ព្រះសីហនុ ៖ លោក នូ សុផល ប្រធានមន្ទីរទេសចរណ៍ខេត្តព្រះសីហនុបានមានប្រសាសន៍ឲ្យដឹង ថា នៅខែមករាដើមឆ្នាំ២០១៥ ភ្ញៀវទេសចរចូលមកកំសាន្តនៅខេត្តព្រះសីហនុមានចំនួន២០១.៣២៤នាក់ ក្នុងនោះភ្ញៀវជាតិមានចំនួន១៥៩.២៧៩នាក់ និងភ្ញៀវអន្តរជាតិមានចំនួន៤២.០៤៥នាក់ បើប្រៀបធៀបនឹងខែធ្នូ ឆ្នាំ២០១៤ កើនឡើង៧០.៨៤% ។ ក្នុងនោះភ្ញៀវជាតិកើនឡើងចំនួន៨៦.០២% និងភ្ញៀវទេសចរអន្តរជាតិកើនឡើង៣០.៥០% ។ បើប្រៀបធៀបទៅនឹងខែមករា ឆ្នាំ២០១៤ ភ្ញៀវទេសចរមានការកើនឡើង៥.០៩% ក្នុងនោះភ្ញៀវជាតិកើន៦.៣៩% និងភ្ញៀវទេសចរអន្តរជាតិកើនឡើង០.៤៦%។
លោកប្រធានមន្ទីរទេសចរណ៍បានបញ្ជាក់ថា ក្នុងខែមករា ឆ្នាំ២០១៥ មានភ្ញៀវទេសចរដែលធ្វើដំណើរតាមនាវាចូលចតធ្វើទស្សនកិច្ចនៅក្នុងខេត្តព្រះសីហនុចំនួន០២លើក មានភ្ញៀវសរុបចំនួន ១.៩៧៤នាក់។
នៅខេត្តព្រះសីហនុមានរមណីយដ្ឋានទេសចរណ៍និងកន្លែងកំសាន្តចំនួន២២កន្លែង មានក្រុមហ៊ុនរថយន្តដឹកភ្ញៀវទេសចរមានចំនួន១២កន្លែង និងប្រលានយន្តហោះអន្តរជាតិកងកេងចំនួន០១ និងកំពង់ផែអន្តរជាតិ០១កន្លែង ដែលមានប្រជាពលរដ្ឋបម្រើការងារក្នុងសេវាទេសចរណ៍គ្មានផ្សែងនេះសរុបចំនួន៧.៧០១នាក់ ស្រី៣.៤៩៥នាក់។
លោកបានបន្តឱ្យដឹងបន្តថា កំណើនភ្ញៀវទេសចរដែលចូលមកកំសាន្តនៅខេត្តព្រះសីហនុមានការកើនឡើងដោយសារខេត្តព្រះសីហនុធានាបាននូវសុវត្ថិភាព សន្តិសុខ សណ្ដាប់ធ្នាប់សាធារណៈបានល្អ និងសោភ័ណភាពក្នុងខេត្តត្រូវបានកែលំអជាបន្តបន្ទាប់ធ្វើឱ្យមានភាពកាន់តែទាក់ទាញប្រសើរឡើង។ អាជ្ញាធរបានយកចិត្តទុកដាក់ពង្រឹងគុណភាព និងសេវាកម្មទេសចរណ៍បានកាន់ល្អ ព្រមទាំងធ្វើការអប់រំដល់អាជីវករបម្រើសេវាកម្មទេសចរណ៍ឱ្យចេះរាក់ទាក់ និងប្រកបអាជីវកម្មដោយគុណភាព រក្សាបាននូវអនាម័យ បរិស្ថាន ជាពិសេសការពង្រឹងនូវសុវត្ថិភាពជូនភ្ញៀវទេសចរជាតិ និងអន្តរជាតិបានល្អ ហើយភ្ញៀវទេសចរមានជំនឿជឿជាក់មកលេងកំសាន្តនៅខេត្តព្រះសីហនុម្តងហើយ ចង់មកលេងកំសាន្តម្តងទៀត។
តាមការឱ្យដឹងពីមន្ទីរទេសចរណ៍ខេត្តព្រះសីហនុបានឱ្យដឹងថា ឆ្នាំ២០១៤មានភ្ញៀវទេសចរជាតិ និងអន្តរជាតិមកលេងកំសាន្តខេត្តព្រះសីហនុមានចំនួន១.៣២៧.៧៤៨នាក់ ក្នុងនោះភ្ញៀវជាតិមានចំនួន៩៦៧.១០៩នាក់ និងភ្ញៀវទេសចរអន្តរជាតិមានចំនួន៣៥៨.៦៣៩នាក់៕
ស៊ុយ ចាន់ធា
0 Comments