ភ្នំពេញ ៖ បុរសម្នាក់បានរងរបួសធ្ងន់ និងស្រាល ដោយសារត្រូវរថយន្តប្រភេទ១២កៅអីបើកកៀរបណ្ដាលឲ្យដួលបោក ខណៈដែលពួកគេកំពុងជិះម៉ូតូឌុបគ្នាកាលពីវេលាម៉ោង១២និង១០នាទីរំលងអាធ្រាត្រឈានចូលថ្ងៃទី២៤ ខែកុម្ភៈ ឆ្នាំ២០១៥ នៅចំណុចខាងជើងរង្វង់មូលវិមានឯករាជ្យ តាមបណ្តោយផ្លូវលេខ២៦៨ កែងផ្លូវនរោត្តម ស្ថិតក្នុងសង្កាត់ចតុមុខ ខណ្ឌដូនពេញ។
សមត្ថកិច្ចមូលដ្ឋានបានឲ្យដឹងថា ជនរងគ្រោះទី១-ឈ្មោះ សែម សុលី ភេទប្រុស អាយុ៣៣ឆ្នាំ មុខរបរជាងកាត់សក់ ទី២-ឈ្មោះ សែម សុរិន ភេទប្រុស អាយុ២៧ឆ្នាំ មុខរបរជាងកាត់សក់ ទី៣- ឈ្មោះ តយ ភេទប្រុស អាយុ៣៥ឆ្នាំ អ្នកទាំង៣នាក់ស្នាក់នៅផ្ទះជួលដំបូលខៀវ សង្កាត់ចោមចៅ ខណ្ឌពោធិ៍សែនជ័យ ជិះម៉ូតូម៉ាកវេវ ពណ៌ខ្មៅ គ្មានស្លាកលេខ។
បើតាមការឲ្យដឹងពីជនរងគ្រោះឈ្មោះ សែន សុលី បានរៀបរាប់ថា មុនពេលកើតហេតុពួកគេបានជួបជុំគ្នាដោយជប់លៀងមិត្តភ័ក្ដិទើបតែមកពីប្រទេសថៃ ផឹកស៊ីនៅផ្ទះជួល ហើយក៏បាននាំគ្នាជិះម៉ូតូមកដើរលេងនៅម្តុំកោះពេជ្យ ពេលជិះមកវិញ ដោយធ្វើដំណើរតាមបណ្តោយផ្លូវលេខ២៦៨ ក្នុងទិសដៅពីលិចទៅកើត ខណៈមកដល់ចំណុចកើតហេតុស្រាប់តែមានរថយន្តទេសចរណ៍១២កៅអីមិនចាំស្លាកលេខធ្វើដំណើរស្របទិសគ្នា ហើយបានបើកបត់ស្តាំទៅជើងតាមផ្លូវនរោត្តម ក៏បានកៀរម៉ូតូពួកគេបណ្ដាលឲ្យដួលរងរបួសធ្ងន់ ហើយរថយន្តបង្កបានបើកគេចខ្លួនបាត់ស្រមោល។
ក្រោយពេលកើតហេតុជនរងគ្រោះដែលរបួសធ្ងន់ត្រូវបានមិត្តភ័ក្ដិដឹកតាមកង់បីទៅសង្គ្រោះនៅមន្ទីរពេទ្យ ចំណែកម្នាក់ដែលរបួសស្រាលក៏បានយកម៉ូតូទៅផ្ទះដោយមិនបានដាក់ពាក្យបណ្ដឹងនោះទេ ដោយសារតែរថយន្តបង្កគេចខ្លួនបាត់ស្រមោលទៅហើយនោះ៕
រស្មី
0 Comments