កីឡាករ​អេឡិចត្រូនិក​កម្ពុជា​ចេញទៅ​ប្រកួត​ MATIC​ នៅ​ចិន​

កីឡាករ​អេឡិចត្រូនិក​កម្ពុជា​ចំនួន​១៥​រូប បាន​ចេញទៅ​ចូលរួម​ប្រកួត​ MATIC​ នៅ​ប្រទេស​ចិន នៅ​ព្រឹក​ថ្ងៃទី​១៦ ​ខែមករា​ ឆ្នាំ​២០១៥​នេះ។ លោក លន់ សា​មឺ​ឌី អគ្គលេខាធិការ​សហព័ន្ធ​កីឡា​អេឡិចត្រូនិក​កម្ពុជា​ (EFC) បា​និយាយ​ឲ្យ​ដឹង​នៅ​ប្រលានយន្តហោះ​អន្តរជាតិ​ភ្នំពេញ​ថា សហព័ន្ធ​បាន​បញ្ជូន​កីឡាករ​ចំនួន​៣​ក្រុម ដែល​មួយ​ក្រុម​មាន​គ្នា​៥​នាក់ សរុប​១៥​នាក់​ឲ្យ​ទៅ​ចូលរួម​ក្នុង​ការ​ព្រឹត្តិការណ៍​កីឡា​អេឡិចត្រូនិក​អន្តរជាតិ MATIC 2015 (Mission Against Terror International Championships )​ លើក​ទី​៤ ដែល​រៀបចំ​នៅ​ខេត្ត​ Zhuai ប្រទេស​ចិន​ ចាប់​ពី​ថ្ងៃ​ទី​១៧-១៨​ ខែមករា ​ឆ្នាំ​២០១៥​នេះ។ ព្រឹត្តិការណ៍​កីឡា​អេឡិចត្រូនិក​ដ៏​ធំ​ប្រចាំ​តំបន់​ដែល​រៀបចំ​ធ្វើឡើង​មួយឆ្នាំ​ម្តងនេះ មាន​ការ​ចូលរួម​ប្រកួតប្រជែង​ពី​ក្រុម​កីឡាករ​អេឡិចត្រូនិក​ចំនួន​២០​ក្រុម មកពី​៧​ប្រទេស​ផ្សេងៗ​គ្នា ដែល​រួមមាន​កម្ពុជា​៣​ក្រុម ម្ចាស់ផ្ទះ​ចិន​៨​ក្រុម​ម៉ាឡេស៊ី​២ ​ក្រុម​សិង្ហ​បុរី​២​ក្រុម ឥណ្ឌូនេស៊ី​២​ក្រុម ថៃ​២​ក្រុម និង​ តៃវ៉ាន់​ចំនួន​១​ក្រុម។​

សម្រាប់​កីឡាករ​អេឡិចត្រូនិក​កម្ពុជា​ទាំង​៣​ក្រុម​នោះ មាន​Secret , Neer Care និ ង MD ដែល​សុទ្ធតែ​ជា​កីឡាករ​ជម្រើស​ជើងឯក​ពី​ការប្រកួត​ទូទាំង​ប្រទេស​កម្ពុជា​កន្លង​មក។ លោក លន់ សា​មឺ​ឌី បាន​បញ្ជាក់​ឲ្យ​ដឹង​ទៀត​ថា ព្រឹត្តិការណ៍ MATIC 2015​នេះ មាន​ប្រាក់​រង្វាន់​សរុប​ចំនួន​៣​ម៉ឺន​ដុល្លារ​អាមេរិក ដែល​អ្នកឈ្នះ​ចំណាត់ថ្នាក់​លេខ​១ ជា​ក្រុម​នឹង​ទទួល​បាន​១៥.០០០​ដុល្លារ លេខ​២​បាន​៧.០០០​ដុល្លារ លេខ​៣​បាន​៤.០០០​ដុល្លារ និង​លេខ​៤​បាន​២.០០០​ដុល្លារ។ ចំពោះ​រង្វាន់​សម្រាប់​ឯកត្តជន​វិញ លេខ​១​ទទួល​បាន​៥០០​ដុល្លារ លេខ​២​បាន​៤០០​ដុល្លារ លេខ​៣​បាន​២០០​ដុល្លារ និង​លេខ​៤​បាន​១០០​ដុល្លារ។ នេះ​ជា​លើក​ទី​៤​ហើយ សម្រាប់​ព្រឹត្តិការណ៍​ប្រកួត​កីឡា​អេឡិចត្រូនិក​អន្តរជាតិ MATIC ដែល​កម្ពុជា​បាន​ចូលរួម​ប្រកួតប្រជែង ខណៈ​ដែល​៣​លើក​កន្លងមក ក្រុម​កីឡាករ​អេឡិចត្រូនិក​កម្ពុជា​បាន​ជាប់​ជា​ជើងឯក​រង​២​ឆ្នាំ​ជាប់ៗ​គ្នា គឺ​MATIC ឆ្នាំ​២០១៣ នៅ​ប្រទេស​ថៃ និង MATIC ឆ្នាំ​២០១៤ ដែល​កម្ពុជា​ធ្វើជា​ម្ចាស់ផ្ទះ​រៀបចំ​ការប្រកួត​នោះ។ គួរ​បញ្ជាក់​ថា ក្នុង​ឆ្នាំ​២០១២ ដែល​ជា​ឆ្នាំ​ដំបូង​របស់​កម្ពុជា​ចូលរួម​ការប្រកួត MATIC ដែល​រៀបចំ​នៅ​ប្រទេស​ម៉ាឡេស៊ី​នោះ កម្ពុជា​មិនបាន​ជាប់​ចំណាត់ថ្នាក់​ទេ។​

អគ្គលេខា​សហព័ន្ធ​កីឡា​អេឡិចត្រូនិក​កម្ពុជា​បាន​បញ្ជាក់​ថា សហព័ន្ធ​កីឡា​អេឡិចត្រូនិក​កម្ពុជា បាន​ចាប់បដិសន្ធិ​ឡើង​នៅ​ថ្ងៃទី​៣០ ខែតុលា​ ឆ្នាំ​២០១៤ ក្រោម​ការ​ជ្រោមជ្រែង​របស់​គណៈ​កម្មា​ធិការ​ជាតិ​អូឡាំពិក​កម្ពុជា ដើម្បី​ឆ្លើយតប​តាម​គោលនយោបាយ​កីឡា​ជាតិ និង​គោលការណ៍​កីឡា​E.Sports អន្តរជាតិ។

ជាមួយនឹង​ក្តី​សង្ឃឹម​ក្នុង​ការ​ចូលរួម​ប្រកួត MATIC 2015​នេះ លោក លន់ សា​មឺ​ឌី ក៏បាន​បង្ហាញ​នូវ​មហិច្ឆតា នឹង​បង្កើន​ការចូលរួម​ជា​លក្ខណៈ​អន្តរជាតិ​នេះ​ឲ្យ​បាន​ច្រើនដង​ថែមទៀត ដើម្បី​លើកកម្ពស់ និង​បង្កើន​សមត្ថភាព​របស់​កីឡាករ​អេឡិចត្រូនិក​កម្ពុជា​ឲ្យ​កាន់​តែ​ខ្លាំង​ឡើង៕

​វិ​សិទ្ធ​