ព្រះសីហនុ ៖ ប្រជាពលរដ្ឋចំនួនប្រមាណ២៤គ្រួសាររស់នៅក្នុងភូមិលេខ១ សង្កាត់លេខ៣ ក្រុងព្រះសីហនុ/ខេត្តព្រះសីហនុ នៅរសៀលថ្ងៃទី២២ ខែកុម្ភៈ ឆ្នាំ២០១៥នេះ បានទៅជួបជុំគ្នានៅលើដីអតីតដែលពួកគេធ្លាប់រស់នៅកាន់កាប់រយៈពេលប្រមាណ២០ឆ្នាំមុន និងនិមន្តព្រះសង្ឃចំនួន៣អង្គរៀបចំធ្វើពិធីសែនព្រេន ម្ចាស់ទឹក ម្ចាស់ដី នៅទីនោះ និងវត្ថុសក្ដិសិទ្ធិឲ្យជួយដល់ពួកគាត់ទាំងអស់គ្នា ក្នុងគោលដៅស្វែងរកយុត្តិធម៌តាមប្រព័ន្ធផ្លូវច្បាប់ ពាក់ព័ន្ធដីធ្លីទំហំ(៤២.៧១០ម៉ែត្រការ៉េ) ដែលត្រូវក្រុមហ៊ុន(ថៃប៊ុនរ៉ុង)រំលោភបំពានយកក្នុងពេលកន្លងមកឲ្យពួកគាត់បានកាន់កាប់វិញ។ ហើយនៅក្នុងពិធីនោះ ក៏មានរៀបចំពិធីដុតរូបសំណាកទីងមោងតំណាងឲ្យបុគ្គលចំនួន២នាក់ គឺទី១-រូបសំណាកសពលោក ម៉ម មិត្ត អតីតព្រះរាជអាជ្ញារងខេត្តព្រះសីហនុ និងទី២-រូបសពលោក ឃឹម បូរអតីតអភិបាលក្រុងព្រះសីហនុឆាបឆេះយ៉ាងសន្ធោសន្ធៅ ព្រមទាំងបាចអំបិល និងផ្លែម្ទេសដុតជាមួយផងដែរក្នុងនៃចងកំហឹងយ៉ាងមុតមាំ ពីព្រោះបុគ្គលទាំងពីរនាក់នេះត្រូវបានប្រជាពលរដ្ឋអះអាងថា គឺជាដើមចមធំបំផុតដែលប្រើប្រាស់អំណាចរំលោភបំពានយកដីធ្លីរបស់គាត់ទៅឲ្យក្រុមថៃប៊ុនរ៉ុង។ លុះព្រឹកថ្ងៃទី២៣ ខែកុម្ភៈ ឆ្នាំ២០១៥ ក្រុមប្រជាពលរដ្ឋរងគ្រោះទាំង២៤គ្រួសារខាងលើក៏បាននាំគ្នាដង្ហែជាក្បូននាំយកញត្តិស្តីអំពីការស្នើសុំការជួយអន្តរាគមន៍បញ្ហាទំនាស់ដីធ្លីរបស់ពួកគាត់ខាងលើដាក់ចូលទៅមន្ទីររៀបចំដែនដីនគរូបនីយកម្ម និងសំណង់ខេត្តឲ្យជួយដោះស្រាយ ដោយក្បូនដង្ហែនេះក៏មានការគាំទ្រ និងចូលរួមដង្ហែពីរសំណាក់តំណាងសហគមន៍ចំនួន១៩មកពីទូទាំងខេត្តព្រះសីហនុផងដែរ។
បងស្រីឈ្មោះ ហង្ស ចិន្តា តំណាងក្រុមប្រជាពលរដ្ឋរងគ្រោះចំនួន២៤គ្រួសារខាងលើបាននិយាយរៀបរាប់ប្រាប់ឲ្យដឹងថា ពួកគាត់បានរស់នៅ និងកាន់កាប់ដីតំបន់ខាងលើនេះតាំងពីឆ្នាំ១៩៧៩មកម្ល៉េះ ក្រោយមកនៅក្នុងអំឡុងឆ្នាំ១៩៩៦ ដីធ្លីរបស់ពួកគាត់ត្រូវបានក្រុមហ៊ុន(ថៃប៊ុនរ៉ុង)ធ្វើរបងហ៊ុមព័ទ្ធយកទាំងរំលោភបំពាន ពេលនោះយើងពួកគាត់អស់គ្នាបានដាក់ពាក្យបណ្ដឹងទៅអាជ្ញាធរមូលដ្ឋានថ្នាក់ឃុំ/ស្រុក និងក្រុង ដើម្បីសុំទាមទារយកដីនោះមកកាន់កាប់វិញ ប៉ុន្តែគ្មានទទួលបានដំណោះស្រាយអ្វីទាំងអស់ ផ្ទុយទៅវិញនៅថ្ងៃទី០៤ ខែឧសភា ឆ្នាំ២០០២ អាជ្ញាធរសម័យលោក ឃឹម បូរ ជាអភិបាលរងក្រុងព្រះសីហនុ និងលោក ម៉ម មិត្ត ជាព្រះរាជអាជ្ញាតុលាការក្រុងផងនោះ បានប្រើប្រាស់កម្លាំងសមត្ថកិច្ចប៉ូលិស ប៉េអិម និងយោធា មកចាប់ពួកគាត់ឃុំឃាំងយ៉ាងអយុត្តិធម៌បំផុត ព្រមទាំងធ្វើការឈូសឆាយបំផ្លាញនៅផលដំណាំដាំដុះជាដើម និងផ្ទះសម្បែងខ្ទេចខ្ទីអស់គ្មានសល់ធ្វើឲ្យពួកគាត់ទាំងអស់គ្នារងទុក្ខវេទនាគ្មានដីធ្លីផ្ទះសម្បែងរស់នៅតាំងពីពេលនោះរហូតមក។ ហើយនៅក្នុងអំឡុងឆ្នាំ២០០៨ ទីតាំងដីនោះក៏ត្រូវបានគេឃុបឃិតគ្នាលក់បន្តពីមួយទៅមួយនិងធ្វើប្លង់កម្មសិទ្ធិស្របច្បាប់យកទាំងបំពានតែម្តង បើទោះបីជាពួកគាត់(ប្រជាពលរដ្ឋរងគ្រោះ)បានដាក់ពាក្យប្ដឹងទាស់ក្នុងការចេញប្លង់ក៏ដោយ ក៏មិនបានលទ្ធផលនោះដែរ។ ជាមួយគ្នានេះ បងស្រី បានធ្វើការបញ្ជាក់យ៉ាងមុតមាំថា រូបគាត់ ក៏ដូចប្រជាពលរដ្ឋរងគ្រោះទាំង២៤គ្រួសារនឹងធ្វើការសាងសង់ខ្ទមរស់នៅលើទីដីតាំងទំនាស់ខាងលើនេះ មិនចាកចេញជាដាក់ខាត បើសិនជាអាជ្ញាធរខេត្តមិនព្រមធ្វើការដោះស្រាយតាមផ្លូវច្បាប់ផ្តល់ភាពយុត្តិធម៌ដល់ពួកគាត់ទាំងអស់គ្នា។ ជាមួយគ្នាក្នុងថ្ងៃដដែលនេះ ក៏មានប្រជាពលរដ្ឋចំនួន៨គ្រួសារផ្សេងទៀត ក៏បាននាំគ្នាមកធ្វើការតវ៉ាផងដែរ ចំពោះបុគ្គលមួយចំនួនដែលកំពុងរំលោភវាទីយកដីរបស់ពួកគាត់កាន់កាប់ទាំងបំពានមិនមានដំណោះស្រាយ និងសូមសំណូមពរទៅដល់អាជ្ញាធរខេត្តព្រះសីហនុឲ្យជួយដោះស្រាយដូចគ្នាដែរ។
លោក សុខ សុង ប្រធានសភាពាណិជ្ជកម្មខេត្តព្រះសីហនុជាតំណាងក្រុមហ៊ុន(ថៃប៊ុនរ៉ុង)បានធ្វើការបញ្ជាក់ថា ទីតាំងដីទំនាស់ខាងលើនេះជាដីក្រុមហ៊ុនទិញពីរអាជ្ញាធរខេត្តដោយមិនមានការរំលោភបំពានដីពីប្រជាពលរដ្ឋខាងលើនេះទេ។ បន្ទាប់មកដីនេះក្រុមហ៊ុនក៏បានពុះជ្រាកលក់ទៅឲ្យអ្នកដទៃជាហូរហែ ព្រមទាំងបានធ្វើប្លង់កម្មសិទ្ធស្របច្បាប់រួចរាល់អស់ហើយ។
លោក ជិន សេង អនុប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តព្រះសីហនុ ជុំវិញបញ្ហានេះលោកបានធ្វើការបញ្ជាក់ផងដែរថា ញត្តិដែលប្រជាពលរដ្ឋស្ដីពី សូមអន្តរាគមន៍លើដីទំនាស់ខាងលើនេះ ខាងមន្ទីរបានទទួលហើយ ប៉ុន្តែចំពោះដំណោះស្រាយយ៉ាងណានោះខាងមន្ទីរមិនមានលទ្ធភាពទេ គឺហួសសមត្ថភាព ពីព្រោះរឿងរាវនេះបានកើតឡើងរយៈពេល៥ជំនាន់នៃថ្នាក់ដឹកនាំខេត្តព្រះសីហនុមកហើយ ដូចនេះនីតិវិធីមានតែធ្វើរបាយការណ៍ដាក់ជូនទៅថ្នាក់លើបានជ្រាបតែប៉ុណ្ណោះ៕
កោះពស់
){kind=link}
0 Comments