទផ្លូវឡើងទៅកាន់តំបន់ទេសចរណ៍ភ្នំគូលេន ប៉ុន្តែសមត្ថកិច្ចបានរារាំងមិនឲ្យធ្វើយ៉ាងដូច្នេះនោះទេ។
ប្រភពព័ត៌មានថ្មីចុងក្រោយនៅតំបន់ភ្នំគូលេនបានឲ្យដឹងថា ពេលនេះសមត្ថកិច្ចចាប់បានមេខ្លោងបានម្នាក់ដែលមានឈ្មោះ ឈន ណាត់ហៅណាត ភេទប្រុសអាយុ៣៤ឆ្នាំមានស្រុកកំណើតភូមិទួលពន្លៃ ឃុំជីរោទី២ ស្រុកត្បូងឃ្មុំ ខេត្តត្បូងឃ្មុំ ព្រមទាំងដកហូតបាន ម៉ូតូ១គ្រឿង ទូរស័ព្ទដៃចំនួន២គ្រឿង, វិទ្យុ១គ្រឿងផងដែរ ហើយសមត្ថកិច្ចកំពុងដុតដៃដុតជើងដើម្បីស្វែងរកចាប់មេខ្លោងបន្ថែមទៀតយកមកផ្តន្ទាទោសទៅតាមផ្លូវច្បាប់។
ដោយឡែកប្រភពពីក្រុមប្រជាពលរដ្ឋដែលសាងសង់ខុសច្បាប់នៅតំបន់ភ្នំគូលេនបានឲ្យដឹងថា ពួកគេនៅតែចង់បានដីនៅក្នុងតំបន់ចំការពូជរបស់រដ្ឋបាលព្រៃឈើនេះ ព្រមទាំងដីដែលអាជ្ញាធរខេត្តកាត់ដីឲ្យក្រុមពលរដ្ឋចំនួន៩៦ហិតា ដែលដីទាំងនោះមិនបានចែកឲ្យពួកគេ ដូច្នេះបើអ្វីៗត្រូវបាត់បង់ពួកគេនៅតែបន្តការតវ៉ាតទៅទៀត៕
កុសល
0 Comments