បន្ទាយមានជ័យ ៖ កម្លាំងប៉ូលិសប្រឆាំងបទល្មើសសេដ្ឋកិច្ចខេត្តបន្ទាយមានជ័យបានបង្ក្រាប និងឃាត់រថយន្ត១គ្រឿងដឹកទំនិញគ្មានច្បាប់ តែក្រុមគយមិនសប្បាយចិត្តព្រោះបាត់លាភសក្ការៈ។ ប៉ូលិសចាប់រថយន្តគេចពន្ធនៅវេលាម៉ោង១០និង៣០នាទី ថ្ងៃទី០៤ ខែកុម្ភៈ ឆ្នាំ២០១៥ នៅចំណុចខាងត្បូងផ្សារចំការគ ប្រមាណ១០០ម៉ែត្រ តាមបណ្តោយផ្លូវលេខ២ ស្ថិតក្នុងភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ទោ ចាប សុផារិទ្ធ នាយកការិយាល័យប៉ូលិសប្រឆាំងបទល្មើសសេដ្ឋកិច្ចខេត្តបន្ទាយមានជ័យបានប្រាប់ឲ្យដឹងថា ដោយមានបទបញ្ជាពីលោកឧត្តមសេនីយ៍ត្រី អាត់ ខែម ស្នងការនគរបាលខេត្ត បានដាក់វិធានការដល់កម្លាំងជំនាញដើម្បីទប់ស្កាត់រាល់បទល្មើសសេដ្ឋកិច្ចដែលកើតឡើងនៅក្នុងខេត្តបន្ទាយមានជ័យ មានដូចជា រថយន្តដែលដឹកទំនិញសំពីងសំពោងដែលលួចបង្គាប់ទំនិញរត់ពន្ធគ្មានច្បាប់ និងរថយន្តតាក់ស៊ីលួចដឹកទំនិញគ្មានច្បាប់ជាដើម។ លោកបានបន្តថា ក្រោយពីដាក់វិធានកម្លាំងជំនាញសេដ្ឋកិច្ចរបស់លោកបានស្រាវជ្រាវឃាត់បានរថយន្តធុនកាំម៉ារីសេរីឆ្នាំ១៩៩៣ ពណ៌ទឹកប្រាក់ ដែលពាក់ស្លាកលេខខាងមុខបាត់ដំបង2A.2722១គ្រឿង ដែលលួចដឹកទំនិញគេចពន្ធដែលម្ចាស់រត់គេចខ្លួន។ ដោយមានការសម្របសម្រួលពីលោក ផាន់ វណ្ណារ័ដ្ឋ ព្រះរាជអាជ្ញាសាលាដំបូងខេត្តបន្ទាយមានជ័យបានឲ្យឆែកឆេរក្នុងរថយន្តនោះបានរកឃើញមានទឹកផ្លែឈើប្រភេទទឹកក្រូចដបតូចដែលនាំចូលពីថៃដាក់ពេញក្នុងរថយន្ត ហើយក៏បានយកមករក្សានៅស្នងការនគរបាលខេត្តដើម្បីអនុវត្តតាមច្បាប់។
នៅពេលដែលកម្លាំងនគរបាលប្រឆាំងបទល្មើសសេដ្ឋកិច្ចខេត្តបង្ក្រាបបាន ហៅឲ្យមន្ត្រីគយចូលរួមឆែកឆេរដែរ តែអស់លោកមិនចូលរួមព្រោះរថយន្តតាក់ស៊ីដែលដឹកទំនិញគេចពន្ធចេញពីក្រុងប៉ោយប៉ែតមកដល់ក្រុងសិរីសោភ័ណនេះបានបង់ឲ្យមន្ត្រីគយនិងរដ្ឋករខេត្តមាននៅផ្លូវ៥០ ភូមិកូនដំរី ក្រុងប៉ោយប៉ែត មន្ត្រីគយ និងគយចល័តនៅចំណុចសាលាក្រៅស្រុកអូរជ្រៅរួចរាល់អស់ហើយ។ រថយន្តតាក់ស៊ីដឹកទំនិញគ្មានពន្ធក្នុង១គ្រឿង១ខែបង់ជិត១លានរៀលក្នុង១ថ្ងៃ ដឹកប៉ុន្មានជើងក៏បាន ហើយក្នុង១ថ្ងៃតាក់ស៊ីដែលដឹកទំនិញគ្មានច្បាប់ទាំងថ្ងៃនិងយប់មិនតិចជាង៥០គ្រឿង ទើបការបង្ក្រាបគ្មានវត្តមានមន្ត្រីគយ និងរដ្ឋករចូលរួមយ៉ាងដូច្នេះ៕
0 Comments