សំណុំរឿង​ប៉ុនប៉ង​ធ្វើ​ភេរវកម្ម​ទៅលើ​ស្ថានទូត​៣​នៅ​កម្ពុជា ៖ ជនបរទេស​៣​នាក់​ជាប់​ពន្ធនាគារ​ក្នុង​ម្នាក់ៗ​៨​ឆ្នាំ​

ភ្នំពេញ ៖ លោក ឃឹម ប៉ុណ្ណ ប្រធាន​ក្រុមប្រឹក្សា​ជំនុំជម្រះ​តុលាការ​កំពូល​បាន​ថ្លែង​កាលពី​ព្រឹក​ថ្ងៃទី​០៤ ខែ​កុម្ភៈ ឆ្នាំ​២០១៥​ថា ជនបរទេស​៣​នាក់​រួមមាន ​ជនជាតិ​បង់ក្លាដេស​២​នាក់​ និង​ជនជាតិ​នេប៉ាល់​ម្នាក់ ត្រូវ​បាន​តុលាការ​កំពូល​សម្រេច​តម្កល់​សាលដីកា​របស់​សាលា​ឧទ្ធរណ៍​ទុកជា​បាន​ដដែល ពោល​គឺ​ជនជាប់ចោទ​ទាំងអស់​ត្រូវ​ជាប់​ពន្ធនាគារ​ម្នាក់ៗ​៨​ឆ្នាំ ពី​បទ " ភេរវកម្ម " ពាក់ព័ន្ធ​ការ​គំរាម​កំហែង​ប៉ុនប៉ង​ធ្វើ​ភេរវកម្ម​ទៅលើ​ស្ថានទូត​ចំនួន​៣​ប្រចាំ​ព្រះរាជាណាចក្រ​កម្ពុជា​គឺ សហរដ្ឋអាមេរិក ចក្រភព​អង់គ្លេស និង​អូស្ត្រាលី​។​

ជនជាតិ​បរទេស​ទាំង​៣​នេះ​មានឈ្មោះ RAFIQUL ISLAM ហៅ KALAM អាយុ​៤៧​ឆ្នាំ ជន​ជាតិ​បង់ក្លាដេស មុខរបរ​ម្ចាស់​ភោជនីយដ្ឋាន​ម្ហូប​ឥណ្ឌា ឃាត់ខ្លួន​កាលពី​ថ្ងៃទី​០២ ខែ​មិថុនា ឆ្នាំ​២០១០ ឈ្មោះ MIAH MOHAMMAD HUYMAYUN KABIR អាយុ​៦១​ឆ្នាំ ជនជាតិ​បង់ក្លាដេស មុខរបរ​មិន​ពិតប្រាកដ ឃាត់ខ្លួន​ថ្ងៃទី​០១ ខែ​តុលា ឆ្នាំ​២០១០ និង ឈ្មោះ D.P PAUDYAL ហៅ DIP អាយុ​៤៩​ឆ្នាំ មុខរបរ​អ្នកជំនួញ ឃាត់ខ្លួន​ថ្ងៃទី​០២ ខែមិថុនា ឆ្នាំ​២០១០​។​

ជនជាប់ចោទ​ទាំង​៣​នាក់​ជាប់ចោទ​ពី​បទ​ភេរវកម្ម ( ហិង្សា​ដោយមាន​គោលដៅ​ក្នុង​បំណង​ជំរុញ និង​បង្ហាញ​សារ​មាន​លក្ខណៈ​ដាក់​សម្ពាធ​ផ្នែក​នយោបាយ​ប៉ះពាល់​ដល់​សន្តិសុខ​ជាតិ និង​បង្ក​ភាព​ភ័យ​តក់ស្លុត​ដល់​បុគ្គល​នៃ​ស្ថានទូត អូស្ត្រាលី អាមេរិក និង​ចក្រភព​អង់គ្លេស ដែល​ត្រូវ​បាន​ការពារ​ជា​អន្តរជាតិ ) និង​បទ​ចូល​មក​ក្នុង​ព្រះរាជាណាចក្រ​កម្ពុជា ដោយ​គ្មាន​ការអនុញ្ញាត ប្រព្រឹត្ត​នៅ​រាជធានី​ភ្នំពេញ កាលពី​ខែមេសា ឆ្នាំ​២០១០ បទល្មើស​ព្រហ្មទណ្ឌ​ដែល​មាន​ចែង​តាម​មាត្រា​២៩ និង មាត្រា​៣៣​នៃ​ច្បាប់​ស្តី​ការ​ប្រឆាំង​នឹង​ភេរវកម្ម និង​មាត្រា​២៩​នៃ​ច្បាប់​ស្តី​អន្តោប្រវេសន៍​។

ពាក់ព័ន្ធ​បញ្ហា​នេះ ប្រភព​ព័ត៌មាន​ពី​មន្ត្រី​សមត្ថកិច្ច​បាន​បង្ហើប​ឲ្យ​ដឹង​ថា កាលពី​ខែ​មេសា ឆ្នាំ​២០១០ ស្ថានទូត​អូស្ត្រាលី និង​ស្ថានទូត​សហរដ្ឋអាមេរិក​ប្រចាំ​នៅ​ព្រះរាជាណាចក្រ​កម្ពុជា បាន​ទទួល​លិខិត​អនាមិក​មួយ​ច្បាប់ ពាក់ព័ន្ធ​ការ​គំរាមកំហែង​ប៉ុនប៉ង​ធ្វើ​ភេរវកម្ម ដោយ​ដាក់​ចំណងជើង ថា " ភេរវករ​ចំនួន​៤​នាក់​នៃ​ក្រុម​អាល់​កៃ​ដា អាស៊ី អាគ្នេយ៍​កំពុង​មាន​វត្តមាន​នៅ​រាជធានី​ភ្នំពេញ​" ។ លិខិត​ដែល​ត្រូវ​ផ្ញើ​មកនេះ ត្រូវ​បាន​សរសេរ និង​ចុះហត្ថលេខា ដោយ​មនុស្ស​ចំនួន​៦​នាក់ មាន​ឈ្មោះ Kalam , Deep , Shiva , Raj , Kumar និង Edris​។ លិខិត​នេះ​ក៏បាន​ចម្លង​ទៅ​ស្ថានទូត​អង់គ្លេស​ប្រចាំ​នៅ​ព្រះរាជាណាចក្រ​កម្ពុជា​ផង​ដែរ​។​

ប្រភព​ព័ត៌មាន​បន្ត​ថា ឆ្លងតាម​ការស្រាវជ្រាវ និង​ធ្វើ​កោសល្យវិច័យ​លើ​ស្នាម​អក្សរ សរសេរ​ដៃ ជា​ភាសា​អង់គ្លេស​នៅ​លើ​លិខិត​អនាមិក ពាក់ព័ន្ធ​ការ​គំរាមកំហែង​ប៉ុនប៉ង​ធ្វើ​ភេរវកម្ម​ធ្វើ​ភេរវកម្ម​នេះ សមត្ថកិច្ច​នាយកដ្ឋាន​សន្តិសុខ​ផ្ទៃក្នុង​នៃ​ក្រសួងមហាផ្ទៃ​បាន​ធ្វើ​ការ​ឃាត់​ខ្លួន​ជនសង្ស័យ​ចំនួន​៣​នាក់ តែម្តង​។ ផ្ទុយ​មកវិញ​ជនបរទេស​៣​នាក់​បាន​ថ្លែង​ក្នុង​បរិវេណ​តុលាការ​កំពូល កាលពី​ព្រឹក​ថ្ងៃទី​០៤ ខែ​កុម្ភៈ​ថា ការសម្រេច​របស់​តុលាការ​កំពូល គឺជា​រឿង​អយុត្តិធម៌ ពីព្រោះ​ពួកគេ​ពុំបាន​ប្រព្រឹត្ត​ដូច​ការ​ចោទប្រកាន់​នោះ​ទេ​៕

មករា​

​