ភ្នំពេញ ៖ លោក សោម អូន ប្រធានក្រុមប្រឹក្សាសហជីពជាតិកម្ពុជា (CCNU) តំណាងឲ្យកម្មករកម្មការនីរាប់សិបម៉ឺននាក់ នៅទូទាំងប្រទេស បានសម្ដែងការគាំទ្រយ៉ាងពេញទំហឹងនូវចំណាត់ការរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានបញ្ចុះតម្លៃអគ្គិសនីជូនកម្មករត្រឹម៦១០រៀល ក្នុងមួយគីឡូវ៉ាត់ម៉ោង និងការតំឡើងប្រាក់ឈ្នួលនិងការមិនកាត់ពន្ធ។
លោក សោម អូន ប្រធានក្រុមប្រឹក្សាសហជីពជាតិកម្ពុជា (CCNU) បានបញ្ជាក់ក្នុងបណ្ដាញហ្វេសប៊ុក កាលពីព្រឹកថ្ងៃទី១៤ ខែមករានេះថា សម្រាប់ដើមឆ្នាំ២០១៥នេះ កម្មករ កម្មការិនី ដែលបម្រើការងារនៅក្នុងវិស័យកាត់ដេរ និងស្បែកជើង ទទួលបានកាដូធំចំនួនបីពីរាជរដ្ឋាភិបាលកម្ពុជាគឺ ៖ កាដូទី១- ប្រាក់ឈ្នួលគោលអប្បបរមាថ្មីរបស់កម្មករ កម្មការិនីចំនួន១២៨ដុល្លារ (សម្រាប់កម្មករពេញសិទ្ធិ) នឹងអនុវត្ដចាប់ពីខែមករា ឆ្នាំ២០១៥នេះតទៅ , កាដូទី២-ការកាត់ពន្ធអាករលើប្រាក់ខែកម្មករ កម្មការិនីបានបង្កើនពី៥០ម៉ឺនរៀលដល់ចំនួនចាប់ពី៨០ម៉ឺនរៀលឡើងទៅ ទើបជាប់កាតព្វកិច្ចបង់ពន្ធ និងកាដូទី៣-ការបញ្ចុះតម្លៃអគ្គិសនីជូនកម្មករត្រឹម៦១០រៀល ក្នុងមួយគីឡូវ៉ាត់ម៉ោង ហើយកាដូទាំងបីខាងលើនេះបានជួយសម្រាលដល់ជីវភាពរស់នៅប្រចាំថ្ងៃរបស់កម្មករ។
លោកបន្តថា លោកតំណាងឲ្យឲ្យកម្មករកម្មការនីរាប់សិបម៉ឺននាក់នៅទូទាំងប្រទេសបានសម្ដែងការគាំទ្រយ៉ាងពេញទំហឹងនូវចំណាត់ការរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានបញ្ចុះតម្លៃអគ្គិសនីជូនកម្មករត្រឹម៦១០រៀលក្នុងមួយគីឡូវ៉ាត់ម៉ោង និងការតំឡើងប្រាក់ឈ្នួល កាមិនកាត់ពន្ធនៅក្នុងឆ្នាំថ្មីនេះ។
លោកបានបញ្ជាក់ថា ការអនុវត្តន៍ប្រាក់ខែគោលអប្បបរមាចាប់ពីខែមករា ឆ្នាំ២០១៥នេះ ភាគី សមាគមរោងចក្រកម្ពុជា និងណែនាំសមាជិករបស់ខ្លួនទាំងអស់ អនុវត្ដតាម កិច្ចព្រមព្រៀងរវាងរាជរដ្ឋាភិបាលកម្ពុជា ជាមួយនឹងសមាគមរោងចក្រកាត់ដេរ។ រហូតមកដល់ពេលនេះ អត់ទាន់មានរោងចក្រ សហគ្រាសណាមួយត្រូវបានបិទទ្វារ ដោយសារតែការអនុវត្តន៍កិច្ចព្រមព្រៀងដំឡើងប្រាក់ខែអប្បបរមាដល់កម្មករទេ។
លោកបានលើកឡើងថា ភាគីអ្នកបញ្ជាទិញសម្លៀកបំពាក់នៅកម្ពុជានៅឆ្នាំ២០១៥នេះ ត្រូវបញ្ជាទិញឱ្យបានច្រើន ដើម្បីបង្កើនសកម្មភាពផលិតសម្លៀកបំពាក់ឱ្យបានច្រើនតាមតម្រូវការទីផ្សារ ទៅកាន់ទីផ្សារអាមេរិក និងទីផ្សារនៃបណ្ដាប្រទេសអឺរ៉ុប និងបណ្ដាប្រទេសនានាក្នុងសកលលោក។ នៅក្នុងឆ្នាំ២០១៤កន្លងទៅនេះ ការបញ្ជាទិញសម្លៀកបំពាក់នៅកម្ពុជាពុំទាន់មានការបញ្ជាទិញកើនឡើងនៅឡើយទេ។
សូមបញ្ជាក់ថា នៅក្នុងឆ្នាំ២០១៤កន្លងមក ការធ្វើបាតុកម្ម កូដកម្ម មានចំនួនជិត៤០០លើក ទាំងស្របច្បាប់និងមិនស្របច្បាប់ នៅក្នុងវិស័យឧស្សាហ-កម្មកាត់ដេរ តែពុំអាចអត់បានទេ នៅ ក្នុងសង្គមប្រជាធិបតេយ្យ។ ប៉ុន្តែទោះបីជាមានការធ្វើបាតុកម្ម កូដកម្ម ក្នុងឆ្នាំ២០១៤ កន្លងទៅនេះ ចំនួនជិត៤០០លើកក្ដី តែមិនបានធ្វើឱ្យមានការប៉ះពាល់ដល់វិស័យកាត់ដេរ និងស្បែកជើងនោះទេ គឺវិស័យកាត់ដេរនៅតែមានស្ថិរភាពល្អប្រសើរ។
លោកបានប្រៀបធៀបថា ស្ថានភាពការងារ ប្រាក់ឈ្នួលរបស់កម្មករ កម្មការិនីក្នុងវិស័យកាត់ដេរនៅកម្ពុជា ចាប់ពីឆ្នាំ២០១៥ ជាមួយនឹងប្រទេសជិតខាងគឺប្រាក់ឈ្នួលអប្បបរមារបស់កម្មកររោងចក្រកាត់ដេរ និងស្បែកជើង នៅកម្ពុជាខ្ពស់ជាងប្រាក់ឈ្នួលនៅប្រទេសមួយចំនួនក្នុងតំបន់រួមមាន ប្រទេសភូមា ឡាវ បង់ក្លាដេស និងបណ្ដាប្រទេសមួយចំនួនទៀត។ ចំណែកប្រាក់ឈ្នួលអប្បបរមាប្រហាក់ប្រហែលនិងប្រាក់ឈ្នួលកម្មករនៅប្រទេសវៀតណាម។ ស្ថានភាពគោរពច្បាប់ ការងារនៅកម្ពុជាល្អជាងប្រទេសនានាក្នុងតំបន់ ហើយស្ថិរភាពនយោបាយសន្តិសុខក៏ល្អ អ្នកវិនិយោគទុន ពុំមានការព្រួយបារម្ភនោះទេ។
ឧស្សាហកម្ម វិស័យកាត់ដេរ និងស្បែកជើងនៅកម្ពុជាបានផ្ដល់ការងារជូនប្រជាពលរដ្ឋធ្វើមានចំនួនជាង៧០ម៉ឺននាក់ ដែលជាមធ្យមទទួលបានប្រាក់ឈ្នួលក្នុង១ខែជិត២០០ដុល្លារ រួមទាំងការងារថែមម៉ោង និងបានផ្ដល់ដោយប្រយោលចិញ្ចឹមមនុស្សប្រមាណ៤លាននាក់ និងជួយឱ្យមាន ចរន្តសេដ្ឋកិច្ចដើរជាប្រចាំ រួមមាន ថ្លៃឈ្នួលផ្ទះ អ្នកលក់ដូរ ឡានឈ្នួល ម៉ូតូឌុប និង សេវាគ្លីនិកសុខភាព នៅតំបន់ជិតរោងចក្រ និងបញ្ញើទៅក្រុមគ្រួសារនៅស្រុកកំណើតជាប្រចាំខែ និងការចាយវាយប្រចាំថ្ងៃរបស់កម្មករ កម្មការិនីទាំងជាង៧០ម៉ឺននាក់៕
ឌួងវិរះជ័យ
 គាំទ្រយ៉ាងពេញទំហឹង ចំពោះចំណាត់ការរបស់សម្ដេចតេជោ ក្នុងការបញ្ចុះតម្លៃអគ្គិសនីជូនកម្មករត្រឹម៦១០រៀលក្នុងមួយគីឡូវ៉ាត់ម៉ោង){kind=link}
0 Comments