ភ្នំពេញ ៖ ដើមចមនៃការនិយាយវាយបកគ្នាដោយពាក្យសំដីទៅវិញទៅមកប្រៀបបានទៅនឹងអាយ៉ៃឆ្លើយឆ្លងដែលរកកន្លែងបញ្ចប់មិនឃើញរវាងលោក ចែម វុឌ្ឍសុវីន និងតារាសំដែងអ្នកនាង ចន ច័ន្ទលក្ខិណានេះដែរ គឺដោយសារតែតារាសិល្បៈដែលទើបធ្លាក់ខ្លួនជាស្ត្រីមេម៉ាយ នាងចន ច័ន្ទលក្ខិណានិយាយទាមទាររកភាពយុត្តិធម៌ឲ្យបេក្ខនារីឈ្មោះ ស្រីម៉ៅ ដែលត្រូវបានគណៈកម្មការមិនឲ្យជាប់ជ័យលាភីក្នុងការចូលរួមប្រកួតប្រជែងក្នុងកម្មវិធីកំពូលតារាបង្ហាញម៉ូដកម្ពុជានោះ។
«កម្ពុជាថ្មី» មិនអាចទាក់ទងស្វែងរកការសួរនាំពីតារាសំដែងចាស់វស្សាអ្នកនាង ចន ច័ន្ទលក្ខិណាបានទេ ដោយប្រព័ន្ធទូរស័ព្ទមិនអាចហៅចូលបាន នេះប្រហែលជានាងកំពុងស្ថិតនៅប្រទេសវៀតណាមមើលថែជំងឺប្អូនស្រីរបស់នាងដែលបានជួបគ្រោះថ្នាក់ចោរឆក់កាបូបកាលពីពេលថ្មីៗនេះហើយមើលទៅ។ តែបើតាមអ្វីដែលនាងធ្លាប់បាននិយាយលើកឡើងក្នុងន័យតបតជាមួយនឹងលោក ចែម វុឌ្ឍសុវីនតាមបណ្ដាញហ្វេសប៊ុកកន្លងមកថា នាងមិនចង់និយាយអ្វីច្រើនឡើយ ពីព្រោះនាងបានធ្វើអ្វីដែលនាងចង់ធ្វើចង់និយាយរួចហើយ ហើយនាងក៏មិនបានថាលោកជាគណៈកម្មការទីងមោងដែរ។ គេនិយាយវាយបកគឺដើម្បីមុខជំនួញរកស៊ីជារឿងរបស់គេ នេះក៏ព្រោះតែចង់ឲ្យកម្មវិធីបន្តទៅមុខទៀត។ អ្នកណាបានធ្វើអ្វីដឹងខ្លួនច្បាស់ណាស់មិនចាំបាច់និយាយច្រើននាំឲ្យខះទឹកមាត់ឡើយ។
ដោយឡែកសម្រាប់លោក ចែម វុឌ្ឍសុវីនវិញក៏យើងមិនអាចទាក់ទងស្វែងរកការសុំសួរនាំបានដែរ ពីព្រោះមិនមានលេខទូរស័ព្ទ។ ថ្មីៗនេះលោក ចែម វុឌ្ឍសុវីន ដែលជាគណៈកម្មការមួយរូបក្នុងកម្មវិធីកំពូលតារាបង្ហាញម៉ូដកម្ពុជាធ្លាប់បាននិយាយបកចំៗឥតសំចៃមាត់ចំពោះតារាសំដែង ចន ច័ន្ទលក្ខិណាប្រាប់បណ្ដាញផ្សព្វផ្សាយក្នុងស្រុកមួយថា លោកបានស្គាល់កញ្ញា ស្រីម៉ៅ តាំងពីនាងចូលប្រឡូកក្នុងអាជីពបង្ហាញម៉ូដដំបូងមកម្ល៉េះ ដែលកាលនោះ ចន ច័ន្ទលក្ខិណាមិនទាន់ស្គាល់ថាស្រីម៉ៅ ជាអ្នកណានៅឡើយផង ហើយលោកជាអ្នកជំរុញស្រីម៉ៅឲ្យខំតស៊ូឡើង។ តែក្នុងនាមលោកជាគណៈកម្មការមួយរូបលោកមិនអាចយកការស្រឡាញ់រាប់អានទៅកាន់សេចក្តីចំពោះអ្នកប្រកួតប្រជែងនោះឡើយ ហើយលោកក៏មិនបានលំអៀងទៅលើកញ្ញា គង់ កាដែរ គឺលោកធ្វើទៅតាមអ្វីដែលឃើញជាក់ស្តែងដោយ គង់ កា នាងធ្វើបានល្អច្រើន។ លោក ចែម វុឌ្ឍសុវីន និយាយតបទៅអ្នកនាង ចន ច័ន្ទលក្ខិណាទៀតថា « ចន ច័ន្ទលក្ខិណាមិនមែនជាអ្នកជំនាញលើកផ្នែកគណៈកម្មការឲ្យពិន្ទុពិតប្រាកដឡើយ ដូច្នេះអ្នកនាង ចន ច័ន្ទលក្ខិណា មិនគួរណាមកនិយាយវាយប្រហារកម្មវិធីនេះឡើយ»៕ ឥន្ទ្រីយ៍ទេព
0 Comments