កំពង់ឆ្នាំង ៖ បុរស-ស្ត្រី និងក្មួយស្រីអាយុ៦ឆ្នាំម្នាក់ ជិះម៉ូតូត្រឡប់មកពីការបងប្អូនវិញ លុះមកដល់ផ្លូវបត់ចូលផ្ទះ ក៏បត់ចូល ប៉ុន្តែទើបតែងាកម៉ូតូបន្តិច ត្រូវរថយន្តក្រុងបុកបញ្ឆិតពីចំហៀងពេញ១ទំហឹងតែម្ដង បណ្ដាលឲ្យស្ត្រីម្នាក់នោះស្លាប់ភ្លាមៗនៅកន្លែងកើតហេតុ ចំណែកបុរស និងក្មេងស្រី របួសធ្ងន់ ត្រូវបានបញ្ជូនទៅមន្ទីរពេទ្យ។
ហេតុការណ៍គ្រោះថ្នាក់ចរាចរនេះបានកើតឡើងកាលពីវេលាម៉ោង៣និង២០រសៀល ថ្ងៃទី ២៣ ខែកុម្ភៈ ឆ្នាំ២០១៥ នៅកំណាត់ផ្លូវជាតិលេខ៥ ស្ថិតនៅក្នុងភូមិអូររំចេក ឃុំចក ស្រុកបរិបូណ៌ ខេត្តកំពង់ឆ្នាំង នៅទល់មុខផ្ទះជនរងគ្រោះតែម្ដង។
យោងតាមព័ត៌មានពីក្រុមគ្រួសារជនរងគ្រោះកំពុងយំសោកសង្រេងនឹងសោកនាដកម្មនេះ បាននិយាយឲ្យដឹងថា ស្ត្រីដែលស្លាប់នេះឈ្មោះ ស សារិ អាយុ៥៦ឆ្នាំ ចំណែកអ្នករងរបួសធ្ងន់ ឈ្មោះ ស ស៊ីម អាយុ៦៥ឆ្នាំ និងក្មេងស្រីអាយុ៦ឆ្នាំ។ ជនរងគ្រោះខាងលើនៅភូមិកើតហេតុជាមួយ គ្នា។ ប្រភពនេះបានបន្តឲ្យដឹងថា បុរស-ស្ត្រីនេះ ជាបងប្អូនបង្កើត ចំណែកក្មេងស្រីនោះជាក្មួយស្រី បង្កើតរបស់បុរស-ស្ត្រីនេះ ហើយនៅពេលកើតហេតុ ជនរងគ្រោះខាងលើជិះម៉ូតូម៉ាកC125សេរី ០១០ពណ៌ក្រហម ពាក់ស្លាកលេខ ព្រៃវែង 1B 36 46 40 ត្រឡប់មកពីការបងប្អូន នៅរ៉ាបំណក់ ស្រុក ក្រគរ ខេត្តពោធិ៍សាត់ លុះមកដល់មុខផ្ទះ ក៏បត់ចូល ប៉ុន្តែគ្រាន់តែងាកម៉ូតូបានបន្តិច ស្រាប់តែ រថយន្តក្រុងដែលបើកមកពីក្រោយស្របទិសគ្នាបុកបញ្ឆិតពីចំហៀងពេញ១ទំហឹងតែម្ដង។
ប្រភពព័ត៌មានពីប៉ូលិសស្រុកបរិបូរណ៍ដែលកំពុងអន្តរាគមន៍នៅនឹងកន្លែងកើតហេតុនេះ បានប្រាប់ឲ្យដឹងថា រថយន្តក្រុងនេះមានឈ្មោះ ថា លីហុង ទេសចរណ៍ ពាក់ស្លាកលេខ ភ្នំពេញ3B 34 65 ហើយនៅមុនពេលសមត្ថកិច្ចពួកគាត់មកដល់គឺតៃកុងរថយន្តនេះរត់គេចខ្លួនបាត់ទៅហើយ។
ប្រភពពីសមត្ថកិច្ចប៉ូលិសស្រុកបរិបូរណ៍បានបន្តឲ្យដឹងថា បើផ្អែកលើស្លាកស្នាម និងភ័ស្ដុតាងនៅនឹងកន្លែងកើតហេតុ សមត្ថកិច្ចជំនាញក៏បានសន្និដ្ឋានដូចប្រភពព័ត៌មានខាងលើដូច្នេះដែរ។
ប្រភពនេះបានបញ្ជាក់ថា ចំពោះករណីនេះ ក្រោយពីការវាស់វែង និងពិនិត្យប្រមូលភ័ស្ដុតាង រួចហើយ គឺវត្ថុតាង ត្រូវយកទៅរក្សាទុកនៅអធិការដ្ឋាន និងកសាងសំណុំរឿងដើម្បីចំណាត់ការ តាមច្បាប់។ ប្រជាពលរដ្ឋដែលបានឃើញហេតុការណ៍ផ្ទាល់ និងឃើញនៅក្នុងប្រព័ន្ធព័ត៌មាននោះ គឺករណីគ្រោះថ្នាក់ចរាចរបែបនេះ គឺបានកើតឡើងច្រើនករណីមកហើយ ដោយសារតែការបត់កៀកពីមុខ និងអ្នកបើកពីក្រោយបើកហួសល្បឿនកំណត់នៃច្បាប់នោះ៕
កង ចេស្ដា
0 Comments