កណ្ដាល ៖ កម្លាំងអធិការដ្ឋាននគរបាលស្រុកកណ្ដាលស្ទឹងចុះល្បាតចល័តនៅភូមិសាស្ត្រ បានសហការជាមួយនឹងកម្លាំងប៉ុស្តិ៍ព្រែកស្លែងបានធ្វើការឃាត់ខ្លួនជនសង្ស័យចំនួន០២នាក់ ដោយដកហូតបានថ្នាំញៀនប្រភេទម៉ាទឹកកកចំនួន១កញ្ចប់ កាលពីវេលាម៉ោង២២និង០០នាទីយប់ ថ្ងៃទី២៤ ខែកុម្ភៈ ឆ្នាំ២០១៥ នៅចំណុចផ្លូវជាតិលេខ២ ខាងក្រោយវត្តវិហាបិទមាស ភូមិព្រែកស្លែង ឃុំព្រែកស្លែង ស្រុកកណ្ដាលស្ទឹង ខេត្តកណ្តាល។
ជនសង្ស័យដែលត្រូវបានឃាត់ខ្លួននោះ ទី១-មានឈ្មោះ ឆិល ផានិត ភេទប្រុស អាយុ២៤ឆ្នាំ មុខរបរធ្វើការសំណង់ និងទី២-ឈ្មោះ លី គឹមសួ ភេទប្រុស អាយុ២២ឆ្នាំ មុខរបរកសិករ អ្នកទាំង២រស់នៅភូមិពន់ចាន ឃុំព្រែកស្លែង ស្រុកកណ្ដាលស្ទឹង ខេត្តកណ្តាល។
បើតាមប៉ូលិសស្រុកកណ្ដាលស្ទឹងបានឲ្យដឹងថា មុនពេលកើតហេតុថ្ងៃទី២៣ ខែកុម្ភៈ ឆ្នាំ២០១៥ វេលាម៉ោង១៣និង៣០នាទី ជនសង្ស័យឈ្មោះ លី គឹមសួ បានជិះម៉ូតូម្នាក់ឯងម៉ាកHONDASLពណ៌ស លាយខៀវ ពាក់ស្លាកលេខកោះកុង1A.0386 ទៅទីក្រុងភ្នំពេញ ម្តុំពេទ្យលោកសង្ឃដើម្បីទិញថ្នាំញៀនប្រភេទម៉ាទឹកកចំនួន១កញ្ចប់តូចតំលៃ៦០.០០០រៀល(ប្រាំមួយម៉ឺនរៀល)ដែលគេពុំស្គាល់ឈ្មោះអ្នកលក់ទេ រួចយកមកជក់ជាមួយឈ្មោះ ឆិល ផានិត ភេទប្រុស នៅវេលាម៉ោង១៩ ថ្ងៃដដែល ហើយក៏បានទៅជក់នៅក្នុងផ្ទះរបស់ ឆិល ផានិត ដោយពួកគេបានរំលែកទុកថ្នាំពាក់កណ្ដាល។ លុះមកដល់ថ្ងៃទី២៤ ខែកុម្ភៈ ឆ្នាំ២០១៥ វេលាម៉ោង២២និង០០នាទីយប់ ជនសង្ស័យទាំង២នាក់បានលាក់ថ្នាំញៀនដែលនៅសល់ទុកក្នុងមួកក្រណាត់ពណ៌ស ពេលនោះជនសង្ស័យ០២នាក់ខាងលើបានជិះម៉ូតូមកដល់ចំណុចកើតហេតុក៏ត្រូវសមត្ថកិច្ចឃាត់ឲ្យឈប់ រួចធ្វើការឆែកឆេរក៏បានរកឃើញ មានម្សៅក្រាមពណ៌សថ្លាចំនួន០១កញ្ចប់តូចប្រភេទម៉ាទឹកកក(Ice) សង្ស័យជាសារធាតុញៀន ម៉ូតូម៉ាកSL ពណ៌សលាយខៀវ លេខតួ១១០១៤៧៥ លេខម៉ាស៊ីន១១០១៤៦ ពាក់ស្លាកលេខ កោះកុង២A០៣៨៦ ទូរស័ព្ទដៃចំនួន០៤គ្រឿង មានម៉ាកiphone5ពណ៌សចំនួន០១គ្រឿង ម៉ាកibhoneពណ៌ខ្មៅចំនួន០១គ្រឿង ម៉ាកNokiAX2ចំនួន០១គ្រឿង ពណ៌ស និងម៉ាកNoKiAចុចពិលពណ៌ខ្មៅចំនួន០១គ្រឿង កាបូបដៃចំនួន០២ ប័ណ្ណបើកបររបស់ឈ្មោះ លី គឹមសួ០១សន្លឹក អត្តសញ្ញាណប័ណ្ណគូបពីរបស់ លី គឹមសួ០១សន្លឹក មួកក្រណាត់ពណ៌ស១ វិក្កយបត្រលក់ទូរស័ព្ទ០១សន្លឹក ប្រាក់ខ្មែរចំនួន២.២៧០០រៀល(ពីរម៉ឺនពីរពាន់ប្រាំពីររយរៀល) និងប្រាក់ដុល្លារចំនួន៤ដុល្លារ។ ហើយសមត្ថកិច្ចបានធ្វើការឃាត់ខ្លួនបញ្ជូនជនសង្ស័យទាំងពីរនាក់មកកាន់អធិការដ្ឋាននគរបាលស្រុកកណ្ដាលស្ទឹង។
ជនសង្ស័យ រួមទាំងវត្ថុតាង កម្លាំងជំនាញកំពុងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់៕
មុនី
0 Comments